Тиде кечылаште Ханты-Мансийскыште Финн-угор писатель-влакын конференцийышт эртаралтеш. Тушко марий кундем гыч писатель-влак каеныт. Пӱтынь Российысе конференцийын пашашкыже «Ончыко» журналын тӱҥ редакторжо Игорь Попов, «Кече» (Солнышко) йоча журналын тӱҥ редакторжо-Марий писатель ушемым вуйлатыше Светлана Архипова, Марий Эл тӱвыран сулло пашаеҥже, марий писатель Юрий Соловьев, книгагудо пашаеҥ Татьяна Виноградова, тыгак самырык автор Алёна Яковлева ден Виктория Матвеева ушненыт. Конференцийым пайремлын 30 октябрьыште почыт.

Шыже каникулым сарзе-патриот рӱдерыште эртарат. «Авангард» рӱдер республикын 17 муниципал округшо да Запорожье ола гыч 200 наре юнармеецым сарзе могырым шуараш чумырен. Патырлык урок, спорт да интеллектуал таҥасымаш, психологий тренинг да тӱрлӧ модыш ден конкурс. 8-ше гыч 11-ше класс марте тунемше-влаклан пайдале да поян программе ямдылалтын. Кугу слётын икымше кечынже участник-влак дене Вера Горохова вашлийын.

Сарзе операцийыште улшо салтак-влаклан полшаш. Лачак тыгай шонымаш дене МЭТР телерадиокомпанийыште черетан теле-радиомарафон эртен. 7 гыч 19 шагат марте МЭТР телеканал, МЭТР ФМ да Марий Эл Радиошто вияш эфирыште уна-влак лийыныт. Студийыш республикысе Виктерын, Ачамланде сарзе штабын, ТОС-ын еҥже, сарзе-патриот рӱдер вуйлатыше, шанчыеҥ, волонтёр да мер пашаеҥ-влак ушненыт. Кумданрак сюжетыште.

Йоча да киносымыктышлан пӧлеклалтше у форум. Марий Элыште икымше гана «Йоча КиноМай» поро кумылым ончыктышо киномарафон эртен. У проектын программыштыже киноиндустрийын пашаеҥышт дене усталык вашлиймаш, мастарлык класс да музыкальный кас-влак лийыныт. Йоча-влаклан яра 16 кином ончыктеныт.

Тӱрлӧ калыкын национальный кочкышыжо - ик ӱстелыште. Йошкар-Олаште калыкле кухньо дене мастарлык-класс эртаралтын. Марий Элыште улшо калыкле-тӱвыра автономий-влак шке кочкышыштым ямдыленыт. Тыге ик пӧлемыште долма, хинкали, бешбармак, шергом когыльо да моло сий лийыныт.

Ученый, туныктышо, студент. Марий кугыжаныш университет йылме да еш йодышым шымлыше еҥ-влакым иктыш ушен. Тиде кечылаште, 28 октябрь гыч 1 ноябрь марте, Йошкар-Олаште «Языки. Культуры. Этносы» лӱман 2-шо тӱнямбал форум эрта. Тудо Калык-влакын икоян улмо кечыштлан пӧлеклалтын. Форумым почмаште мемнан съемочный гурппына лийын.

«Марий шыже» сымыктыш фестиваль концерт программыж дене калыкым куандара. Кок тылзе жапыште шуйнышо фестиваль моло кундемла гыч толшо коллектив-влакым чумыра. Шукерте огыл Яков Эшпай лӱмеш кугыжаныш филармонийын сценыштыже Башкортостан Республикысе калык семӱзгар оркестр «Музыка рожденная ветром» программым ончыктен. Кумданрак – Лира Матвееван материалыштыже.

СВО-н участникше-влаклан полшаш. Шушаш кушкыжмын, 29 октябрьыште «МЭТР» телеканал, «Марий Эл Радио» да «МЭТР ФМ» «За СВОих» теле-радиомарафоным эртара. Ты шкешотан акций салтак-влаклан окса надыр дене полшаш виктаралтын. Теле- да радиостудийыш Республикысе Виктерын, Ачамланде сарзе штабын, ТОС-ын еҥже, сарзе-патриот рӱдер вуйлатыше, шанчыеҥ, волонтёр да мер пашаеҥ-влак толыт, шуктымо паша дене палдарат.

Морко районышто «Мо? Кушто? Кунам?» интеллектуал модышын кумшо этапше эртен. Ты погынымаш Морко районын 100 ияш лӱмгечыжлан да Марий калыкын 12-шо погынжылан пӧлеклалтын. Сандене тиде гана модмашке Мер каҥашын да Марий конгрессын активше ушнен. Чылаже куд команде таҥасен. Участник-влаклан 5 турым эрташ кӱлын. Кажныштыже вич йодыш лийын. "Марий Эл Республике: теҥгече, таче", "Книга гыч персонаж", "Мер каҥаш", "Марий йылме да литератур нерген йодыш да молат.