Оршанка рӱдӧ эмлымверыште республикын рӱдӧ олаж гыч коронавирус да тудын лийын кертме дене черле пациент-влакым эмлаш тӱҥалыт. Тазалык аралымаш министерствыште журналист-влаклан брифингым эртареныт. Тушто республикыште коронавирус инфекцийын шарлымыже нерген увертареныт. 6 октябрьлан республикысе инфекционный 8 стационарлаште 712 койко-вер уло, 82% айлыме. Норматив дене резервыште 20% вер лийшаш. Садланак Медведево рӱдӧ эмлымверыште коронавирус инфекций дене черле-влаклан ешартыш 42 верым ыштат, а лишыл жапыште эше 20 верлан шукемден кертыт. 

Йошкар-Олаште Машиностроителей уремын ужашыжым тӧрлат. Ушештарена, нацпроект дене тиде уремым ончылгоч ачалаш тӱҥалыныт. Кызыт Красноармейский гыч Водопроводный урем марте пашам шуктат. Подрядный организаций-влак канализаций таве-влакым капитально олмыктеныт, тыгак асфальтын кӱшыл лончыжым пыштеныт. Тидын дечын вара тротуар, остановко, парковко-влакым ыштат. Тений нацпроект дене 5 уремым тӧрленыт: Пролетарский, Комсомольский, Красноармейский, Дружба. 

Вес ийын Йошкар-Олаште икмыняр вере кундемым тӱзатат. Нунын радамыште Глезденев лӱмеш сквер. «Илымвер да оласе среда» нацпроектын «Йӧнан оласе среда» федерал проект дене вес ийын. Рӱдӧ паркын кечывалвел-касвел ужашым тӱзатышаш улыт. Тыгак индешымше микрорайонышто «Планета» ужалыше рӱдер шеҥгелне скверым ышташаш улыт. Тудлан Павел Глезденевын лӱмжым пуаш палемдыме, туштак Марий Элын 100 ийжылан монументым вераҥдат. 

У тунемме ийым у класслаште тӱҥалыныт. Йошкар-Олаште 7-ше номеран школым тӧрленыт. 1 октябрьыште кугурак класслаште шинчымашым погышо-влакын уэмдыме корпусышко толыныт. Зданий ачалымаш дечын вара тӱрыс вашталтын. Тушто столовый, спортзал, вургемым вашталтен чияш вер, кабинет-влакым ачаленыт. 

Россий Правительстве коммунал инфраструктуро объект-влакын модернизаций шотышто пилотный проектлаштым сайлан шотлен. Кодшо арняште республикыкышке Россий Правительстве Председатель Михаил Мишустин толын. Тиде арняште вич регион дене пырля Марий Эллан коммунал инфраструктурым саемдаш шийвундым ойырымо нерген увертареныт. Россий правительствын распоряженийже дене тидлан 1 миллиард утла теҥгем палемдат. Тышке 60+ программым илышышке пуртымым ешараш гын, лишыл ийлаште Юл серысе олан коммунал сферыже уэмеш. 

5 октябрьыште туныктышо-влакын пайремышт. Таче кечын республикыште 251 школлаште 6 тӱжем утла туныктышо пашам ышта. У тунемме ий Владимир Путинын темлымашыже дене национальный проект дене  икмыняр сай вашталтышым пуртен. Йошкар-Олаште у школым, республикыште «Точки роста» рӱдер-влакым 15 вере почыныт, лишыл жапыште Волжск олаште школын у корпусшым ыштен шуктат, тунемме вер-влаклан компьютерым, пищеблоклашке у техникым налыныт. 

Марий Эллан 100 ий темме вашеш Курыкмарий район гыч сӱретче Любовь Ткаченко марий вургеман ӱдырым сӱретлен да стикер-влакым ыштен. Нуным телеграмм мессенжерыште кучылташ лиеш. Ик кечыште гына стикер-влакым 200 утла еҥ шке телефонышкыжо арален. Тыгак кумылан-влак стикер-влакым вес мессенжерлаштат кучылтын кертыт. 

Озаҥ олаште Кремлевский набережныйын стендлаштыже Марий кундемын сылнылыкшылан пӧлеклалтше фотоончер почылтын. Тушто турист-влаклан республикын сылне верлажым ончыктат. Тиде выставкым республикын 100 ийже лӱмеш почыныт, тудо 30 октябрь марте шуйна. Фотоончерын стендлаштыже марий пайрем, тӱвыра ойыртем, калык сий, Йошкар-Олан сылне верлаже дене фото-влак улыт. 

«Йошкар-Ола театральная» фестиваль тӱҥалын. Ты марте тудо театр-влакын тӱнямбалсе кечышт вашеш, мартыште эртен, но тений пандемийлан кӧра, тудым шыже пагытышке кусарыме. Икмыняр кече жапыште Марий кундемыште пашам ыштыше театр-влак шке пашаштым ончыктат. Фестивальым Майоров Шкетан лӱмеш марий кугыжаныш драме театр «Йыван Кырля.Путевка в жизнь» спектакль дене почын. Фествивальыште Республикысе курчак театр, курыкмарий театр, Константинов лӱмеш руш драме, Марий самырык, Эрик Сапаев лӱмеш опер да балет театр-влак пытартыш турыгымшто ямдылыме пашаштым аклаш луктыныт. «Йошкар-Ола театральная фестивальым» 8 октябрьыште пайремлын мучашлат. Тунамак Йыван Кырля лӱмеш театр премийым кучыктат. 

Август да сентябрь тылзылаште республикыште 1192 икшыве шочын. Тиде жапыште 737 у еш шочын. Кӧргӧ политике да юстиций министерствын палдарымыже дене, 600 эрге, да 592 ӱдыр шочын. Тӱҥ шотышто ача-ава-влак шке икшывыштлан Артем, Илья, Матвей, Максим, Егор, Роман, Андрей, Иван лӱм-влакым пуэныт. Ӱдыръеҥ-влаклан гын Анна, София, Екатерина, Мария, Ева, Елизавета, Арина, Ксения, Виктория. Шуэн вашлиялтше лӱмымат пуэныт. Тыге мутлан Адам, Аксар, Аким, Данис, Евсей, Замир, Мирослав, Серафим, Стефан, Сэм, Тихон, Тихомир.