Марий Эл Радио

Марий Элыште медицин класс-влакым почыт

  • Дата: 16:16, 21-06-2023
  • Просмотров: 1 111

Марий Элыште медицин класс-влакым почыт. Нуно республикыште 6 школышто лийыт. Туныктыш да шанче министр Лариса Ревуцкая да тазалыкаралтыш министр Марина Панькова келшымашыш кидпалыштым пыштеныт. 2023-2024 тунемме идалык жапыште Йошкар-Оласе 1-ше да 30 номеран школлаште, Медведево 3-шо школышто, Шернур поселкысо икымше да кокымшо школлаште, Марий Турек поселкышто тыгай класс-влакым ыштат. Медицин класс-влакым тазалыкаралтыш системыште кадр-влакым ситараш шонымаш дене почыт. 


Марий Эл Радио

Йошкар-Оласе «Восточный» микрорайонышто 1100 йочалан школым чоҥат

  • Дата: 16:13, 21-06-2023
  • Просмотров: 1 116

Йошкар-Оласе «Восточный» микрорайонышто 1100 йочалан школым чоҥат. Тудым «Образований» нацпроект дене келшышын ыштат. Кызыт негызын монтажшым келыштарат. Юрий Зайцев объектым 2024 ий 1 сентябрь марте чоҥен шукташ кӱштен. Йошкар-Олан мэрийже ешара, чоҥымаш пашалан каҥаш-влакым тунемме верын ончыкылык директоржат пуэн кертеш. Тиде должностьыш кандидат-влак шке резюмештым рӱдӧ оласе туныктыш виктемын электрон почтышкыжо колтен кертыт. 


Марий Эл Радио

Правительствын совещанийыштыже кеҥежымсе тазаҥдыме кампаний, шошо агам мучашлыме,черле-влакым кужу жап ончымо программе шотышто йодыш-влакым каҥашеныт

  • Дата: 16:06, 21-06-2023
  • Просмотров: 1 041

Правительствын совещанийыштыже кеҥежымсе тазаҥдыме кампаний, шошо агам мучашлыме, тыгак илалше да черле-влакым кужу жап ончымо программым илышышке пуртымо йодыш-влакым каҥашеныт. Республикысе школ пеленсе 175 лагерьыште 12 тӱжем утла йоча канен. Тений кеҥеж жапыште кундемыште 201 организаций пашам ышта. Юрий Зайцевын кӱштымашыже дене тений «Лесная сказка» комплекс йоча-влакым уэш вашлийын. Тушто кеҥеж жапыште ик тӱжем наре йоча кана. 


Марий Эл Радио

Ялысе кумдык-влакым вияҥдаш Марий Эллан федерал бюджет гыч 78 миллион теҥгем пуат

  • Дата: 16:00, 21-06-2023
  • Просмотров: 350
Ялысе кумдык-влакым вияҥдаш Марий Эллан федерал бюджет гыч 78 миллион теҥгем пуат. Роспотряженийышке кидпалыжым Правительстве председатель Михаил Мишустин пыштен. 2024 ийысе бюджетыште 4 миллиард утларак теҥгем палемдыме, но 33 регионлан оксам тенияк колтат. Ты радамыште ‒ Марий Эл. Ялысе кумдык-влакым тӱзаташ мемнан кундемлан 78 миллион теҥге ойыралтеш. Тиде окса дене тӱвыра пӧрт-влакым тӧрлат, коммунал инфраструктурым уэмдат, йоча сад да школ, спорт учрежденийым ыштат. Тыгак илымверым саемдаш кӱлмӧ программе дене 400 наре пӧртым налыт, 11 километр газпучым, 9 километр наре электроснабжений сетьым да 26 километр наре корным ыштат. 

Марий Эл Радио

Туныктышо-влак шукемшаш улыт

  • Дата: 14:43, 20-06-2023
  • Просмотров: 306
Туныктышо-влак шукемшаш улыт. Пытартыш жапыште Марий Элысе туныктыш организацийлаште чӱдылык улмым шижын, кундемыштына республике да федерал кӱкшытан проект-влакым шыҥдарат. Поснак «Земский туныктышо» программым палемдыман. Тений, тудын дене келшышын, 15 специалист пашаш толшаш — палдарат Общественный палатыште. Тыгак самырык специалист-влакым пашаш толаш кумылаҥдыме шотышто Республикысе Тӱвыра министерствыштат паша каен шога. Лектышыжат уло: пытартыш 10 ий жапыште культур сферыште самырык специалист-влак 15 процентлан ешаралтыныт. Мут толмашеш, тачысе кечылан кундемна мучко 200 педагог ок сите.

