Марий кундем гыч делегаций  икмыняр фестивальышке миен. Угарман кундем Старые Краи ялыште «Усталык Чинчышер» фестиваль лийын. Тиде ялым марий-влак Оштамоц маныт,  «Ошта» – эҥерын лӱмжӧ,  «моц» - мучаш.
 Тиде села Марий кундем деч моткоч тораште верланен гынат, тысе калык шочмо йылмыжым да йӱлаже-влакым арала, марий улмыж дене кугешна. Марий Эл дечын тушко профессионал да самодеятельный артист-влак миеныт. Регион-влак кокласе фестиваль тений онлайн эртен, тыгодым фестивальым 19 сентябрьыште иктешленыт. 20 сентябрьыште Набережные Челны олаште «Ме ик пушеҥгын укшыжо» улына. Финн-угор тукымын фестивальже лийын. Тушто тӱрлӧ калык-влакын йӱла, тӱвыра ойыртемышт дене палдареныт.  Марий тӱвыра поянлыкым Татарстан кундемыште илыше марий-влак ончыктеныт. Марий Эл гычат тушко тыгак уна-влак миеныт. 

 Шкетан лӱмеш марий кугыжаныш драме театр  финн-угор театр-влакын «Майатул» фестивальыштым вашлиеш. 13 гана эртаралтше кугу театр пайремышке тений  Мордовий, Удмуртий, Коми республикыла, Коми-Пермяцкий, Хант-Манси автономный округла гыч коллектив-влак толыт. Фестивальыште Марий Элын ныл театрже шке  пашажым ончыкта. Изарнян, 24 сентябрьыште, М.Шкетан лӱмеш марий кугыжаныш драме театр «Окса тул» комедийым аклаш луктеш, Марий самырык театр «Марпа. Рошто Поран» драмым темла, республикысе курчак театр фестивальын унаже семын «Йӱд орол» этнофутуристический мистерийым ончыкта.

«Куржам мый, куржам» лӱман книгам журналист Елена Эшкинина чумырен. Тиде книга корнысо дневник семын келыштаралтын. Тудо сутка мучко куржталме дене тӱнямбал кӱкшытан спорт мастер, Российын сулло спорт мастерже Римма Алексеевна Пальцева нерген. Чолга ӱдырамаш, тале спортсмен, поро ава-кова тӱрлӧ элыште лийын, таҥасымашлаште вийым терген.

Республикыште грипп дечын вакцинаций умбакыже шуйна. Йошкар-Олаште мобильный пунктлаште йоча-влакланат прививкым ыштеныт. Ныл кече жапыште эртыше тиде акцийыште 75 йочам грипп дечын вакцинироватленыт. Йошкар-Оласе йоча эмлымвер тиде йӧным илышышке икымше гана пуртен ончен. Прививкым лӱмын келыштарыме транспортышто Республикысе курчак театр да Самырык-влакын полатышт воктене ыштеныт. 

Йошкар-Олаште школ, йочасад да эмлымверлашке шокшым пуэныт. Шуко пачеран пӧртлаште гын, кызыт эше йӱштӧ. Южын температурыжо вич кече почела 8 градус деч левырак лиеш гын, пачерлашкат шокшым пуат. Тыгодым котельный-влак олтымо жаплан ончылгоч ямдылалтыныт. 

Марий Элыште идалык жапыште инфляций 3,7% шуын. Тидын нерген Россий банкын регионысо виктемже увертара.  Юл кундемысе федерал округысо регионлаштат тынарак кушкын. Российыште тичмаш ончалмаште инфляций – 3,6%. Тидлан кӧра, сату да калыклан темлыме услуго мыняр-гынат шергештын.

Мутлан, август тылзыште  пакчасаскалан ак ӱмашсе гаяк  лийын, лач помидор шергештын.  Моло саскалан ак кушкын. Амалже -  вес элла гыч тудым шагалрак конденыт, а  йодмаш пандемий тӱҥалтыште кугу  лийын. Поснак цитрус саскалан. Шыллан ак кӱзен. Тидым аналитик-влак теве кузе умылтарат. Еҥ-влак кеҥежым шке кундемыштак каненыт, садланак пӱртӱсышкӧ утларак лектыныт.

Национальный проект-влак почеш чоҥымо объект-влакым тӱткын тергаш кӱлеш. Тидын нерген лӱмын погымо совещанийыште регион вуйлатыше Алекандр Евстифеев палемден. Промышленность, экономике вияҥмаш да ужалымаш министерстве тиде йодышым эре шке тӱткышыштӧ куча. 

Тазалыкаралтыш министр Марина Панькова палемден: республикыште тений идалык мучаш марте 17 фельдшер-акушер пунктым чоҥышаш улыт. Нунын проектыштым ыштен шуктеныт, сентябрь  мучаш марте тыгак чыла контракт ямде лийшаш. «Тазалыкаралтыш» национальный проект дене келшышын тений тыгак Йошкар-Олаште вертолет площадкым ыштен шуктат. Тидлан республикысе бюджет гыч 8 миллион теҥге ойыралтеш. 

Марий Элышке шокшо игече пӧртылеш. Лишыл кечылаште юж 14 гыч 18 градус марте ыра, вӱргечын ояра, да южын кокла температурыжо 20 градус наре лийын кертеш. Синоптик-влакын ончылгоч палдарымышт дене тыгай игече сентябрь мучаш марте озаланаш тӱҥалеш. Тиде кечылаште шыже игече теле жапышке кусна. Кож пӱгыльмӧ чот шуко гын – вес ийын пурса да кияр сайын шочыт. Пызлыгичке шуко гын, шыже ночко, а теле йӱштӧ лиеш – маныт.

Тений шыжым республикыште чодырам шындыме икмыняр акций лиеш. Тиде мутлан, «Ужар Россий», «Чодырам аралена», «Марий Эллан 100 ий темме» лӱмеш. Пытартышышкыже деке регионышто илыше, кучем орган-влакын еҥышт, студент, школышто тунемше, волонтер да чодыра пашан ветеранже-влак ушнат. Акций тиде арняште Куяр лесничествыште лиеш. Тӱҥ шотышто шыжым 30 гектар кумдыкышто изи пушеҥгым шындат.