2022 ийыште «Оласе кумдыкым тӱзатымаш» проект почеш Семеновко селан ик уремыштыже йолешке-влакын коштмо верыштым  олмыкташ палемдыме. Молодежный уремысе 4-ше гыч тӱҥалын 13-шо  номеран пӧрт марте тротуарым тӧрлышаш улыт. Тыгак Интернат уремысе автобус чарналтыме верым шотыш кондат, ешартыш тул волгыдылыкым, теҥгыл да шӱкшак кышкаш урно-влакым вераҥдат.

Чер нерген шокшо линий гоч утларак пален налаш лиеш. Роспотребнадзор увертара: 4 гыч 15 октябрь марте ОРВИ да Грипп черым шижтарыме шотышто шокшо линий пашам ышташ тӱналеш. Специалист-эпидемиолог-влак кылме чер ваштареш кучедалме, кушто прививкым ышташ лиеш, маскым чын чиен коштмо, вакциныш могай штамм пурымо да моло нергенат умылтарымашым пуат. «Шокшо линий»:  8-800-555-49-43

1 октябрьыште шыже призыв кампаний тӱҥалын. Российын Президентше призыв нерген Указым пеҥгыдемден. Тений шыжым Российын Вооруженный вийышкыже 127 тӱжемат 500 еҥ салтак радамыш ушна. Ушештарена: призыв кампаний икымше октябрьыште тӱналын, тудо 31 ше декабрь марте шуйна. Указын кокымшо пунктыштыжо – салтак, матрос, сержант да старшина-влакым демобилизоватлыме нерген ойлалтеш. Кодшо ийын октябрь гыч декабрь марте армийыш 128 тӱжем еҥым налме, Марий Эл гыч-700 утла еҥ салтак радамыш ушнен.

Шӧр гыч ыштыме кочкыш йӧрварын маркировкыжо лийшаш. Тыгай вашталтыш 40 сутка деч утларак аралалтше продукцийлан пурталтеш. Марий Элыштына шӧр кочкышым  ыштыше 11 предприятий уло, нуно чыланат «Честный знак» системыште регистрацийым эртеныт. Тӱҥ шотышто, кызыт производствышто маркировкым кучылтмашын кумшо этапшылан ямдылалтыт, кӱлеш оборудованийым налыт.

Марий-влак нерген Латвийыште кинорежиссер Алексей Алексеев палдарен. Тушто Финн-угор калыкын кечыже эртен. Финляндий, Эстоний, Венгрий, Латвий гыч толшо-влак родо-тукым калыкнан  тӱвыра илыш ойыртемже, шуктен толмо илыш йӱлаже, пӱртӱс дене кылым кучен моштымыжо да моло нергенат ойленыт. Тыгак пайремым фольклор программе сӧрастарен. Латвийыште родо-тукым калык дене кылым кучымашлан кугу верым ойырат. Тиде гана Финн-угор калыкын кечыже Турайда олаште  тоштер-заповедникыште эртен. Тушто Алексей Алексеевын «Угинде» фильмжым ончыктеныт, тыгак кинорежиссер марий куштымаш дене мастарлык классым эртарен. 

Москва гыч Йошкар-Олашке кок пачашан поезд-влакым колташ палемдыме.  2022 ий тӱҥалтыш гыч  57-58-ше поездын составыштыже кок пачашан вагон-влак лийыт. Тидын нерген кӱртньыгорно станцийын телеграмм каналже увертарен. Вагонышто мокроклиматым кучышо уэмдыме системе, сайын йӧнештарыме душ, мультимедийный системе, кажне купеште розетке да usb-порт лийыт. Купешке пурашлан лӱмын магнит картым ямдылат. Тыгак посна категориян еҥ-влаклан кугурак кумдыкан купе да инвалидный коляскым кӱзыктышӧ устройство лиеш.  Тачысе кечылан компанийын паркыштыже 600 утла тыгай вагон шотлалтеш.

Шинча черым эмлаш у оборудованийым налыт. Республикын вуйлатышыже Александр Евстифеев Г.И.Григорьев лӱмеш офтальмологический эмлымверлан оксам ойырымо шотышто распоряженийышкыже кидпалыжым пыштен. Тудын дене келшышын, 7 миллион теҥге палемдалтеш, ты окса дене оборудованийым налыт, а  тиде:  катарактым кораҥдаш кучылталтше системе, тыгак офтальмологий лазер. Пытартыш жапыште республикыште шинчан сетчаткыже дене кылдалтше чер-влак шукемыныт. У аппарат-влак хирургий полышым саемдаш да тудым у кӱкшытыш нӧлталаш полшат. 

Верысе Роспотребнадзорын увертарымыж почеш, 24 сентябрьлан вакциным 100 тӱжем утла еҥ шынден. Нунын коклаште – 71 тӱжем утлаже йоча да 600 наре мӱшкыран ӱдырамаш. Лишыл жапыште эше 400 тӱжем утла еҥлан вакцинацийым ышташ палемдыме. Иммунизацийыште «Ультрикс Квадри» да «Совигрипп» препарат-влакым кучылтыт. Эртыше арняште 5902 еҥ ОРВИ дене черланен, тиде показатель, тылечын ончышо, арня дечын 25% шукырак.

Морко йоча сымыктыш школ икшыве-влакым у тӱс дене вашлийын. Тений тудым «Культура» нацпроект дене келшышын, тӧрленыт. Пашазе-влак окнам, омсам вашталтеныт, фасадым уэмденыт. Тачысе кечын сымыктыш школышто фортепиано, струнно-смычковый, калык семӱзгар, хорегорафий да художественный пӧлка-влак пашам ыштат. Тиде йоча сымыктыш школым 1958 ийыште почыныт. Пайремле почмаште Марий Эл дечын сенетор Сергей Мартынов лийын.