Йошкар-Олаште эн сай марий конферансьем – концерт программым вӱдышым – ойырат. Республикысе почмо смотр-конкурс 27 сентябрьыште Марий самырык театрыште лиеш, 18 шагатлан тӱҥалеш. Школышто кугурак класслаште тунемше, кӱшыл да кыдалаш тунемме тӧнеж-влакын студентышт, тӱвыра учреждений, музыкальный школ да книгагудо пелен пашам ыштыше усталык коллектив-влакын еҥышт конкурсышто шке мастарлыкыштым, концерт программым вӱдымаште шке моштымашыштым ончыктен кертыт.

Йошкар-Оласе уремлашке у троллейбус-влак лектыныт. Кызыт нуно обкаткым эртат, тидын дечын вара маршрутышто кошташ тӱҥалыт. Марий Элышке Минск гыч 10 у троллейбусым конденыт. Тидлан республикын правительствыже тыршен,  шке жапыштыже кучем тиде предприятийым панкрут дечын арален кодаш полшен. У троллейбус-влак моткоч чот йӧнан улыт, транспорт уто йӱкым огеш лук, тыгак тазалык дене эмганыше-влаклан келыштаралтыныт. Республикыште ончыкыжымат транспортым уэмдаш тӱҥалыт.  

Республикыште топливно-энергетический комплексын объектше-влакым терроризм лӱдыкшыдымылыклан тергеныт. Александр Евстифеев антитеррористический комиссий да оперативный штабын заседанийжым эртарен. Росгвардий виктемын кугыжаныш тергымаш отделенийыште палдарат: республикыште топливо-энергетике шотышто 34 объект уло. 

Вес ийын Марий Элыште 233 километр корным «Лӱдыкшыдымӧ да сай качестван автомашина корно» нацпроект дене келшышын тӧрлышаш улыт. Паша план дечын ончыч кайышаш. Тидын нерген корным ыштыме пашалан пӧлеклалтше брифингыште транспорт министр Александр Герасименко увертарен. 

6 октябрьыште Марий Элысе писатель-влак ушем Марий Эл Республикын Тӱвыра, печать да калык-влакын пашашт шотышто министерствыже дене пырля «Сылнымут шыже – 2021» семинар-совещанийым эртара. Тушко самырык писатель, сылнымут ушемлашке да усталык кружоклашке коштшо ӱдыр-рвезе-влак чумыргат. Нунын возымо пашаштым икмыняр секцийыште лӱмлӧ литератор, Россий писатель-влак ушемын йыжынъеҥже-влак лончылаш тӱҥалыт. Нунын темлыме эн сай произведений-влакым «Дружба» да «Эрвий» альманахлаште, «Ончыко», «У сем», «Кече/Солнышко» журналлаште савыктат.

Йошкар-Олаште у инфекционный корпусым чоҥымо йодышым нӧлталыныт. Тидын нерген рӱдоласе погынышто кушкыжмын каҥашеныт. Корпусым чоҥаш мландым «Нагорный» микрорайонышто ойырен кертыт. Совещанийым Депутат-влак погын председательын пашажым шуктышо Виктор Кузнецов эртарен. Инфекционный корпусым чоҥаш кум гектарат пеле мландым ойырен кертыт, тудо оласе эмлымвер да шукерте огыл чоҥымо вертолетный площадке воктене верланен. Кызыт улшо инфекционный корпус тоштемын, лӱдыкшыдымылык правиллан келшен огеш тол. Совещанийым иктешлен, ончыкылык проектын дорожный картыжым ыштеныт. 

Йошкар-Олаште вес ийын «Оласе йӧнан средам ыштымаш» проект дене кумдык-влакым тӱзаташ подрядчик-влакым ойырат. Федерал проект икмыняр ий шыҥдаралтеш. Тудын дене келшышын, сквер, парк, урем-влакым тӱзатат. Вес ийын план почеш Йошкар-Олаште 7 кумдыкым шотышко кондышаш улыт. Нуным еҥ-влак шкешт ойыреныт. Еҥ-влакын йӱклымашышт почеш, Семеновко селаште Молодежный уремыште, Куйбышев, Павленко, Прохоров уремлаште  йолешке-влакын коштмо верыштым тӱзатат, «Сомбатхей» микрорайонышто пий дене кошташ верым келыштарат, Изи Какшан эҥер серым шотыш кондат. Кызыт подрядчик-влакым ойырымо аукцион тӱҥалын. 

Марий Элыште тунемше-влак шке ончыкылык профессийыштым ойырен кертыт. Республикыште школышто тунемше-влакын профориентаций шотышто «Билет в будущее» лӱман Российысе проект тӱҥалын. Платформо полшымо дене тунемше-влак шке кумылын ончыкылык профессийыште шкеныштым терген да паша нерген шукырак пален налын кертыт. Проект кышкарыште ача-ава-влакынат йодышыштлан вашештат. «Билет в будущее» проект Российын 85 регионыштыжо илышышке пура. Россий Президентын кӱштымашыже почеш тушко яра ушнаш лиеш. 

Лишыл кок ийыште республикыште аварийныйлан шотлалтше 60 утла пӧртла гыч еҥ-влакым йӧнан илымверышке кусарат. Чоҥымаш министерстве палдара, пӧртсийым ик тÿжем 600 наре еҥ палемда. Йошкар-Ола нерген ойлаш гын, тоштемше пӧртла гыч кусарыме программе дене келшышын, рӱдӧ олаште аварийный фондлан шотлалтше 20 тӱжем квадрат метр илымверым уэмдат. 2017 ий марте тошто пӧрт-влак муниципал адресный программышке пурталтыныт. Паша 4 этап дене шуйна. Икымше – мучашлалтын. У пачер-влакым 16 тошто пӧртыштӧ илыше-влаклан пуэныт. 

Параньга районын вияҥмыже, теле-шыже пагытлан ямдылалтме, вакцинаций, кундем-влакым тӱзатыме нерген регион вуйлатыше район администраций вуйлатыше Альфит Ибраев дене вашлиймаште мутланен. Тений ты кундемыште 3, 9 миллион теҥгелан ялозанлык продукцийым ыштен налыныт, кокла пашадар 26 тӱжем теҥгешке шуын.