Сӱретым кидшӱм дене шижаш. Тимофей Евсеев лӱмеш калыкле тоштер социальный проект почеш «Трогательный мир марийской культуры» лӱман ончерым ямдыла. Тушко тоштерын шӧртньӧ фондшо гыч сӱрет коллекций пура. Брайыльын шрифтше дене возымо текст, йӱк, барельеф да аромокомпозиций дене пойдарыме ончер сокыр да начарын ужшо-влаклан ямдылалтеш. Инклюзивный ончер нерген кумданрак черетан сюжетыште.

Осмин Йыван, Василий Регеж-Горохов да Юрий Исаков… Тачысе кечын нунын лӱмышт поэзий аланыште чӱчкыдынак шокта. А «Давай на равных говорить…» проект кышкарыште нунын сылнымут саскашт кок йылме дене йоҥген. Проектын черетан погынымашыже шукерте огыл Йошкар-Оласе актёр пӧртыштӧ эртен.

Рвезе-влакым армий илышлан ончылгоч ямдылат. Тений самырык-влакым шуарыше «Авангард» рӱдерыште кок тӱжемат вичшӱдӧ наре рвезым туныкташ палемдыме. Сарзе сынан сбор-влак кажне арнян эртат, нуно вич кече шуйнат. Рӱдерыште рвезе-влак армийысе паша кышкар дене келшышын илат. Нуно нарядыште шогат, сар курал дене пашам ышташ тунемыт, строй дене коштыт, а эн тӱҥжӧ - дисциплиныштым пеҥгыдемдат. Ты гана «Авангардыште» сузлаште тунемше 100 утла рвезе чумырген.

Йочасадыште - этнографий тоштер.

2024 ийыште «Оласе йырвелым йӧнаным ыштымаш» федерал проект кышкарыште Йошкар-Олаште тӱшкан пайдаланыме 3 верым шотыш кондат. Нине кумдыкым рӱдолаште илыше-влак шке ойыреныт. Нунын коклаште - кӱртньыгорно вокзал кумдык, Тарханово парк да Марий парк. Кумданрак черетан материалыште.

Кумда сцене, гримерко, кулис, зал тич погынышо калык – тиде артистын илышыже. Артист лияш пӱртӱс пуымо мастарлык гына шагал. Тудын дене пырля чонышто улшо усталыкым калык ончыко лукман. М.Шкетан лӱмеш Марий кугыжаныш драме театрын артисткыже Галина Иванова тидым моткоч сайын пала. Тудо ынде 25 ий театрыште тырша. Кажне гана оҥай, шкешотан, шонаш таратыше роль-влакым чоҥа. 3-шо мартыште тудын бенефисше лиеш.

Ачамландым аралыше сарзе еш комитет штабын представительышт Республикысе курчак театрыште конференцийыш чумыргеныт. Вашлиймашке герой-влакын авашт да пелашышт, волонтер ден районласе штабын еҥышт толыныт. Туштак «Талешкын аваже. Талешкын пелашыже» проектын черетан фотоончерже почылтын. Волонтер-влакын ыштыме пашашт, тыгак комитетын еҥже-влаклан юридический полышым пуымо шотышто доклад-влак йоҥгеныт. Тылеч посна маскировочный сетьым пидме, салтаклан «Награда из дома» медальым ыштыме, кукшо душым чумырымо шотышто мастарлык-класс-влак лийыныт.

Йолыш - ечым, кидыш – винтовкым. Кужмарий ял шотан илемыште Элым аралышын кечыжым 5-ше ий почела спорт пайрем дене палемденыт. Тений эстафетышке еш дене ушненыт.

Туныктымаш аланышке пурталтше вашталтыш. 2023 ий 1 сентябрь гыч школлаште директорын советникше-влак пашам ышташ тӱҥалыныт. Тыгак у тунемме идалык гыч 10 да 11 классласе ӱдыр ден рвезе-влак историй предметым икгай учебник почеш тунемыт. Нине вашталтыш-влак таче кузе шукталтыт? Эфирым умбакыже Оршанке районысо Кугунур школ гыч кондымо материал шуя.

Кушкын шумеке, уста гармоньчо лийыт! Республикысе марий тӱвыра рӱдер «Изи гармоньчо» регион-влак кокласе конкурсым эртарен. Конкурсышто 15 гармоньчо да 3 ансамбль шке мастарлыкшым терген. Нуно Пошкырт, Киров кундемла да Марий Эл Республикын тӱрло районлаж гыч лийыныт.