Самырык амалкалче-влак экономикым вияҥдат. Марий Элыште «Российын самырык предпринимательже» конкурсын регионысо этапше эртен. Конкурсышко тений 20 йодмаш пурен. Нунын гыч куд еҥым сеҥышылан шотленыт. Ынде нуно Уфаште эртыше конкурсышто финалыште шке пашаштым ончыктат. Тений амалкалче-влакым икмыняр номинацийыште акленыт.
Российыште да Марий Элыштат йӱклымаш кече эртен. Марий Элыште шым округ дене муниципал кӱкшытан сайлымаш лийын. Тыге мутлан, Йошкар-Олаште утларак йӱкым Вера Вертинская да Илья Кулалаев погеныт. Волжскышто Елена Баранова верч утларак еҥ йӱклен. Марий Турек районышто ик тӱжем утла еҥ йӱклымашке ушнен, да тушто Мария Погудина сеҥен. Медведево районышто Юрий Ходырев, Морко районышто Алексей Катченко, У Торъялыште Аркадий Семенов моло дечын утларак йӱкым поген. Ончылгоч йӱклымо кечылаште да сайлымаш кечын избирательный комиссийыште 70 пашаеҥ да 72 эскерыше лийын.
Курыкмарий районышто у водонапорный башньым ыштат. Тидлан республике Правительствын резерв фондшо гыч 2 миллион наре ойыралтеш. Тидын шотышто постановленийым регион вуйлатыше Александр Евстифеев пеҥгыдемден. Ойырымо шийвундо дене Курыкмарий Йоласалыште у водонапорный башньым ыштат. Тушто улшыжо тоштемын, аварийныйлан шотлалтеш. Садланак, у объект кӱлеш. Тудын дене кундемыште илыше-влакын пӧрталшке да социал объектлашке яндар вӱд толшаш. Тиде кундемыште 500 утла еҥ ила. 
Республикыште школ да йочасад-влакым финанс-кредит организаций полшымо дене чоҥаш палемдат. Регион вуйлатыше Александр Евстифеев тиде йодышым Марий Элыште Сбербанк отделенийын вуйлатышыже дене каҥашен. Тидын шотышто ойпидыш сай лектышым пуа гын, 2022 ий марте Килемар район Кугу Памъялыште у школым ыштен шуктат. Кызыт тудо кундемыште школ тошто, посна шогышо вич оралтыште верланен, эсогыл телым коҥгам олтат. Таче кечын тушто 60 йоча тунемеш, 20 икшыве йочасадышке коштеш. Концессий йӧн дене тунемме вер-влакым вес регионлаштат чоҥат. 
Эстонийыште «Пӱртӱсыштӧ шнуй вер-влак» тӱнямбал кӱкшытан фотоконкурсым увертареныт. Тиде конкурс латкумшо гана эрта. Тудо тӱрло калыкын аралыме да ойыртемалтше вержым ончыкташ, аралаш, еҥ-влакым нине верлашке миен толаш кумылаҥдаш эртаралташ. Конкурсышко фотограф-влак тӱҥ шотышто тушко шнуй ото, пушеҥге, памашын фотосӱретлажым колтат. Тӱҥ премий 1000 евро, урал тӱшкашке пурышо калыклан-премий 300 евро, тыгак 16 ияш марте фотограф-влаклан премий 200 евро. Тидын дене пырля посна премийымат палемдат. Фотосӱретым 15 октябрь марте вучат. Фотоконкурсым эстонийысе «Hiite Maja» ушем эртара. Ешартыш уверым тудын сайтыштыже муаш лиеш.
Финн-угор калыкын усталыкшым ончыктышо «Финно-угорский транзит» фестиваль тений шке географийжым кумдаҥда. Тений икмыше гана фестиваль Тверской, Нижегородский, Рязанский да Вологодский областьлаште лиеш. Тений мемнан республике тиде фестивальым шке деныже огеш вашлий, но Марий Эл гыч коллектив-влак Нижний Новгород олаште эртыше концертышке каят.
Кеҥежын пытартыш тылзыштыже республикыште 419 у еш шочын. Август тылзыште Марий Элысе ЗАГС пӧлка-влак йоча шочмаш дене кылдалтше 556 актым пеҥгыдемденыт. Ача-ава – влак шке ӱдыр-влаклан утларакшым Анна, Екатерина, София, Арина, Елизавета, Мария, Милана лӱмым пуэныт, эрге-влаклан – Илья, Андрей, Матвей, Егор, Тимофей, Максим, Артём лӱм-влакым.
Кодшо кечылаште 39 тӱжем утла дозо «Совигриппым» конденыт. Тидын нерген Марий Эл республикыште Роспотребнадзор виктем увертара. Вакциным йоча поликлиникылашке колтеныт. Йочасад да школышко коштшо ӱдыр-рвезе-влаклан иммунизацийым ыштат. Кугыеҥ-влаклан вакцинын партийже эше август мучаштак толын, кызыт тудым ышташ тӱҥалыныт. Тений республикыште 410 тӱжем утла еҥлан грипп дечын прививкым ыштышаш улыт.
Марий Эл Кугыжаныш Погын черетан 12-шо сессийышке чумырген. Депутат-влак икмыняр йодышым каҥашат, законпроект-влакым ончен лектын, пеҥгыдемдышаш улыт. Тидын коклаште республикысе бюджетышке пуртымо вашталтыш, сайлымаш закон-влаклашке ешартыш, тыгак аракам ужалымашым чарымаш дене кылдалтше закон проектым каҥашат. Тидын дене пырля моло проектымат пеҥгыдемдышаш улыт.
Тӱвыра, печать да калык-влакын пашашт шотышто министерстве «Марий Элын идалыкын книгаже» республикысе конкурсым увертарен. Тушко республике, мунициапал, книгам шке вий дене лукшо-влак ушнен кертыт. Конкурсышко 2019-2020 ийлаште, тыгак Марий Элын 2018 ийысе книга конкурсышто ончыкталдыме книга-влак пурен кертыт. Паша-влакым С.Чавайн лӱмеш книгагудышто 10 декабрь марте вучат. Конкурсым Марий тиште кечын 10 декабрьыште иктешлат. Тений тиде конкурс 9 гана эрта.