Марий Эл Радио

Оласе кудывече-влакым шотыш кондымо проект сай лектышым ончыкта

  • Дата: 14:39, 20-06-2023
  • Просмотров: 272
Оласе кудывече-влакым шотыш кондымо проект сай лектышым ончыкта. Ушештарена, тиде проект идалык ончыч Республик вуйлатышын темлымыже почеш шочын. Кодшо ийын Йошкар-Олаште 15 кудывечым шотыш кондымо. Тидлан 150 миллион наре теҥге окса каен. Тений тиде паша умбакыже шуйна. Шукерте огыл Петров урем, 4-ше номеран пӧрт кумдыкышто паша мучашлалтын. Тудын тураштак йочасад верланен. Палемден кодыман, социал да туныктыш учреждений пеленсе кудывече-влакым ик эн ончыч тӧрлат. Кызыт Чавайн бульвар, 21-ше да 23-шо  номеран пӧрт кумдыкышто кудывечым шотыш кондаш тӱҥалыт. Туштат школ да йочасад верланеныт.

Марий Эл Радио

Ялозанлык министерстве шошо агам иктешлен

  • Дата: 14:38, 20-06-2023
  • Просмотров: 270
Ялозанлык министерстве шошо агам иктешлен. Район-влак коклаште Оршанка кундем ойыртемалтын. Мланде пашаеҥ-влак план дечын шукырак ӱденыт, пырчан культурым 115 процентым, кургым ‒ 157 процентым. Озанлык-влак коклаште пашам сайын шуктышо-влакым палемденыт. 5000 утла гектар дечын утларак ӱдышӧ озанлык-влак коклаште ончылно «Шойбулакский» племзавод, кокымшо верыште ‒ «Семеновский», кумшо верыште ‒ «Первый май» колхоз. 1000 гыч 5000 гектар марте курал-ӱдышӧ-влак радамыште ‒ «Нур» агрофирме, Лукоз да «Хлебниковское» озанлык. 1000 гектар марте С. Гусевын, В.Безумовын кресаньык-фермер озанлыкышт да «Колос» ушем ончылно лийыныт.

Марий Эл Радио

Звенигово районысо Кокшайск селаште у врачебный амбулаторийым чоҥат

  • Дата: 14:26, 7-06-2023
  • Просмотров: 534

Звенигово районысо Кокшайск селаште у врачебный амбулаторийым чоҥат. Юрий Зайцев Россий Президентын Юл кундемысе федерал округышто ӱшанеҥже Игорь Комаровын граждан-влакын приемышкыжо видеоселектор йӧн дене ушнен. Звенигово район гыч Геннадий Изиляев  Кокшайскыште амбулаторийым чоҥаш йодмаш дене лектын. Кызыт медучреждений 1958 ийыште чоҥымо тошто объектыште верлана. Юрий Зайцев палемден: «Тазалыкаралтышын первичный звенон модернизацийже» программе дене объектым ышташ тӱҥалыныт. Зданий ик пачашан лиеш, тудым кермыч дене оптат. Тушто терапевт, стоматолог, педиатр, гинекологын кабинетышт лийыт. Кызыт амбулаторийын негызшым ыштеныт, цокольым оптеныт. Объект 20 процентлан ямде. Юрий Зайцев палемден: амбулаторийым тений декабрь марте чоҥен шуктышаш улыт. 


Марий Эл Радио

«Культура» нацпроект дене Оршанка да Куженер районлаште тӱвыра пӧрт-влакым тӧрлат

  • Дата: 15:12, 23-05-2023
  • Просмотров: 782

«Культура» нацпроект дене Оршанка да Куженер районлаште тӱвыра пӧрт-влакым тӧрлат. Нужавлак (рушлаже Лужбеляк) ялыште кӧргӧ отделкым ыштеныт, тыгак шокшым пуышо системым монтироватлат. Объект 76 процентлан ямде. Пашам 30 сентябрь марте мучашлышаш улыт. Куженер районысо Йывансола ялыште тӱвыра пӧртыштӧ окнам, омсам шынденыт. Кызыт залыште да книгагудышто пашам шуктат. Зданийын леведышыжым вашталтат. Объект 35 процентлан ямде.


Марий Эл Радио

Марий самырык театрын реновацийжым 2024 ий марте ыштен шуктышаш улыт

  • Дата: 15:11, 23-05-2023
  • Просмотров: 761

Марий самырык театрын реновацийжым 2024 ий марте ыштен шуктышаш улыт. Театрын зданийжым «Культура» нацпроектышке пуртеныт. Тиде да вес ийлан 593 миллион теҥгем   ойырат, тений 275 миллион теҥгем колтат. Кок ий жапыште театрын тӱжвал сынжым ик сынаным ыштат – йошкар кермыч дене комыжлат, леведышыже ужар тӱсан лиеш. Тыгак конструкцийыште улшо ситыдымашым тӧрлат, леведышым саемдат. Курчак театрын ончычсо зданийжым 1989 ийыште ыштеныт. Тиде жапыште тудо тоштемын: южо вере пырдыж шелышталтын, леведыш гыч вӱд йога, фасадын отделкыже каткалалтеш.