«Лӱдыкшыдымӧ да сай качестван автомашина корно» нацпроект почеш тений кундемна мучко икмыняр вере корным шотыш кондат. Чылаже регионысо 221 километр корным да «Йошкар-Ола» оласе агломерацийыш пурышо 20 километр корным тӧрлышаш улыт. Шернур – У Торъял корно йӧршеш пытен.
Марий кундем гыч 14 предпрятий «Российын 100 эн сай сатужо» Российысе конкурсышто сеҥен. Сеҥыше-влак дене да «Марий Элыште наставничествын эн сай практике-влак» регионысо конкурсын лауреатше-влак дене Юрий Зайцев вашлийын. Сеҥыше-влак радамыште тӱрлӧ продукцийым ыштыше-влак. Нунылан суаптар-влакым кучыктеныт.
Вес конкурс «Эн сай наставничестве» шотышто производственно-технологический кӱлешан услугым ыштымылан республикысе компетенций рӱдерым палемденыт.
Марий Эл гыч кумдыкым тӱзатыме проект Российысе конкурсышто сеҥен. Волжск олаште Ленин уремын ужашыжым да Рӱдо площадьым тӱзатыме проект «Оласе йӧнан средам ыштымаш» проект-влак конкурсышто сайлан шотлалтын. Тений ты марте республике гыч кок проект конкурсышто сеҥен. Тиде Звенигово оласе набережный да Козьмодемьянск оласе композитор Андрей Эшпай лӱмеш сквер. Россий Президент Владимир Путинын кӱштымашыже дене тений конкурслан ешартыш шийвундым ойырат. Тиде проект дене келшышын, йолешке-влакын коштмо верыштым, парковкым тӱзатат, тыгак пушеҥге да моло кушкылым шындат, йоча площадкым келыштарат. Волжскышто рӱдӧ площадьын реновацийже 2023-2024 ийлаште ышталташ тӱҥалеш.
Регион вуйлатыше «Солнышко» интернат-пӧртыштӧ йоча-влакым саламлен. Социал вияҥмаш министрын сомылжым жаплан шуктышо Марина Островская вуйлатышылан столовыйым, стоматологий кабинетым, массажым ышташ пӧлемым ончыктен. Пытартыш ийлаште столовый йоча пӧртыштӧ вашталтын, тудым мотор йоча кафе семын ыштыме. Тидын дене пырля спорт да модмо залым, социал-реабилитаций отделенийым тӧрленыт. Юрий Зайцев йоча-влаклан тамле пӧлекым, а йоча пӧртлан кок интерактивный панельым налаш сертификатым кучыктен. Мероприятийышке «Солнышкошто» илыше 40 икшыве, воспитатель, пашаеҥ-влак ушненыт.
«Шонымашым шуктышо кож» акций йоча-влакынат, кугыеҥ-влакынат шонымашыштлан шукталташ полша. Тудо йӱлашке пурен: федерал кӱкшытыштат, регионлаштат, районлаштат эртаралтеш. Акцийын сайтыштыже Марий Эл гыч 68 участник шке шонымашыжым коден. Тиде кечылаште республик вуйлатыше Юрий Зайцев кож гыч шонымаш дене 4 шарым налын, тыгак Москвасе Кремльыште тудо мемнан республике гыч ака-шӱжарын шонымашыштым шукташ сӧрен.
350 наре тулык икшыве тений у пачерышке илаш куснен. 26 декабрьыште Шойбулак селаште 36 еҥлан у пачерым пуэныт. 2022 ийыште, моло ийла дене таҥастарымаште, шукырак илымверым ситарыме. 2019 ий гыч тулык йоча-влаклан 900 утла пачерым пуэныт. Тыгай илымвер илаш пураш ямде, тушто ремонтым ыштыме. Тений Шойбулак дечын посна Солнечный, Волжск да Семеновкышто у пӧрт-влакым ыштен шуктеныт. Туштат тулык йоча-влаклан пачерым пуэныт. 
У Ий каныш жапыште лӱдыкшыдымылык шотышто тергымаш посна тӱткӧ лиеш. Тидын нерген Марий Эл вуйлатыше Юрий Зайцев терроризм ваштареш кучедалше комиссий ден оперативный штабын заседанийыштышт увертарен. У Ий да Рошто пайрем годым калыкын ласкалыкшым Росгвардий пашаеҥ-влак, вневедомственный охранын еҥже да правопорядкым эскерыше моло сотрудник-влак аралаш тӱҥалыт. Тыгак тӱшкан погынымо верлаште пиротехникым кучылтмымат тергат.
Марий Элыште илыше-влак специальный военный операцийыште улшо боец-влаклан полышым чумырат. Калык фронтышко кажне кечын еҥ-влак толыт. Еҥ-влак тӱҥ шотышто упшым, перчаткым, кольмым, да моло кӱлешан погым кондат. Шуко еҥ шке лӱмжым палдарыде полша. Калык фронтын регионысо пӧлкаже Йошкар-Олаште Ленинский проспект, 29 (профсоюз объединений могыр гыч пурыман). Гуманитарный полышым чумырымым регион вуйлатыше Юрий Зайцев аклен. Тушто коҥга-влакым да моло кÿлешан погым чумыреныт.
Параньга районысо плотинаште гидроузелым капитально олмыктеныт. Паша 8 миллион теҥгеш шуын. Тидлан окса кугыжаныш проект почеш ойыралтын. Верысе инициативе программе почеш Ирнур ден Пӧртанур ял-влак коклаште верланыше плотинам лишыл жапыште эше каныме вер семын йӧнештараш шонат.
1 январь гыч тазалыкаралтыш сферыште ыштыше-влаклан тылзе еда ешартыш оксам тӱлаш тӱҥалыт. Районысо врач-влаклан 18 тӱжемат 500 теҥгем, первичный звенон врачше-влаклан 14 тӱжемат 500 теҥгем, вашке полышышто ыштыше врач-влаклан 11 тӱжемат 500 теҥгем пуат. Ешартыш оксам кыдалаш медицин персонал-влакат налаш тӱҥалыт. Районысо эмлымверлаште 8 тӱжем теҥге, ФАП, врачебный амбулаторий пашаеҥ-влаклан 6 тӱжемат 500 теҥге. 7 тӱжемлан вашке полыш медсестран пашадарже ешаралтеш, да 4 тӱжем гыч изирак медперсоналлан ойырымо. 
