Эрик Сапаев лӱмеш опер да балет театрыште у ойыртемалтше постановкым ямдылат. «Белый лебедь» балет – труппылан йӧршын у спектакль. Хореографий, костюм, декораций, либретто – чылажымат республикысе усталык шӱлышан коллектив ыштен.
Корным чоҥышо-влак Йошкар-Олаште Герцен уремым тӧрлат. Паша Панфилов гыч Суворов урем марте шуйна. Тидын нерген оласе мэрийыште палдарат. Подрядный организаций тошто асфальтым кораҥден. Ончыкыжым пашазе-влак кок лончо дене у асфальтым шарат, корно пале-влакым вераҥдат да разметкым ыштат. Тиде уремыште корным нацпроект дене келшышын тӧрлат.
Йоча-влаклан школышто шокшо кочкышым ситышын пукшат. Республикын 253 тунемме учрежденийыште чыла пашам шотыш кондымо. Пищеблокышто пайдале кочкышым ямдылаш чыла сырье уло. Рационым да менюм Роспотребнадзор дене каҥашен ыштыме.
Коронавируслан кӧра колонийлаште эрык деч посна кодымо еҥ-влак дене ужаш –свиданийым – жаплан чареныт. Кагазыште пеҥгыдемдыме почеш, тиде 11 октябрь гыч тӱналеш. Вес арня гыч кужу да кӱчык свиданий-влак огыт пуалт. Эрык деч посна кодымо-влакын родо-тукым да лишыл еҥыштым тидым умылаш да шотыш налаш йодыт. Чаракым кораҥдыме нерген ешартыш увер лиеш. Тидын нерген наказанийым шуктымо виктемын пресс-службыжо палдара.
Республикыште 14 ияш марте 80 тӱжем йоча грипп дечын прививкым шындыктен. Тиде - план дечын 80 процент. Тӱҥ шотышто – школышто тунемше-влакын иммунитетыштым прививке полшымо дене пеҥгыдемдат. Республикыште вакцинаций умбакыже шуйна, прививкым «Совигрипп» да «Ультрикс квадри» вакцине дене шындат.
Республикысе тазалыкаралтыш учрежденийлаште оборудованийым уэмдат. СПИД-рӱдерыште федерал программе почеш 49 миллион теҥге дене у оборудованийым налыныт. Инфекций службылан тӱткышым ойыраш кӱлешлык моткоч кугу. Тидым Ковид дене пандемий жапат пенгыдемда. Тачысе кечылан СПИД-рӱдерыште 100 наре микроорганизмлан тергалташ лиеш. У оборудований рӱдерын пашажым ончыко шӱкал колташ полшышаш, лабораторийлаште у информационный системе шымлымашым икмыняр пачаш писынрак ышташ тӱналеш.
Марий Эл гыч агропромышленный предприятий-влак «Шӧртньӧ шыже» Российысе выставкыште 36 медаль дене палемдалтыныт. Тиде радамыште 28 шӧртньӧ, 7 ший да 1 той медаль. Тидыже республикыште сай да кӱкшӧ качестван кочкыш сатум ямдылыме нерген ойла. Продукцийым мемнан республикыште веле огыл ужалат, тыгак вес регионлашке колтат, тидын дене пырля тӱрлӧ конкурслаште кӱкшын аклат.
Кундемым виктырыме рӱдер марий кочкышын рейтингшым ыштен. Еҥ-влакын шонымашышт дене тамле сий гыч ончыл верыште – коман-мелна, тудым мемнан кундемыште илыше-влак чыланат тамлен онченыт, икмыняр лончан мелнам турист-влакат кумылын налыт. Рейтингышке логалше эше ик сий – тиде подкогыльо, тудымат шыл, пареҥге, торык, понго, емыж гыч ыштат. Тыгак темле сий-влак коклаште шокта, пулашкамуно, ÿяча улыт.
Марий Элын сборныйжо сеҥымаш дене пӧртылын. Тиде гана спорт кучедалмаш – панкратионышто ойыртемалтыныт. Сентябрь мучаште «Рать» спорт клубын 6 еҥан командыже Липецк олаште таҥасен да личный зачётышто 8 медальым сеҥен. Чумыр соревнованийыште мемнан команде 28 команде кокла гыч кокымшо верыш лектын.
Вес ийын Йошкар-Олан ик эн мотор верже, Изи Какшан вӱд воктенсе кумдык у сыным налеш. Тиде паша Гоголь урем гыч тӱҥалын Вознесенский кӱвар марте пурла серыште да Вознесенский гыч Театральный кӱвар марте шола могырышто каяш тӱналеш.
