Ӱдырамаш-шамыч таҥасеныт. Россий ДОСАФ-ын Йошкар-Оласе технический рӱдержын автодромыштыжо «Автоледи Марий Эл -2020» таҥасымаш эртен. Тушко транспорт средствым виктарыме шотышто удостоверениян ӱдыр да ӱдырамаш-влак ушненыт. Нуно теорий палымым тергеныт. Тидыже корнышто коштмо правил дене кылдалтын. Конкурсышко ушнышо-влак скоростной маневрированийым эртеныт.
Колонийыште противочумный костюмым ургат. 3-шо номеран исправительный колонийын ургымо цехше у изделийым - противочумный манме костюмым ургаш тӱҥалын. Таче кечылан жаплан эрык деч посна кодшо еҥ-влак 5 тӱжем утла комплект тиде вургемым ургеныт, кызыт учреждений вес партийлан ойыпидышым ышта. Ончыкыжым колнийын ургышо цехыштыже йолчиемлан сумкам ургаш шонат. Тидлан тыште кӱлеш оборудований ситышын уло. Цехлаште тиде пашам шукташ ургымо машина, оверлок, полдышым ыштыше машина, кройкым ышташ вашкӱзӧ, парогенератор дене шымартыме оҥа-влак улыт.
Республикыште КОВИД-19 вирус дечын вакцинын икымше партийжым конденыт. Тидын нерген тазалык аралымаш министерстве увертара. Кызыт коронавирус дечын привикым ышташ ямдылалтыт. Вакциным 18 гыч 60 ияш марте еҥ-влаклан шындат. Привикым эн ончыч медик, педагог, социал пашаеҥ-влаклан ышташ палемдат. Ешарыман, республикыште грипп дечын вакцинироватлат.
Марий Эл гыч татар йылмым туныктышо россий конкурсышто шке вийжым терген. Финал Москваште лийын. Конкурсын российысе этапышкыже элнан 12 регионжо гыч 12 туныктышо чумырген. Нуно татар йылмым туныктымо ойыртем дене палдареныт. Марий Эл гыч конкурсышко Морко районысо Нурӱмбал школышто татар йылмым да литературым туныктышо Хатиуллина Гольсара Шарифулловна каен.
Советский поселкысо 3-шо номеран школын физикым туныктышыжо Ольга Костюнина «Идалыкын туныктышыжо» конкурсын сеҥышыже. «Идалыкын воспитательже» номинацийыште - Звенигово оласе «Светлячок» йочасадын педагог-дефектологшо Татьяна Александрова ойыртемалтын. «Марий йылмым туныктышо» конкурсышто Параньга район Куракино школышто тӱҥалтыш классым туныктышо Светлана Максимова сеҥен.
Марий Элыште верысе инициативе проект-влак конкурсым иктешленыт. Проект-влакым вес ийын илышышке пурташ тӱҥалыт. Конкурсышко 87 йодмаш пурен. Нунын радамыште – Кугу Отечественный сарыште лийше-влакым шарныме вер, парк, скверым тӱзатымаш, корным, йоча площадке-влакым ыштымаш до моло проект. 2021 ийлан верысе инициативылан полыш программылан республикыште 17 миллион теҥге ойыралтеш.
Виктер пӧртыштӧ Юринысо паромный переправым чоҥымо йодышым каҥашеныт. Республикын районжо-влакым вияҥдаш инвестиций полшен кертеш. Тидын шотышто совещанийым регион вуйлатыше Александр Евстифеев эртарен.
15 сентябрьыште «Театральное Приволжье» фестиваль тӱҥалын. Декабрь марте регионышто ойырымо этап эрта. Фестивальышке самырык да студент-влакын коллективышт ушнат. Нуно шке пашаштым ончыктат, регионысо этапыште сеҥыше коллектив-влакын пашаштым социал воткылыште вераҥдат.
«Петырыме режимыште» пашам ыштымылан 850 наре социал пашаеҥлан стимулирующий выплатым жапыштыже тӱленыт. Тидын нерген республикын калык илышкылым саемдыме шотышто министр Марина Островская увертарен. Апрель тылзыште социал учреждений-влак «петырыме режимышке» пашам ышташ кусненыт. Республикыште 12 тӧнеж, а тиде «Таир», Шоя-кузнецово, Кундыштӱр, Кожласола, интернат-влак, Савинысе йоча пӧрт, Волжскысо социал-реабилитаций рӱдер шке паша радамыштым вашталтеныт.
«Петырыме режимыште» пашам ыштымылан 850 наре социал пашаеҥлан стимулирующий выплатым жапыштыже тӱленыт. Тидын нерген республикын калык илышкылым саемдыме шотышто министр Марина Островская увертарен. Апрель тылзыште социал учреждений-влак «петырыме режимышке» пашам ышташ кусненыт. Республикыште 12 тӧнеж, а тиде «Таир», Шоя-кузнецово, Кундыштӱр, Кожласола, интернат-влак, Савинысе йоча пӧрт, Волжскысо социал-реабилитаций рӱдер шке паша радамыштым вашталтеныт.
