Тӱвыра министр Константин Иванов шанче-практик конференцийыште регионышто тӱвыра аланысе политике нерген докладым лудын. Пытартыш ийлаште «Культура» нацпрокет дене Я.Эшпай лӱмеш марий кугыжаныш филармонийым чоҥымо, тӱвыра да каныме 12  учрежеденийым тӧрлымö, 5 йоча сымыктыш школым уэмдыме, 7 модельный бибиотекым ыштыме, 3 виртуальный концерт залым келыштарыме да 13 автоклубым налме. 

Йошкар-Оласе эмлымверышке кокымшо МРТ аппаратым налыныт. «Тазалык аралтыш» нацпроектын  «Шӱм-вӱргорно чер дене кучедалмаш» регионысо проектше дене келшышын налме медицин оборудованийын акше – 96 млн наре теҥге. Тазалыкаралтыш министерстве палдара, кызыт больницыште тудым вераҥдат да тергат. Ушештарена, кодшо ийын регионысо проект дене келшышын Волжский да Шернур рӱдӧ эмлымверлан томографым налыныт.

Марий Элыште Пенсий фонд гыч 27 тӱжем утла ешлан выплате тӱлалтеш. Эн шукынжо 8 ияш гыч 17 ияш марте пособийым налыт. А тиде – 21 тӱжем еш. Тыгай социал полыш шагал парышан ешлан ойыралтеш. Тыгак мӱшкыран ӱдырамаш-влаклан, военный-влакын ешыштлан, радиацийыш логалше еҥ-шамычлан выплатым колтат. Шагал парышан мӱшкыран ӱдырамаш эше ик пособийым налын кертеш. Кызыт тыгай выплатым 1400 еҥлан тӱлат. Тудын кугытшо 6 тӱжем утларак. 700 ава кокымшо йочалан ойырымо ава капитал гыч выплатым налаш йодмашым возен. 1700 утла пашадыме ача-ава инвалид йочам ончымылан пособийым налеш.

Кундемым тӱзатат. «Верысе инциативылан полыш» программын шукталтмыж нерген Эл кӧргӧ политикын министерствыже палдара. Медведево район Сенькан ял шотан илем кумдыкышто пожар годым вӱдым налашлан ныл оборудованийым вераҥденыт. Таве-влакым кӱнчен, пожар гидрант-влакым шынденыт.

Марий Элыште йоча да самырык-влакын Российысе толкынын регионысо да верысе пӧлкалаштым ыштат. Тидын шотышто координационный советын икымше заседанийже лийын. Тудым Республик Правительстве председательын икымше алмаштышыже Михаил Васютин эртарен. Туныктышо да йоча мер ушемын еҥышт тиде тунемме идалыклан паша радамым ыштеныт. Владимир Путинын пенгыдемдыме законжо дене келшышын Российыште йоча да самырык-влакын толкыныштым ыштат. Тудо чыла йоча ушем да объединений-влакым ушаш полшышаш. 

Марий Эл тоштемше пӧртла гыч еҥ-влакым кусарыме программылан ЖКХ-н реформирований фондышкыжо ешартыш финансированийлан йодмашым пуэн. 2021-2022 ийысе этапым мучашлаш 400 миллион теҥге кӱлеш. Тудын дене 2017 ий 1 январь марте аварийныйлан шотлалтше пӧртла гыч еҥ-влакым кусарышаш улыт.

Медведево районысо Руш Кукмор ялыште капитальный ремонт деч вара тӱвыра пӧрт пашам ышташ тӱҥалын. Кеҥеж мучко тыште леведышым да окнам вашталтеныт, кӱварым, пырдыжым, тувырашым шотыш конденыт, тыгак чыла инженер да коммуникаций вотым шотыш конденыт.

Композитор ушемын у вуйлатышыжым ойыреныт. Ты пашам самырык семмастар Эрик Сапаев лӱмеш опер да балет театрын тӱҥ дирижержо Григорий Архиповлан ӱшаненыт. Григорий Вячеславович Российысе да Марий Элысе семмастар-влакын радамышкышт 2010 ийыште ушнен. Пашам ыштыме жапыште тудо камерно-инструментальный, вокальный да симфонический музыкын тӱрлӧ жанрже дене произведений-влакым, ятыр спектакльлан семым возен.  Палемдыман, кызыт ушемыште – куд композитор – Виталий Алексеев, Григорий Архипов, Элина Архипова, Вениамин Захаров, Анатолий Незнакин, Анатолий Тихомиров  да вич музыковед улыт. 

Марий Элыште класс вуйлатыше-влакын ассоциацийыштым ышташ. Тыгай темлымаш дене  Российысе форумышко ушнышо  класс вуйлатыше-влак лектыныт. Марий Эл гыч 8 педагог шукерте огыл класс вуйлатыше-влакын российысе форумыштыжо лийын. Тушко миен коштмо нерген нуно туныктыш министрын пашажым шуктышо Лариса Ревуцкая дене йыргешке ӱстел йыр каҥашеныт.

Российыште илыше калык-влакын тӱвыра поянлыкыштын идалыкышт нерген возышо, ойлышо, ончыктышо журналист-влакын пашаштым иктешленыт. Конкурсым тӱвыра, печать да калык-влакын пашашт шотышто министерстве эртарен. Сеҥыше-влакым тӱрлӧ номинацийыште ойыреныт. Тушто «МЭТР» телеканалын икмыняр пашаже сеҥыше-влак радамышке лектын.  Тиде,  Лира Матвееван -  Виталий Кудрявцев дене интервьюжо, Эльвира Рыжован «Пеледыш айо» пайрем гыч репортажше, Вера Горохован - «Кундыш кугыза» нерген сюжетше. Тыгак Мария Шавкунован, Дмитрий Никитинын пашаштым сайлан шотленыт. «Радиошто эн сай паша» номнацийыште «Марий Эл Радио» гыч Марина Глушковам палемденыт. Конкурсышко 40 утла паша пурен. Сеҥыше-влак радамыште районысо да республикысе газет да моло СМИ-влакат улыт.