Самырык еҥ-влакым шанче пашалан кумылаҥдат. Марий Элыште «Изирак Евсеевский лудмаш» конференций эртен. Тушко 11 гыч 18 ияш марте школышто да СУЗ-ышто тунемше 30 утла ӱдыр-рвезе ушнен. Самырык шымлызе-влак шке туныктышышт дене пырля экологий, историй да туризм дене кылдалтше пӱсын шогышо йодыш-влакым лончыленыт. Нунын пашаштым кум секцийыште акленыт.
Саранск олаште Российысе финно-угор калык-влакын интеллектуал усталык фестивальышт эртаралтын. Тушто тӱрлӧ кундемла гыч автор-влак икмыняр секцийыште возымо да кусарыме паша шотышто мастарлыкыштым шуареныт. Фестиваль Российын 15 регионжо гыч шочмо йылме дене возышо-влакым чумырен.
Марий Эл вуйлатыше специальный военный операцийыште сусыргышо-влаклан носилка-влакым ургышо цехлан ешартыш шийвундым ойыра. Марий Эл Кугыжаныш погынын депутатше, «Справедливая Россия» партийын регионысо пӧлкан вуйлатышыже Наталия Глущенко производствылан ургымо машина-влакым налаш йодын. Тудо «Золотые руки ангела» мер ушемын регионысо координаторжо.
Правительствым да тудын коллегийжым пеҥгыдемдыме. Тидын шотышто Указышке кидпалыжым Юрий Зайцев пыштен. А Марий Эл Кугыжаныш Погынын сессийыштыже депутат-влак тудым сайлан шотленыт. Документ дене келшышын, регионысо правительствышке – Правительстве председатель, тыгак тудын кок икымше алмаштышыже, кум алмаштышыже, министр-влак да Марий Эл вуйлатышын администраций вуйлатышыже пурат.
Тазалык дене эмганыше-шамыч спорт дене кылым кучат. Сочи олаште мини-футбол дене инвалид-влак коклаште «Стальная воля» Российысе таҥасымаш эртен. Марий Элын командыже-влак сеҥыше радамыш логалыныт. Начарын ужшо-влак мини-футбол дене модыныт. Пӧръеҥ команде 7 лийын. Ӱдырамаш-влак коклаште ныл команде таҥасен. Пӧръеҥ-влак коклаштат, ӱдырамаш коклаштат Марий Эл гыч команде-влак кумшо верышке лектыныт.
Корно правилым эскераш тений 27 видеокамерым вераҥденыт. Камер-влак посна лӱдыкшым кондышо кумдыклаште пашам ыштат. Теве мутлан, Шернур трактын 64 километрыштыже сакеныт. Тыгак Йошкар-Олаште Строитель-влак урем дене 13-шо пӧрт воктенсе кумдыкышто камерым вераҥдыме. Тылеч посна тыгай верлаште корно знак-шамычым шогалтыме да келшыше разметкым ыштыме. Мут толмашеш, кодшо ийын республике мучко 25 видеокамере ешаралтын.
Тунеммаште, проект, шанче, спорт аланыште ойыртемалтше студент-влаклан лӱман стипендий. Тыгайжым республикыште 59 еҥ налаш тӱҥалеш. Марий Эл вуйлатышын стипендиатше-влакым саламленыт. Юрий Зайцевын суаптарже-влакым Правительстве председательын икымше алмаштышыже Михаил Васютин кучыктен.
Кундемыштына илыше еҥ-влак шке йыр улшо вер-шӧрым тӱзатымашлан кугу тӱткышым ойырат. Шонымаш-шамычым илышыш шыҥдараш «Йӧнан оласе средам ыштымаш» программе полша. Тудын дене келшышын парк, сквер, бульвар да тӱшкан погынымо моло кумдык-влак уэмыт.
«Лӱдыкшыдымӧ ола» – преступлений ышталтмым палаш да тудым рашемдаш полша. Тудын нерген Правительствыште эртыше совещанийыште каҥашеныт. Республикым вуйлатыше Юрий Зайцев видеоэскерымаш системын кӱлешлыкшым сай могыр гыч палемден. Йошкар-Оласе уремлаште да моло вере вераҥдыме эскерыше видеокомплекс-влак правам пудыртышо икмыняр еҥым жапыштыже кучаш полшеныт.
Мобилизаций почеш порысым шукташ кайыше-влакын лишыл еҥышт социал кыл гоч ятыр йодышым тарватат. Йодмаш-влак республикынам вуйлатыше Юрий Зайцевланат пурат. Шукерте огыл тудо икмыняр еш дене шкежак вашлийын мутланен. «Лишыл еҥда верч азапланымым мый умылем. Мый нунын дене Ульяновскышто шке вашлийынам да мо дене полшаш кӱлмым рашемденам. Тиде йодыш мыйын ончыл верыште», - умылтарен погынышо-влаклан.
