Йошкар-Олаште 78-ше гана куштылго атлетике дене эстафете эртен. Тудо сеҥымаш кечылан пӧлеклалтын. Тений тушто шке вийжым да писылыкшым 22 команде терген. Тиде школышто тунемше, суз да вузлаште шинчымашым погышо-влак, промышленный предприятийын спортклубышт. Старт да финиш Ленин площадьыште лийын. Эстафетын маршрутшым рӱдолан тӱҥ уремлаже гоч пыштеныт: а тиде Ленинский проспект, Петров, Красноармейский да Комсомольский уремла. Дистанцийын кужытшо – 6 километрат 500 метр. Эстафетыш ушнышо-влак 14 этапым эртеныт. Эн кужужо – 1 километр утларак. Тудо эн неле да эн муткучышан, палемдат спорстмен-влак. Эстафете – тиде команде дене таҥасымаш. Сеҥыше-влак радамыш лекташлан кажныже кыртмен тыршышаш.

Кугу сеҥымашын 79-ше идалыкше лӱмеш Йошкар-Олаште фронтовой бригаде-влак пашам ышташ тӱҥалыныт. Артист-шамыч ветеран, тылын труженикше, сарын икшывыж деке лектыт коштыт да нунын пӧрт кудывечыштышт концертым ончыктат. Тыгай усталык вашлиймаш ынде икмыняр ий «Поём всем двором» акций кышкарыште эрта. Фронтовой бригадын ик тыгай концертышкыже Алевтина Бокова миен коштын.

7 майыште Российыште радион кечыже палемдалтеш. Эн ончыч радиом калыкыш 1895 ийыште руш физик Александр Попов луктын да 1925 ийыште шкежак 7 майым радио пашаеҥ-влакын кечышт семын палемдаш темлен. МЭТР телерадиокомпаний кок радиом уша. Тиде - МЭТР ФМ да Марий Эл Радио. Нуно тиде кечын колыштшо-влаклан онай программым темленыт. Марий Эл Радио дублерын кечыжым эртарен.

Йоча йӱк дене сарзе да патриот шӱлышан муро-влак йоҥгалташ тӱҥалыт. 9 майыште Э.Сапаев лӱмеш опер да балет театрыште шуко йӱкан йоча образцовый хорын да йоча марий симфоний оркестрын кугу пайрем концертышт лиеш.

80 ий утла жап эртымеке, угыч лудалтыт. Мемнан эфирыштына Сеҥымаш кечылан пӧлеклалтше спецпроект тÿҥалтышым налеш. Канде экран воктене улшо-влакым фронт гыч возымо кум лукан салтак серыш дене палымым ыштена.

Геройын партыштыже шинчен ончаш - тунемшылан кугешнымаш веле огыл, тиде эше сай шарнымаш. Россий мучко увертарыме «Геройын партыже» патриотизм шÿлышан акцийышке кундемыштына кумылын ушнат. Тыгай парт коклашке тунеммаште да школ илышыште чот ойыртемалтше тунемшым гына шындат. У Торъял районысо Данил Онар лÿмеш Токтарсола школышто Герой Олег Камашев лÿмеш партым кодшо ийын почыныт. Тачысе кече марте тушто ятыр тунемше шинчен ончен.

Талешке-влак лӱмеш – чодыра. Марий Элыште визымше ий почела «Сад памяти» акций эрта. Тудын тӱҥ шонымашыже Сеҥымаш кече вашеш – 27 миллион наре пушеҥгым шындаш да Кугу Ачамланде сарыште ӱмыр лугыч лийше-влакым шарналташ. Кажне кӱрылтшӧ илышлан – ик пушеҥге. Поро йӱлаш пурышо акцийыш регион вуйлатыше Юрий Зайцев ушнен. Марий Элын вуйлатышыже пушеҥгым кок кочаже лӱмеш шынден. 

Сарзе-влаклан полыш. Марий митрополийын кусарыше комиссийже «Воинын молитвословшо» книгам марлаҥден. Тиде паша Йошкар-Оласе да Марий кундемысе митрополит Иоаннын благословитлымыж почеш шукталтын. Тушто эр да кас, Святой-шамычлан, причастийлан ямдылалтме да моло молитва-влак улыт. Книгам СВО-што улшо салтак-влаклан колтат. Кумданрак Эльвира Петрован материалыштыже.

«Нимо нерген келгынрак». Тыге маналтеш поэтессе Вера Гордееван у почеламут сборникше. Тудым кугыжаныш программе да «Светлана» сылнымут фондын полышыж дене савыктыме. Кумданрак Кристина Быкован сюжетыштыже.

Лудаш, возаш, йыр улшо кумдыкым да тӱням модыш гоч пален налыт. Изи йоча-влакым туныктымаште тыгай йӧным Медведево район Руэмысе «Лесная сказка» йочасадыште воспитатель-влак чолган кучылтыт. Лачак тыште «Идалыкын воспитательже-2024» конкурсын сеҥышыже Людмила Басманова пашам ышта. Воспитатель дене мемнан съемочный группына вашлийын.