Чот нелын черле-влакым ончаш туныктышо школ-влак пашам ышташ тӱҥалыныт. «Демографий» нацпроект дене келшышын, «Старшее поколение» регионысо проект почеш социал обслуживаний рӱдер да социал обслуживаний стационарлаште «Ончаш туныктымо школ»- «Школы по уходу» проект шыҥдаралтеш. Тудын полшымыжо дене илалше, чот черле еҥ-влакым ончаш туныктат. Школышто теорий шинчымашым пуат, тыгак тудым практикыште пеҥгыдемдаш лиеш. Занятий-влак посна, тыгак тӱшка дене эртаралтыт. Тидлан Йошкар-Оласе медицин колледж, республикысе психиатрический больнице, тыгак социал пашаеҥ-влак полшат. Школлаште шинчмышым пойдараш кумылан-влак илыме вер пелен социал обслуживаний рӱдерлашке лектын кертыт.

Сентябрьын икымше пелыштыже «Инцидент Менеджмент» системе социал кылыште 500 утла йодмашым налын. Тиде августын тыгаяк пагытше дене таҥастарымаште 59 вуйшиймашлан шукырак. Эн шуко йодыш Йошкар-Ола да Волжск оласе администрацийышке пурен. Нуным кундемым виктерыме рӱдерын специалистышт   профильный ведомствлышке  колтат. Сентябрьыште улшо теме-влак нерген ойлаш гын, корно, кумдыкым тӱзатымаш, образований, ЖКХ, тазалыкаралтыш.

Марий Элысе рӱдӧ сайлымаш комиссий республикыште эртыше йӱклымаш дене иктешлымашым ыштен. Кум кече жапыште йӱклымашке 46,11% еҥ-влак толыныт, тиде 245 тӱжем наре еҥ. Республикысе рӱдо сайлымаш комиссий шке заседанийыште сайлымашын иктешлымашыжым пеҥгымден. Ик мандатан округ дене Сергей Казанков эн шуко йӱкым поген.  

Марий Элыште 8 тылзыште 3 тӱжем утла пачерым чоҥеныт. Кодшо ийын тиде жапыштак республикыште 18% шагалрак илымверым ыштеныт ыле. Тений кундемыштына 500 утла шке пӧртым нӧлтеныт. Тӱҥ шотышто илымверын кокла кумдыкшо 76 квадрат метр марте. Шуко пачеран пӧртым республикыште Йошкар-Ола, Звенигово да Медведево районлаште ыштеныт. 

«Демографий» нацпроектын «Спорт-илышын нормыжо» федерал проект дене келшышын, Оршанка поселкышто изирак спорт площадкым ышташ оборудованийым налыныт. Кызыт тудым Оршанка школ кумдыкышто вераҥдат. Ончыкыжым тыште тунемше-влак веле огыл, тыгак чыла кумылан-влак физкультур дене шуралтын да ГТО нормативым сдатлен кертыт. Волжск олаште почмо сынан  физкультур-спорт площадкым ыштат. Кызыт тушто оборудованийым вераҥдат, футбол пасушко искусственный шартышым пыштат.

Искусствовед Олег Михайлович Герасимов «Марий сӱан муро-влак» книгам луктын. Тиде савыктышыште тӱрлӧ кундемлаште илыше марий-влакын шӱдӧ утла муро ден мурсемым погымо. Нине муро-влакым шке жапыштыже ятыр шымлызе – Валериан Васильев, Яков Эшпай, Дмитрий  Кульшетов да молат савыктен коденыт. Тыгак книгашке тӱрлӧ фондышто аралалтше да пытартыш жапысе экспедиций-влакын материалыштым пуртымо. 

Вес книга – Валентина Изилянован поэзий сборникше. Автор «Пеледышем-влак» книгашке тӱрлӧ жапыште возымо почеламутшо-влакым пуртен. Пеледыш – авторын илыш метафоржо, сынже, А тудо тӱрлӧ лиеш: садыште, пасушто кушшо, олыкысо, чодырасе, эсогыл шонен лукмо пеледыш-влакат: мурпеледыш, шинчавӱдпеледыш, йӧраты­маш­пеледыш...

Марий Элысе предприятий-влак кундемысе супермаркетлашке шукырак киндым колташ тӱҥалыт. Тидлан амалым шочмын пошкудо регионысо предприятийын киндым шагал колтымыжо ыштен. Чебоксарысе предприятийыште производственный линийым тӧрлат. Тидым шотышко налын республикыште киндым ыштыше предприятий-влак утларак кӱэшташ тӱҥалыныт. Тидын нерген экономике вияҥмаш министерстве, калыкын йодмашыжым шотышко налын, вашмутым пуа.

Эше ик район автоклуб дене пойдаралтын. Ты гана Медведево тӱвыра пашаеҥ-влак тудым куан дене вашлийыныт. Кодшо кечылаште Куженер районышко толын. У автоклуб артист-влаклан мероприятийым эртараш эшеат сай  йӧным пуа. Мобильный концерт залым тул да йӱк, видеоборудований дене шыҥдарыме. Автоклуб кинозал, тыгак концерт сцене лийын кертеш. Ушештарена, тений «Культура» нацпроект дене келшышын, республикышке Оршанка, Параньга, Волжский, Килемар, Куженер районлашке тыгай рӱдер-влакым конденыт. 

Йошкар-Олаште Сеҥымаш бульвар да Рябинин лӱмеш уремыште 11 тошто пӧртым пужат. 77-ше кварталыште  кумдык-влакым комплексно вияҥдаш тӱҥалыт. Тиде вер – Машиностроитель-влак, Рябинин, Ленинский проспект, Сеҥымаш бульвар дене ойыралтеш. Кызыт  -  пӧрт-влакым пужаш да еҥ-влаклан илымверым пуаш, у пӧртым чоҥаш да кумдыкым тӱзаташ подрядчикым ойырат. Ыштыме ойпидыш дене келшышын, тудо аварийныйлан шотлалтше 13 пӧртым пужен, у илымверым чоҥышаш.  

Йошкар-Олаште вич ийыште «Оласе йӧнан средам ыштымаш» федерал проект дене келшышын 21 кумдыкым тӱзатеныт. Тиде программе дене Тазалык аллей, Сеҥымаш парк, Чавайн бульвар, Свирин лӱмеш да Глезденев лӱмеш сквер-влак у тӱсым налыныт. Ушештарена, тений еҥ-влак российысе платформышто проект-влак верч йӱкленыт, шым проект эн шуко йӱкым поген, нуным вес ийын тӱзаташ тӱҥалыт.