Йошкар-Олаште калыкын тӱшкан коштмо верым тӱзатыме шотышто темлымашым рӱдӧ олан администрацийыштыже 17 март марте погат. Эн шуко йӱкым погышо верлам 2024 ийыште сылнештараш тӱҥалыт. Ты сомыл федерал проект полшымо дене шукталтеш. Темлымаш-влакым кажне паша кечын администрацийыш намиен пуаш але электрон йӧн дене колташ лиеш. Серышыште лӱмым палемдыман, тыгак темлыме кумдыкын адресшым возыман.

Специальный военный операцийыште улшо-влаклан чумыр калык рӱж полшаш ушнен. Кажне районышто кугырак ийготан-влакат, самырык-влакат тиде пашам шуктат: кӧ гуманитар полышым чумыра, кӧ кидпаша дене  носилкам, вургемым  урга.

«Арена Марий Эл» манеж воктечын черетан партий гумантир груз специальный военный операцийыште улшо-влаклан каен. Тушто тӱҥ шотышто пиламатериал-влак. Нуным чодыра арендатор-влак чумыреныт. А тиде 80 наре куб. Тудым специальный военный операцийыште улшо-влак блиндажым, окопым ышташ да моло кӱлешлыклан кучылташ тӱҥалыт. Гуманитар полыш радамыште тыгак коҥга да генератор-влакат улыт. Ешарен кодаш лиеш, 23 февраль вашеш республике гыч кугу партий полышым колтеныт, тушто автомашина-влак да моло кӱлешан пого лийын. Март тылзыште район, республик правительствын чумырымо черетан полышым спецоперацийышке марий кундем гыч тушто улшо-влаклан колтат.  

Волжск олаште шуко шочшан еш-влаклан ойырымо мланде участкышке газпучым шупшыныт. Газпучым вич уремышке пуртеныт, кызытеш 112 мланде участкыште канде тулым чӱкташ ямдылыме. Ты паша яра ышталтын. Умбакыже газ оборудованийым налын, участкыште газым мланде оза-влак шке кӱшеш ыштышаш улыт. Мут толмашеш, шукерте огыл тыгаяк программе дене Шоя-Кузнецово селаште илыше шуко шочшан еш-влаклан газым пуртеныт.

Январь тылзыште мемнан кундемыште йӧнозанлык производство южо показатель дене ончыко каен. Тидын радамыште ошмам ыштен лукмаште. Тиде данный дене Маристат йӧнозанлык производствын лектышыжым шымлен, палдара. Обрабатывающий производствышто напиткым 2 пачаш утларак лукташ тӱҥалыныт.

Россий Президент Владимир Путин Федеральный Собранийлан Посланийжым ойлен. Президент элын вияҥме корныжо, тыгак спецопераций нерген каласен, доброволец, мобилизованный, сарзыеҥ, федерал орган-влакын пашаеҥыштлан тауштен. Российыште СВО-н участникше да нунын ешыштлан полшышо фондым ыштат. 

Марий Элыште «Движение первых» мер толкынын 51 первичный отделенийже уло. Тачысе кечын нуным чыла районышто да ола шотан округышто почыныт. Тидын нерген туныктыш да шанче министерстве палдара. Российысе йоча да самырык-влакын ушемышт 20 утла организацийым чумырен. Участник-влак коклаште школышто тунемше-влак веле огыл, тыгак колледж, техникум да ВУЗ-лаште шинчымашым погышо-влак. Тиде толкыным кодшо ийын Россий Президентын темлымашыже дене почыныт. Тушто йоча да самырык-влакым патриотизм, таза илыш йӱла деке ушаш шонымаш дене ышталтын. 

   Тений «У Торъял – Шернур» корным тӧрлаш палемдыме. Тидлан чыла документ ямде. Тидын нерген Республикым виктарыме рӱдерын вияш эфирыштыже Шернур районысо администрацийын вуйлатышыже Александр Кугергин каласкален. «Лӱдыкшыдымӧ автомобиль корно» национал проект кышкарыште ты ачалымаш пашалан 376 миллон теҥге окса ойыралтын. Александр Викторович ушештарен, ты проект кышкарыштак ӱмаште Шернур район кумдыкыш пурышо кок кугу корно ужашым ачаленыт. «Шернур-Казанский-Кукнур» корно ужаш, да район гоч эртыше «Йошкар-Ола-Уржум» кугорно. Тыгак Александр Кугергин моло национал проект да республикысе программе-влак почеш шукталтше паша-влак дене палдарен. Туризм шотыштат Шернур район кызыт у кӱкшытыш шуын. Поснак Кукнур кундемыште верланыше Йӱштӧ Кугызан резиденцийже нерген кугешнен ойлаш лиеш. Тышке турист-влакын чотышт ий еда кушкын толеш. 

    Марий Эл гыч кугу делегаций Ульяновск кундемыш миен коштын. Ты делегацийым Юрий Зайцев вуйлатен. Ульяновскышто экономик, тӱвыра, спорт да самырык-влак паша шотышто ятыр вашкелшыкым пеҥгдемденыт. 13 йӧндартыш предприятий шке сатужо нерген палдарен. Ынде Ульяновск кундемыш Марий Эл гыч респиратор, поролон, пу модыш, искусственный коваште да тулеч моло сату-влак каяш тӱҥалыт.

Регион вуйлатыше Морко районышто лийын. Ик эн ончыч тудо Коркатово лицейышке пурен. Тушто тунемше-влаклан малыме корпусым ыштыме йодыш уло. 2014 ийыште интернатым чоҥаш тӱҥалыныт, но пашам мучашлен огытыл. Лицейын директоржо Сергей Михайлов палдарен, интернат вес ялла гыч толшо ÿдыр ден рвезе-влаклан кÿлеш. Кызыт школышто 417 еҥ шинчымашым пога. Юрий Зайцев тунемме класс, компьютер класс-влакым аклен, лицейыште ышталтше патриот пашам ончалын. Юрий Зайцев интернатым чоҥен шукташ проект-смете документацийым ямдылаш кÿштен.