Пушкин карт дене утларак пайдаланаш тӱҥалыныт. Кодшо ийын 105 тӱжем наре билетым налыныт. Тидыже ӱмашсе деч ныл пачаш шукырак. Эн шуко – Эрик Сапаев лӱмеш кугыжаныш академический опер да балет театрышке, М.Шкетан лӱмеш марий кугыжаныш драме театрышке да Яков Эшпай лӱмеш марий кугыжаныш филармонийышке коштыныт. «Пушкин карт» программе дене пайдаланыше эн шуко участник Йошкар-Олаште, Звенигово да Медведево районлаште.

Республикысе кӧргӧ политике, верысе кучем да юстиций министр семын Антон Мирбадалев тыршаш тӱҥалеш. Тидын шотышто указышке кидпалыжым Юрий Зайцев 3 мартыште пыштен. Антон Алексеевич ты марте Кугыжаныш Погынын депутатше лийын, но изарнян эртыше сессийыште тудын полномочийжым ончылгоч мучашлыме шотышто йодмашыжым сайлан шотленыт. 

Козьмодемьянскыште  «Паллада» парус клубын мастерскойжым почыныт да у пу суднылан негызым пыштеныт. «Паллада» парус клуб республикысе сарзе-патриот клуб-влак коклаште ик эн ончылно. Республике тудым вияҥдаш кугу тӱткышым ойыра. Тушто 100 утла йоча шуаралтеш. Клубын воспитанникше-влак Россий кӱкшытан конкурслаште икмыняр гана сеҥыше лийыныт, Президент фондын грантшымат налыныт, Правительстве кӱкшытыштӧ шарнымаш медаль дене палемдалтыныт. Икманаш, сеҥымашыштат шуко – шонымашыштат мучашдыме. Мастерской зданийым ыштымаште Марий Элыште йоча теҥыз движенийын меценатше Юрий Усков полшен. 

Йошкар-Олашке икымше 15 у автобусым конденыт. Март мучаш марте ПАЗ маркан эше 35 транспорт средстве кундемышке толын шуэш. Тидын нерген республике правительстве председательын алмаштышыже Александр Сальников палдарен.

Марий Эл вуйлатыше Юрий Зайцев Ростовский областьын губернаторжо дене вашлийын. Вашлиймаш Ростов-на-Дону олаште лийын. Тачысе кечын Марий Эл гыч Ростовский областьышке кочкыш сатум колтат: консервым, полуфабрикатым, кондитерский изделийым, тыгак быт химийым, медицин инструмент-влакым. Кок регион коклаште образований сферыштат вашкыл уло. А Ростов-на-Дону гыч Марий Элышке комбайн, кушкыл уӥым кондат. Ончыкыжым вашкылым кумдаҥдышаш улыт. 

Йочан усталыкшым муро полшымо дене шуараш. «Марий йоча муро» проект почеш йоча-влаклан марий муро сборник савыкталтын. Республикысе Марий тӱвыра рӱдерын проектшым илышыш шыҥдараш «Россий марий-влак» федерал калыкле-тӱвыра автономий полшен. Йоча муро-влакым «Юкече» йоча вокал да «Падыраш» фольклор ансамбль-влак йоҥгалтарат. 

7 апрель гыч 6 май марте  республикысе корнылаште шошым чот неле транспортлан эрташ чарат. Тидын шотышто постановлений 22 февральыште лектын. Тыгай чарымаш кажне ийын корным аралаш пурталтеш. Ик осян грузовой транспортын нелытше 6 тонн, кок осян 5 тоннан автотранспортлан, тыгак кум осян да 4 тонн нелытан транспорт южо корно дене спецразрешений дене веле эртен кертеш. Еҥ-влакым шупшыктышо автобус, ӱяҥдышым да вольыклан кургым кондыштарыше транспорт, корным чоҥышо технике, шӱкым лукшо, кочкыш сатум наҥгайыше транспорт ончычсо семынак кеч-могай корно денат эртен кертеш. 

Йошкар-Оласе 19-ше номеран школышто «Благодарю за службу» документальный фильмым ончыктеныт.  Тудо СССР жапыште, Кугу Ачамланде сар годым, нацист-влакын преступленийыштым почын ончыкта. Ты фильмым «Без срока давности» шанче-просветительский проект кышкарыште писатель, спецслужбо-влакын историкше Николай Лузан да ГТРК «Марий Эл» гыч коллегына-влак ямдыленыт. Документальный фильмын негызше - немыч капитан Вальтер Георг Витцель дене кылдалтше рассекреченный материал-влак. Лач тудын приказше дене Орёл олаште илышлан кӱлешан инфраструктурым пудештареныт.

Тений республикыште «Земский врач» да «Земский фельдшер» программылан 35 миллион наре теҥгем ойырат. План дене 27 специалист дене ойпидышым ыштышаш улыт, 14 медицин пашаеҥ тора яллашке кая. Тений программышке пуртымо вашталтыш дене, врачебный амбулаторийышке пашашке толшо фольдшер, акушер да медшӱжар-влакат «Земский доктор да фельдшер» лийын кертыт. Тачысе кечын Юрино районысо эмлымверыште вакансий-влак улыт. Тушко пашашке толшо врачлан 1 миллионат 500 тӱжем теҥгем, а кокла медицин персоналлан 750 тӱжем теҥгем ойырат. Тазалыкаралтыш министерствыште палдарат: врачлан илымверым пуат. 

Туныктышо, воспитатель, педагог-библиотекарь да науко пашаеҥ-влак ик верыш погыненыт. 50 утла еҥым Т. Евсеев лӱмеш Калыкле тоштер чумырен. Амалже – «Марий краеведений: таче да эрла» регион-влак кӱкшытан конференций лийын. Тений тудо 29-ше гана эртен. Марий Эл деч посна Татарстан, Чуваший республикысе йоча сад да школла гыч туныктышо-влак ушненыт. Туныктышо да воспитатель-влакын вашлиймашышт – туныктышо да педагогын идалыкше кышкарыште палемдыме ик эн кугу конференций. Тудын негызеш, паша-влакым посна сборник дене савыктат.