Марий сылнымутын классикше Сергей Чавайнын шочмыжлан 135 ий. Тудын лӱмжым нумалше калыкле книгагудо тӱрлӧ сылнымут мероприятийлам эртара. Ты радамыште «Ото » фестиваль. Тудын ойыртемже дене Лира Матвеева палдара.

Репортаж.

1 километрат пелан моторлык. Йошкар-Оласе Брюгге набережный тошто архитектуран Европысо олам ушештара. Тыгак тудо регион-влак кокласе турмаршрут радамыш пура. Эше «Россия – страна достижений» российысе проектыште ик эн кугу да кӱлешан объеклан шотлалтеш. Тиде проект Российысе регионлаште пытартыш 20 ий жапыште шукталтше ик эн кугу сеҥымаш-влак нерген каласкалаш виктаралтын.

Поро йӱлаш пурышо «Марий шыже» сымыктыш фестиваль Йошкар-Олаште эрта! Тудым кажне ийын Яков Эшпай лӱмеш Марий Кугыжаныш филармоний чумыра. Тенийсе фестиваль мом сӧра. Тидын нерген черетан материалым ончаш темлена.

Кок ийлан ик гана. «Сылнымут шыже» лӱман семинар самырык возышо-влакым чумыра. Самырык автор-влаклан сылнымутышто пенгыдын ошкылшо-влак уло кумылын ой-каҥашым пуаш ямле улыт. Кумданрак материалыште.

Шах да мат! Марий Элыште Юл кундемысе регион-влак гыч ветеран-влак коклаште шахмат дене турнир эртен. Тудо Марий Эл Республикын лӱмло, ик эн виян шахматист Евгений Некрасовлан пӧлеклалтын. 8-ше гана эртаралтше турнир 30 утла участникым чумырен. Кумданрак – материалыште.

300 кидмастар ик верыште. Марий Элыште Юл да Урал кундемысе Федерал округысо «Туристический сувенир» Российысе конкурсын финалже эрта. Конкурсыш 20 тӱрлӧ регион гыч кидмастар-влак шке сувенирыштым аклаш луктыныт. Туризм аланыште шке продукцийыштым темлыше кидмастар-влак дене Вера Горохова вашлийын.

Марий самырык театрын шке полатшым тӧрлат гынат, тудо у спекталь дене калыкым куандара. Шукерте огыл «Капитанская дочка» постановкым сценыш луктын, а 26 сентябрьште театр тургымым Юрий Артамоновын «Чодыра юзо» произведенийже почеш шындыме спектакль дене почыт.

Чодыраште тӱткылыкым ида йомдаре! Пытартыш жапыште калык утларак ир янлык дене вашлиялташ тӱҥалын. Амалже - маскан да ир сӧснан кочкыш шотышто миграцийышт, тыгак шордо-влакын кӱтласыме пагытышт. Кызыт узо шордо-влак поснак осал улыт, южгунамже айдеме ӱмбаке амал деч поснат керылтын кертыт.

Эртыше рушарнян чодыра пашаеҥ-влак шке профессионал пайремыштым палемденыт. Тудо сентябрьын кумшо рушарнянже эртаралтеш. Тачысе кечын Марий Элыште чодыра аланыште ик тӱжемат вичшӱдӧ наре специалист тырша: тиде лесничествын, чодыра пожар службын, заповедник-влакын еҥышт да молат. Нуно марий кундемын ик эн тӱҥ поянлыкшым перегат да тудым шукемдат. Пайрем лӱмеш Алевтина Бокова «Кугу Какшан» заповедникын шанчыеҥже Геннадий Богданов дене вашлийын. Геннадий Алексеевич чодыра аланыште ынде 30 ий наре тырша.