Тошто пӧртат сылнештеш. Илыме зданий-влакым капитально олмыктымо паша умбакыже шуйна. Тиде программе дене 137 тӱжем еҥын илыме условийыштым саемденыт. 920 зданийым капитально олмыктеныт. Пӧртлаште вӱд, шокшо да тул пуымо системым вашталтат, лифтым уэмдат да моло пашам шуктат. Тений программе дене келшышын, эше 9 тӱжем утла еҥын илыме условийыштым саемдышаш улыт.
1 апрель гыч школлаште икымше классыш тунемаш колтымо нерген йодмашым налыт. Тиде кампаний 30 июнь марте шуйна. Кызыт йодмашым илыме вер шот дене налыт. 6 июль гыч 5 сентябрь марте кеч-могай школышко пуаш лиеш. Вер лиеш гын, икшывым налшаш улыт. Йодмашым «Кугыжаныш услуго» сайт гочат пуаш лиеш. Тушто заявленийым возен, келшыше документым пырля колтыман. Вашмут 30 июнь деч вара личный кабинетышке 3 паша кече жапыште толеш. Тыгак йодмашым туныктыш услугым пуышо порталыште, шкеак школышко миен але школын сайтше гоч пуаш лиеш.
Марий Элыште мобилизованный-влакын ешыштлан социал паспортым ыштеныт. Тушко нунылан могай полышым пуаш кӱлмӧ пурталтеш. Тачысе кечылан тыгай документым кок тӱжем вичшӱдӧ утла еш налын. Полышым коммунал озанлык сферыште, медицине да туныктыш аланыште пуат. Социал полышым пуышо рӱдерын пашаеҥже-влак специальный военный операцийыште улшо-влакын лишыл родо-тукымышт деке миен коштыт, мо дене полшаш кӱлмӧ нерген йодыт да йодмашым рашемдашлан ведомствылашке колтат.
Медучрежедний-влакым у оборудований дене пойдарат. Ты гана Йошкар-Оласе кокымшо номеран поликлиникылан УЗИ аппаратым налыныт. Оборудованийым женский консультацийлан пуат. «Кодшо ийын консультацийыште 10 тӱжем ӱдырамашлан УЗИ-м ыштыме. Кызытсе оборудований эксперт класс радам гыч, сандене тудын дене мӱшкыран да патологиян ӱдырамаш-влакым тергаш сайрак», – тыге тазалыкаралтыш министерствын тӱҥ акушер-гинекологшо Виктор Дробышев палдарен. Ушештарена, медицин оборудований-влакым первичный звенон модернизацийже программе почеш налыт. 
Пушкин карт дене утларак пайдаланаш тӱҥалыныт. Кодшо ийын 105 тӱжем наре билетым налыныт. Тидыже ӱмашсе деч ныл пачаш шукырак. Эн шуко – Эрик Сапаев лӱмеш кугыжаныш академический опер да балет театрышке, М.Шкетан лӱмеш марий кугыжаныш драме театрышке да Яков Эшпай лӱмеш марий кугыжаныш филармонийышке коштыныт. «Пушкин карт» программе дене пайдаланыше эн шуко участник Йошкар-Олаште, Звенигово да Медведево районлаште.
Республикысе кӧргӧ политике, верысе кучем да юстиций министр семын Антон Мирбадалев тыршаш тӱҥалеш. Тидын шотышто указышке кидпалыжым Юрий Зайцев 3 мартыште пыштен. Антон Алексеевич ты марте Кугыжаныш Погынын депутатше лийын, но изарнян эртыше сессийыште тудын полномочийжым ончылгоч мучашлыме шотышто йодмашыжым сайлан шотленыт.
Козьмодемьянскыште «Паллада» парус клубын мастерскойжым почыныт да у пу суднылан негызым пыштеныт. «Паллада» парус клуб республикысе сарзе-патриот клуб-влак коклаште ик эн ончылно. Республике тудым вияҥдаш кугу тӱткышым ойыра. Тушто 100 утла йоча шуаралтеш. Клубын воспитанникше-влак Россий кӱкшытан конкурслаште икмыняр гана сеҥыше лийыныт, Президент фондын грантшымат налыныт, Правительстве кӱкшытыштӧ шарнымаш медаль дене палемдалтыныт. Икманаш, сеҥымашыштат шуко – шонымашыштат мучашдыме. Мастерской зданийым ыштымаште Марий Элыште йоча теҥыз движенийын меценатше Юрий Усков полшен.
Йошкар-Олашке икымше 15 у автобусым конденыт. Март мучаш марте ПАЗ маркан эше 35 транспорт средстве кундемышке толын шуэш. Тидын нерген республике правительстве председательын алмаштышыже Александр Сальников палдарен.
Марий Эл вуйлатыше Юрий Зайцев Ростовский областьын губернаторжо дене вашлийын. Вашлиймаш Ростов-на-Дону олаште лийын. Тачысе кечын Марий Эл гыч Ростовский областьышке кочкыш сатум колтат: консервым, полуфабрикатым, кондитерский изделийым, тыгак быт химийым, медицин инструмент-влакым. Кок регион коклаште образований сферыштат вашкыл уло. А Ростов-на-Дону гыч Марий Элышке комбайн, кушкыл уӥым кондат. Ончыкыжым вашкылым кумдаҥдышаш улыт.
Йочан усталыкшым муро полшымо дене шуараш. «Марий йоча муро» проект почеш йоча-влаклан марий муро сборник савыкталтын. Республикысе Марий тӱвыра рӱдерын проектшым илышыш шыҥдараш «Россий марий-влак» федерал калыкле-тӱвыра автономий полшен. Йоча муро-влакым «Юкече» йоча вокал да «Падыраш» фольклор ансамбль-влак йоҥгалтарат.
