Ик суткаште республикыше коронавирус да тудын лийын кертме лӱдыкшӧ дене инфекционный стационарлашке 50 пациентым пыштеныт. Тидын нерген тазалык аралымаш министерстве палдара. 22 сентябрь эрлан Йошкар-Оласе больницын инфекционный стационарыштыже 176 пациент эмлалтеш, республикысе йоча больницыште 9 йоча.
Марий Турек район Марий Пыламарий селаште у ФАП-ым чоҥат. Тудым тошто оралте олмышто ыштат. Тиде ялысе ФАПым 25 ий утла Алевтина Андреевна Тихомирова вуйлата, Ольга Борисовна Кучергина 11 ий фельдшерлан тырша.
Школ да ешартыш шинчымашым пуышо учреждений-влаклан республикын правительствыже оборудованийым ойырен. Тиде компьютер технике, лазер ден графировко дене пашам ышташ станок, турист да художественный пашалан, робототехнике дене оборудований. Чыла тидым «Образований» национальный проектын «Кажне йочан сеҥымашыже» федерал проект дене налыныт.
Республикын 100 ияш лӱмгечыжлан ший оксам луктыныт. Александр Евстифеев Марий Эл республикыште Россий Банк виктемын вуйлатышыже Николай Жуков дене вашлийын. Тушто Марий автономийын 100 ийжылан лӱмын лукмо ший оксам ончыктеныт.
Валерий Чеботкинын выставкыже почылтын. Тений сӱретчылан 60 ий. Тудын пашаже-влакым Республикысе сӱретсымыктыш тоштерын кокымшо пачашыштыже ужаш лиеш.. Выставкыште 100 утла паша. Нуным автор тӱрло жанрыште возен. Эн шуко сӱрет живопись йӧн дене ышталтын. Книга да театр графикылан посна йыжыҥым ойырымо. Ончерыште ятыр портретым ужаш лиеш.
Российысе фольклор пайрем чыла марийым уша. Шыжа тылзын 1-ше кечынже Йошкар-Олаште российысе фольклор пайрем лиеш. Тудо Марий автономийым ыштымылан 100 ий да Пеледыш пайремым эртараш тӱҥалмылан ик курым теммылан пӧлеклалтын. Лач тиде кечын Йошкар-Олаште Марий калык погын шке пашажым тӱҥалеш. Пайрем, пандемий шарлыме лӱдыкшӧ улмо амаллан кӧра, очно да заочно эртаралтеш. Онлайн йӧн дене «Кудо», «Шокталте гармонетым», «Эх, марий вате», «Мастар кид» конкурс-влак лийыт. Конкурсант-влакын видеоштым Марий тӱвыра рӱдерын «ВКонтакте» тӱшкаштыже вераҥдат. Чарла Кремльыште 11 шагатлан пайремым торжественно почыт. Тудын деч вара «Эх, кушталтена мо вара…» йыр куштымаш лиеш. «Калык чон» пайрем концертыште Марий Элысе да регионласе фольклор коллектив-влак шке мастарлыкыштым ончыктат. 15 шагатлан «Марий Эл» кугыжаныш куштышо ансамбль тӱрлӧ кундемлаште илыше марий калыкын куштымашыштым ончыкта. Тылеч вара сценыште марий эстрадын шӱдыржӧ-влакын концерт программышт эртаралтеш. Фольклор пайрем Марий кас дене мучашлалтеш.
Морко районышто титак деч посна репрессийышке логалше-влакым шарныме лӱмеш обелискым почыныт. Тудым Чӱкшӧ курык воктен верланыше Кугу Шоръял ялеш шындыме. Чӱкшӧ курык – Марий Эл Республикын эн кӱкшака верже, сандене обелиск лач тиде ялеш верланаш келша манын, пунчалым ыштеныт.
Кычалше отряд-влак Ржев ола воктене эртарыме экспедиций годым сар жапыште колышо салтак-влакын кап-кыл ужашыштым муыныт. Нуным пужен тойымашке Марий Эл гычат делегаций миен. Колышо салтак-влак коклаште мемнан землякна Михаил Гусеват лийын. Тудо Марий АССР тунамсе эше Пектубай район гыч фронтышко 42-шо ий июньышто каен. Тидын марте увер дечын посна йомшылан шотлалтын. Кычалше-влак салтакын родо-тукымжымат муыныт. Нунылан колышо кап пелен мумо икмыняр арверым пуэныт. Нине арвер-влак ончыкыжым Какшанмучаш школын тоштержым пойдарат.
Йошкар-Олаште нылле наре «наливайкым» петырат. Шочмын республикыште у закон вийым налын. Тудын дене келшышын, общепит заведенийлаште аракам ужалыме шотышто ешартыш чарак-влак улыт. Законышко шке кидпалыжым Марий Эл вуйлатыше Александр Евстифеев пыштен.
Марий Элышке тений 8 тылзе жапыште 10 тӱжемат 973 еҥ толын, а 11 тӱжем утла каен. Тидын нерген Маристат палдара. Вес элла гыч 840 еҥ мемнан регионышко толын гын, ик тӱжем утларак каен. 2020 ий январь-август тылзылаште республикыште илыше-влакын чотышт миграций могырым 59 еҥлан шагалемын.
