Республикыште эн сай школ столовый ден школ столовыйын эн уста поваржым ойыреныт. Оласе школ коклаште ‒ Бауман лицейыште. Район-влак коклаште ‒ Куженер районысо Руш Шой школышто. Эн устан кочкышым Бауман лицейын поварже Светлана Пукемова ямдыла. Тений Россий кӱкшытан конкурсын регионысо этапышкыже 13 школ ушнен. Участник-влак кочкышлан технологический картым ямдыленыт, фото да видеоматериал дене пойдареныт  да «Кулинарный баттлыште» шке моштымашыштым тергеныт: шагатат пеле жапыште шыл гыч да пакча-саска гыч кок тӱрлӧ кочкышым ямдыленыт. Сеҥыше-влак умбакыже шке мастарлыкыштым федерал кӱкшытышто тергаш тӱҥалыт.

Советский районысо больницышке у цифровой маммографым конденыт. Эмлымверын пашаеҥже-влак тидым чынжымак кугу событийлан шотлат. Вет але марте ты аппаратын укежлан кӧра еҥ-влак Йошкар-Олаште але У Торъялыште тергалтыныт. Мут толмашеш, Советский районышто кодшо ийын шӧр тум тергыме годым 8 ӱдырамашын тӱҥалтыш стадийыште улшо пуалмашым  муыныт. Тачысе кечылан поликлиникылаште тиде аппартын кӱлешлыкше чот йодмашан.

Марий Эл вуйлатыше Юрий Зайцев чоҥымаш отрасль ончылно кӱлешан задачым палемден. Республикысе чоҥышо-влакын гильдийыштышт 2022 ийысе паша лектыш дене палдареныт. Нунын дене регион вуйлатыше шкежак вашлийын мутланен.

Йошкар-Оласе пӧртвиктарыше компаний-влак йоча площадке-влакым 1 июнь марте шотышко кондаш тӱҥалыт. Изирак архитектур формо-влакым тӧрлаш да шотышто кучаш кӱлеш. Кызыт пӧртвиктарыше компаний-влак нуным чиялтат, тӧрлат, кӱлмӧ семын уэмдат. Пашам 1 июнь марте мучашлышаш улыт. 

Еҥ-влак вес ийын тӱзатышаш кумдыкым ойырен кертыт. 15 апрель гыч Йошкар-Олаште, Волжскышто, тыгак Медведево поселкышто «Оласе йӧнан средам ыштымаш» проект дене кумдык-влакым ойырат. Йӱклымашым Кече дечын жапым ончыктышо шагат воктечын тӱҥалыныт. 

Волжский районысо Сотнур школышто «Геройын партыжым» почыныт. Нуно специальный военный операцийыште порысым шуктышо-влак Руслан Александров да Максим Микутовлан пӧлеклалтыныт. Тыге самырык-влак шочмо элым йӧраташ, утларак пагалаш кумылаҥыт. «Геройын партыже» акций Российын чыла регионышто эртаралтеш. Лӱман парте-влакым тӱрлӧ сарыште лийше герой-влакым чапландарен тунемме верлаште вераҥдат.  

 «Сосновая роща» интернат-пӧртыштӧ лишыл жапыште реконструкций тӱҥалеш. Тидлан 201 миллион теҥгем ойырат. Зданийым кок ий олмыкташ тӱҥалыт. Тений идалык мучашлан икымше корпусым ачален шуктат, кызыт тушто илыше-влакым кокымшо корпусышко кусареныт. Паша да социал аралтыш министр Марина Островская палдара, интернатыште мебель, оборудованийым уэмдат, тыгак зданийым кӧргӧ могыр гычат, тӱжвачынат тӧрлат да уэмдат. 

Йошкар-Олаште Вознесенский кӱварым тӧрлымӧ паша шолеш. Ты паша сентябрь марте шуйна. Сандене автомашинам виктарыше-влакым тидым шотышко налаш йодыт. Кӱварым федерал программе почеш тӧрлат, тидлан 246 миллион утла теҥге оксам ойыреныт. Тыгак тений Анциферов, Волков, Воин-Интернационалист-влак, Орай, Яков Эшпай, Водопроводный да Красноармейский уремлаште корным ачалаш тӱҥалыт.

Шке пӧртым шукырак чоҥат. Ӱмаште Марий Элыште 2021 ий дене таҥастарымаште шке пӧртым 55 процентлан шукырак чоҥеныт. Тиде Россий Банкын аналитикше-влакын уверышт. 2022 ийыште мемнан кундемыште 435 тӱжем квадрат метр илымверым ыштеныт, тиде тылеч ончычсо пагыт дечын 17 процентлан утларак. Весымат палемдат, ипотекылан йодмаш 16 процент нарылан шагалемын.