Вес ийын Йошкар-Олаште кокымшо номеран йоча поликлиникым чоҥат. 90-ше ийла гыч медучреждений Свердлов уремысе йочасадыште верланен, тушто 13 тӱжем еҥ эмлалтеш. Поликлиникын у зданийжым «Интеграл» микрорайонышто чоҥышаш улыт, тушто прививкым шындыктыме кабинет, эмлыме физкультурын кабинетше, восстановительный эмлалтмаш отделений лийшаш улыт. Йоча поликлиникым 2024-2025 ийлаште чоҥаш палемдат. Тидлан «Первичный звенон модернизацийже» программе полша. 
Марий Элыште тений пел ий жапыште промышленный производство куат 12 процент нарылан кушкын. Тидын нерген республике правительствын заседанийыштыже ойленыт. Предприятий-влак промышленный продукцийым 113 миллиард теҥгелан ыштен луктыныт: нефтепродукт, электрон да оптический изделийым, коваште гыч сатум, автотранспортлан прицепым, химический продукцийым шукырак ыштеныт.
Марий Элыште Российысе чоҥымаш министерствын полшымыжо дене социал инфраструктур вияҥеш. Марий Эл вуйлатыше Юрий Зайцев чоҥымаш да илымверкоммунал озанлык министр Ирек Файзуллин дене вашлийын. Регион вуйлатыше палемден, нацпроект да республикын посна социал вияҥмаш программыже почеш кундемыште сай вашталтыш-влак улыт. 2023 ийыште республикыште келшымаш пӧртым чоҥымо, тыгак рӱдӧ олаште перинатал рӱдерын корпусшым, набережныйын Ленин проспект гыч тӱҥалын Йошкар-Олан 400 ий темме лӱмеш парк марте ужашыжым реконструироватлыме. Тений тыгак Черняков уремыште «рекреационный» манме кумдык лиеш. 
Йошкар-Олаште Ширяйково микрорайонышто эҥер серыште дамбым ышташ палемдыме. Тидын нерген Юрий Зайцев Российысе пӱртӱс аралтыш министр Александр Козлов дене мутланен. Марий Элын вуйлатышыже палемден, Йошкар-Оласе Ширяйково микрорайонышто илыше калык вӱдшор годым нелылыкым шижеш. Кажне шошым 40 наре пӧрт, школ да йочасад зданийыш вӱд пура. Тиде экшыкым кораҥдашлан серым пеҥгыдемдыман – тидлан тушто лӱмын келыштарыме конструкцийым вераҥдыман, палемден Юрий Зайцев. 
Йошкар-Олаште да Шернурышто шӱк-коштырам ойыркалыше комплексым ыштат. Чоҥымо пашам вес ийын тӱналшаш улыт. Тачысе кечылан Правительстве ден инвестор-влак коклаште соглашенийын проектшым ямдылыме. Тыгак регион вуйлатыше Юрий Зайцев «Российысе экологий оператор» компанийын генеральный директоржо Денис Буцаев дене вашлийын, финанс да моло йодышым каҥашен. 
Марий Элысе тазалыкаралтыш отрасльыште «Развитие системы оказания первичной медико-санитарной помощи» проект вияҥеш. Проектыш тений эше кум эмлымвер ушнен. Тиде ‒ Марий Турек, Шернур да У Торъял рÿдӧ больнице-влак. Марий Турек поселкысо эмлымверым ачалаш 3 миллион утла теҥгем ойырымо. Тудын дене зданийыште ремонтым ышташ тÿҥалыт да кызытсе жаплан келшышын, увер стендым вераҥдат. Медицин полышым пуымаште тыгай модельым кызыт 26 поликлинике кучылтеш. У стандарт почеш пациент-влак приемыш возалташ онлайн-сервис дене пайдаланен кертыт.
Федераций Погынышто Марий Эл деч сенатор Сергей Мартынов «Копир» заводыш миен коштын. Козмодемьянск олан мэрже Михаил Козлов да заводын вуйлатышыже Юрий Полежаев ты предприятийын вияҥ толмыжо нерген каласкаленыт. Ондак тыште контакт арверым да разъём-влакым луктеденыт. 90-ше ийлаште завод автомобиль йӧндартышыште кӱлешан шапаш ӱзгар-влакым луктеден. Тачысе кечылан «Копир» заводышто электрик соединитель-влакым да автотрактор оборудованийлан комплектующийым луктеш. Нуным уло Россий мучко налыт. Поснак авиаций да ракет-космический виктыш, тыгак кӱртньыгорно транспорт отрасльыште нуно кугу йодмашан улыт. Сенатор палемден: уло Российын аралтыш системыжым вияҥдымаште «Копир» заводынат надырже моткоч кугу. Адакшым, ты предприятий оборонылан тӱрлӧ пашам шуктымо деч посна, Козмодемьянск олам тӱзатымаште, йоча площадке-влакым ыштымаште да корным ачалымаште шке шийвундыж дене полша.
СВО-н ветеранже-влак Марий Элыште юридический полышым яра налын кертыт. Кундемыштына «Защитники Отечества» фонд да Республикын адвокат палатыже келшымашым пеҥгыдемденыт. Документышке кидпалыштым фондын регионысо пӧлкан вуйлатышыже Ренат Магсумов да Адвокат палатын президентше Ольга Полетило пыштеныт. Тудын дене келшышын, СВО-н ветеранже да порысым шуктымо годым вуйым пыштыше-влакын ешышт юридческий полыш дене яра пайдаланен кертыт.
Республикыште беспилотник-влакым кучылтмо правил вашталтын. 20 июньышто Юрий Зайцев 2022 ий 6 декабрьыште лукмо Указышке вашталтышым пуртымо шотышто кидпалыжым пыштен. Документын у редакцийже дене келшышын, пилотдымо чоҥештылше аппарат-влакым ынде Гражданский обороно комитет дене келшымашым ыштымеке веле кучылташ лиеш. Тиде чарымаш исполнительный кучем орган, верысе кучем органла да нунын ведомствыштышт улшо организаций-влаклан келшен огеш тол. Указ 20 июнь гыч вийым налын, а лу кече гыч ты марте пуымо разрешений-влак вийыштым йомдарат.
Юрий Зайцев Марий Элыште корным ыштыме системе дене палыме лийын. Марий Эл «Лӱдыкшыдымӧ сай качестван корно» нацпроект дене пашам сайын шуктышо Российысе 5 регион коклаште. Тений республикыште улшо корно гыч 40 процентше нормативлан келшен толаш тӱҥалеш. Юрий Зайцев «Марийскавтодорын» куснылшо лабораторийыштыже лийын. Тушто материал да асфальтобетон смесьым тергат.
