Марий Турек районысо Сардаял школышто шинчымашым погышо-влак кумшо четвертьым у тунемме верыште тӱҥалын кертыт. 600 утла еҥан ялыште школым 120 ий ончыч чоҥымо, лишыл жапыште икшыве-влак у оралтыште шинчымашым погаш тӱҥалыт.
Идалык тӱҥалтыш гыч республикыште 500 утла тошто илымвер гыч еҥ-влакым кусарен шуктымо, 403 еҥ у пачерышке куснен. Кодшо кечылаште Медведево районышто 22 еҥ у пачеран лийын. Регионысо чоҥымаш министерствыште палдарат: октябрьыште Гагарин уремыште 52 пачеран у пӧртым нӧлтен шуктеныт, тушто 22 пачерым аварийный пӧртла гыч кусарыме еҥ-влаклан пуэныт. Ныл ий жапыште 2023 ий марте программылан 3 миллиард утларак теҥге ойыралтын.
Полиций пашаеҥым «Утарымылан» медаль дене суапландареныт. Росгвардийыште тыршыше полицийын мландший сержантше Денис Кормилкин тений Юл эҥерыште пуш дене коштмо годым туткарыште логалше 10 еҥым утарен. Росгвардийыште службым эртыше июньышто ешыже дене Юлышто канен.
Пандемий чер ваштареш кучедалмым чылан шотыш огыт нал. Тидланак кӧра, кундемыштына уэш рейдым эртараш тӱналыныт. Кодшо кечылаште Йошкар-оласе ӱп тӱредме вер ден моторлык салон-влакым тергыме.
Инфекционный стационарлаште эше 90 верым ешарыме. Тидын нерген тазаларык аралтыш министерстве увертара. Кече еда эмлымверлашке 150-160 наре еҥым ковид але тудын лийын кертме лудыкшӧ дене пыштат. Козьмодемьянск эмлымверыште ешартыш 30 верым, 1-ше номеран медсанчастьыште 60 верым почыныт. Тачысе кечын республикыште стацнионарлаште 1900 утла вер уло, тушто 300 наре вер яра. Врач-влак коронавирус дечын вакцинацийым эрташ кӱлмӧ нерген ушештарат. 25 октябрьысе данный дене келшышын, 221 тӱжем утла еҥ прививкым шындыктен.
Марий Элыште общепит йӱдым пашам ышташ огеш тӱҥал. Регион вуйлатыше Александр Евстифеев у коронавирус инфекцийым шижтарыме шотышто указышке ешартышым пуртен. Документ дене келшышын, 1 декабрь марте 23.00 шагат гыч 6.00 шагат эр марте общепитын пашажым чарыме, тыгодым йодмаш почеш кочкыш-йӱышым намиен шуктен кертыт.
Т-55 танкым реставраций дечын вара уэш Сеҥымаш паркышке пӧртылтеныт. Ты марте военный частьын, Марий машиначоҥышо заводын, тыгак чоҥымаш механизаций виктемын пашаеҥышт тудым тӧрленыт.
Оршанке поселышто изирак спорт площадкым вераҥденыт. Физкультур дене шуаралташ да ГТО нормативым сдатлаш чыла оборудований уло. Спорт дене кылым кучышо чыла кумылан-влак тиде верыште тренировко-влакым эртарен кертыт.
«Марий Эл» кугыжыныш куштышо ансамбль гастроль гыч пӧртылын. Артист-влак Италийыште «Неаполь-вулкан искусств» фестивальыште лийыныт. Тушто шке программыштым лӱмлӧ режиссер, Мариинский театр, тыгак «Марий Эл» кугыжаныш куштышо ансамбльын артистше-влак темленыт. Марий кундем гыч тора элышке 18 артист миен да ансамбльын эн ойыртемалтше номержым ончыктен. Кызыт нуно уэш репетиций-влак деке пӧртылыныт.
Кундемыштына маломерный суднын эн сай госинспекторжым ойыреныт. Смотр-конкурсым иктешлымеке, ончыл верыш Волжск оласе инспекторский участкын вуйлатышыже Федор Нефедов лектын, а Юл кундемысе федерал округышто кумшо вер дене палемдалтын. Федор Иванович тиде виктышыште 2011 ий гыч ышта. Тудын тергыме кумдыкшо 76 гектар, Куйбышевский водохранилище, 14 ер да моло вӱд объект-влак.
