Марий Элышке паша визит дене Российын ялозанлык министрже Дмитрий Патрушев толын. Тудо регион вуйлатыше Юрий Зайцев дене  вашлийын. Нуно ялозанлык отрасльын тачысе кечыже да вияҥмыже нерген каҥашеныт. Дмитрий Патрушев «Йошкар-Оласе мясокомбинат» предприятийыште лийын. Россий министр тиде предприятийын продукцийжым вес регионлаштат ужалымашын сай могырыжым  палемден. Тений тиде предприятийыште 8 тӱжем тонн колбасный изделийым, 10 тӱжем тонн шылым да шыл сатум, 9 тӱжем тонн консервым лукшаш улыт. Тыгак Россий ялозанлык министр Шернур районышто лийын.  

Марий Элыште икымше апрель гыч шошо призыв тӱҥалын. Тений гыч призывник-влаклан электрон повесткым колтат. Призывной кампаний 15 июль марте шуйна, срочный службым эрташ элна мучко 18 гыч 27 ий марте 150 тӱжем еҥым колтышаш улыт. Кӧ повесткым онлайн налын огеш керт, нунылан ондаксе семын, илыме вер адрес дене колтат. Срочник-влакым специальный военный операций эртыме верлашке колташ огыт тӱҥал – палемдат Российын генштабыштыже.

Правительствыште правопорядкым эскерыме шотышто Координационный советын заседанийже эртен. Тудым Юрий Зайцев вӱден. Вуйлатыше палемден: изирак да кокла бизнесыште лӱдыкшыдымылыкым утларак эскерыман. Погынымаште Марий  Элысе элкӧргӧ паша министр, полицийын полковникше Андрей Вырвич кодшо ийысе пашам иктешлен, докладым ыштен. Тудо интернет ресурсым да сото кылым кучылтын ыштыме преступлений-влак шукеммым ончыктен. Тидын годым еҥым уремыште толымаш, шолыштмаш, пуштмаш да моло преступлений-влак, мӧҥгешла, шагалемыныт.

Волжск олаште азам ыштыме у отделенийым почыныт. Тудо Волжск ола, тыгак Волжский, Морко, Звенигово районла гыч ӱдырамаш-влаклан медицин полышым пуаш келыштарыме. Тылеч ончыч мӱшкыран ӱдырамаш-влак Йошкар-Олашке азам ышташ коштыныт. Кум пачашан зданийым ончычсо корпус дене ушеныт. Тушто приемный покой, азам ыштыме да операционный блок, тыгак азам ыштыме дечын вара ӱдырамаш-влаклан отделений улыт. Эмлымверым у оборудований дене келыштареныт. Идалык жапыште ик тӱжемат 500 йоча ош тӱням ужын кертеш. Азам ыштыме отделенийым почмашке регион вуйлатыше миен.

«От сердца к сердцу». Рӱдоласе права школ, Йошкар-Оласе да марий епархийын илышыш шыҥдараш палемдыме проектышт лач тыге маналтеш. Тудын кышкарыште юрист ден психолог-влак неле илыш ситуацийыш логалше, тыгак сарзе операцийыште улшо салтак да нунын ешыштлан, але шке кумылын тушко кайыше-влаклан, илалше але тазалык шотышто эмганен вияҥше еҥлан психологический да юридический полышым пуаш тӱҥалыт. Проект 2 тылзылан келыштаралтын. 1 апрель гыч 31 май марте шуйна. Тудын жапыште права шотышто умылтарымашым Православий рӱдерыште да тыгак телефон дене пален налаш лиеш. 

Регион вуйлатыше Юрий Зайцев специальный военный операцийын участникше-влаклан тӱткышым ойыраш кӱштен. Тидын нерген Марий Эл Республикыште еҥ-влакын праваштым аралыме шотышто уполномоченный Фанис Мухаметгалиев дене вашлиймаште ойлен. Тудо кодшо ийысе пашаже нерген докладым ыштен. Ӱмаште тудын деке республикыште илыше 722 еҥ дечын йодмаш пурен. Кажныжым жапыштыже онченыт. Йодыш-влак гыч утларакше илымвер шотышто права дене кылдалтын. Регион вуйлатыше специальный военный операцийын участникше-влакын правашт шукталтмым утларак тӱткын эскераш кӱштен. 

2022 ийыште самырык-влакын политикыштым вияҥдымаш дене Марий Эл кокымшо верыште. Тыгай уверым мониторингым ыштыше агентстве пуа.   Кодшо ийын мемнан республикына ты виктышыште кугу пашам наҥгаен. Вуйлатыше Юрий Зайцевын кӱштымашыже почеш самырык шанчызе, шымлызе, инноватор-влаклан грант пуалтын, самырык-влаклан кугыжаныш премийын окса кугытшо ешаралтын.

Тошто пӧртат сылнештеш. Илыме зданий-влакым капитально олмыктымо паша умбакыже шуйна. Тиде программе дене 137 тӱжем еҥын илыме условийыштым саемденыт. 920 зданийым капитально олмыктеныт. Пӧртлаште вӱд, шокшо да тул пуымо системым вашталтат, лифтым уэмдат да моло пашам шуктат. Тений программе дене келшышын, эше 9 тӱжем утла еҥын илыме условийыштым саемдышаш улыт.