Регион вуйлатыше Юрий Зайцев калык дене приемышто вашлийын. Йошкар-Олаште илыше Евгения Гуляева Аницферов урем, 27 адрес дене пӧртым капитально тӧрлымӧ нерген йодын. Мэр Евгений Маслов палемден, план дене тиде пӧртым 2038-2040 ийлаште тӧрлышаш улыт ыле, но йодмаш почеш, тиде жапым уэш ончен лектыныт.
Правительстве пӧртышто частичный мобилизацийын пашажлан полышым ойырымо шотышто координационный советын заседанийже лийын. Тудым Юрий Зайцев эртарен. Республикыште военнослужащий да нунын ешыштлан тӱрлӧ шӧрынан полыш ойыралтеш. Координационный советын еҥже-влак Ульяновский областьыште лийыныт, тушто салтак-влакын илыме йӧныштым акленыт. Илыме ангарлаште вентиляцийым ыштеныт. Тазалыкаралтыш министерствын еҥже палдарен: тунемме рӱдерышке медик-влак миеныт, южыжыштлан стоматологын экстренно полышыжо кӱлын. Тидлан Мордовийын Минздравше пӱйым эмлаш мобильный комплексым ойырен.
Медведево поселкысо Мосолов лӱмеш уремым ончылгоч ыштен шуктеныт. Тушто пашам нацпроект дене келшышын 2023 ийыште шуктышаш улыт ыле. Но специалист-влак тений октябрь тылзыште пашам тӱҥалыныт. Тушто у асфальтым шареныт, тротуар-влакым тӧрленыт. Тиде урем дене Медведево историко-художественный тоштер, «Чудо Остров» мини-зоопарк да Гайша мечеть деке миен шуаш лиеш. «Лӱдыкшыдымӧ да сай качестван корно» нацпроект дене келшышын, Медведевышто 2019-2022 ийлаште Советский, Гагарин, Ленин, Терешкова, Лермонтов, Комсомольский, Коммунистический, Мосолов урем-влакым тӧрленыт.
Марий Эл Тазалыкаралтыш министерстве 2022 ийыште 10 тылзылан диспансеризацийым иктешлен. Республикыште илыше-влак гыч 7 тӱжем еҥын инфекционный огыл хронический чер пеҥгыдемдалтын, 200 еҥлан онкологий диагнозым шынденыт. Лӱдыкшӧ тӱшкашке уто нелыт, вӱрыштӧ кугу холестерин, чын огыл кочмаш пурат. Марий Элыште кажне ийын диспансеризацийым республикыште илыше-влак гыч 45 процент наре еҥ эрта. Утларакшым ӱдырамаш-влак шке тазалыкышт шотышто тургыжланат. 18 гыч 39 ий марте кум ийлан ик гана диспансеризацийым эрташ лиеш, 40 ий дечын вара кажне ийын.
Йошкар-Олаште кӱртньӧ омсам ыштыше амалкалче мобилизованный-влаклан 10 изирак коҥгам ыштен, нуным ОНФ-н регионысо пӧлкашкыже конден. Предприятийын вуйлатышыже Александр Земцов палдарен: нине коҥга-влак тораште улшо, порысым шуктышо-влакым мыняр гынат ырыктен кертыт. Калык фронтын исполкомын вуйлатышыже Надежда Ефремова палдара: «Декабрь кыдалне гуманитарный грузым специальный военный операций кайыме верышке намиен шуктат». Народный фронт «Все для Победы» проектын сайтыштыже Марий кундем гыч мобилизованный-влаклан полышым чумырымо сборым увертарен. Полышым ОНФ-н регионысо пӧлкашкыже кондаш лиеш: Ленинский проспект, 29.
Юрий Зайцев Херсон да Херсонский область гыч толшо-влаклан кӱлеш полышым пуаш кӱштен. Марий Эл вуйлатыше совещенийыште палдарен: «Сециальный военный операций кайыме верла гыч толшо-влак – тиде мемнан элын гражданже-влак улыт, садлан нунылан полшыман. Льгот, социал, экономике да паша шотышто праваштым шуктыман».
Козьмодемьянск да Курыкмарий районысо волонтер-влак Луганскышке кок кундемышке да Белгородский областьышке гуманитар грузым намиен шуктеныт. Нуным Луганский областьын ик госпитальжылан полшаш йодыныт. А тиде медикамент, быт средство, кочкыш да молат.
Республикынан районлаштыже мобилизованный-влаклан полышым чумырымо поро кумыл концерт-влак эртаралтыт. Кодшо кечылаште Шернур районысо Сердеж тӱвыра да каныме рӱдерыште тыгай кас лийын. Тушко Шернур тӱвыра пӧрт, Казанский да Сердеж рӱдер, Чашкаял клубын коллективышт ушненыт.
Морко кундемыште марий просветитель Гавриил Яковлевым шарныме пайрем-погынымаш эртаралтын. Марий букварьын авторжо Курыкмарий кундемыште 1843 ийыште шочын. Марий просветитель семын ятыр шымлыме пашам возен, черке книга-влакым кусарен, черкыште службым эртарен. Унчо, Арын кундемлаште школым ышташ полшен.
Аварийный пӧртлаште илыше-влак у илымверыш куснат. Марий Элыште федерал проект дене келшышын, Медведево районысо Знаменский поселкышто 22 пачер дечын сравочым тоштемше пӧртлаште илыше-влакалан ойыреныт.
