Шӧр сатушко маркировкым ышташ тӱҥалыт. Тидын шотышто Постановленийым 15 декабрьыште пеҥгыдемденыт.  20 январь гыч шӧр сатум ыштыше-влак шке кумылын маркировкым шындымашке ушнен кертыт. А теве 1 июнь гыч чыла сыр да мороженыйыште маркировко лиеш, 1 сентябрь гыч 40 сутка дечын шуко аралалтше шӧр сатушко, а 1 декабрь гыч -  40 сутка дечын шагалрак аралалтше сатушко маркировкым ыштышаш улыт. 

Йошкар-Олаште 2022 ийыште могай кундемым тӱзаташ тӱҥалыт? Нине вер-влакым Йошкар-Олаште илыше-влак шкештак ойырат. Йӱклымаш 20 январь гыч 18 февраль марте шуйна. Рӱдӧ олаште илыше-влак тидын шотышто шке темлымашыштым оласе администрацийышке колтен кертыт. Тиде радамыште йолешке-влакын коштмо верышт -тротуар, бульвар, парк, сквер, площадь да моло кумдык-влак лийын кертыт. Эн шуко темлымашым погышо верым рейтинг йӱклымаште ойырат. Тений Йошкар-Олаште тиде программе почеш 12 верым шотышко кондат. Тиде – йолешке-влакын коштмо верышт, Рӱдӧ каныме паркын ужашыже, тыгак «Планета» ужалыше рӱдер шенгелне вер, тушто Глезденев лӱмеш сквер лиеш. 

Марий Эл гыч физике дене туныктышо Ольга Костюнина «Российысе идалыкын туныктышыжо» российысе конкурсышто шке пашаж дене палдара. Ольга Анатольевна Советский поселкысо 3-шо номеран школышто физикым туныкта. Конкурсын российысе этапшым 25 январьыште Москваште пайремлын почыт. Туныктышо-влак «Методический мастерской», «Урок» да моло тергымашым эртат. 

Санитар авиацийын вертолетшо кодшо ийын нелын черле пациент-влакым кондыштараш кавашке 35 гана нӧлталтын. Рӱдоласе эмлымверлашке тора районла: Курыкмарий, Юрино, тыгак Волжск, Шернур, Морко районла гыч чылаже 37 пациентым конденыт. Инфаркт да инсульт дене пациент-влакым Йошкар-Оласе эмлымверын сосудистый рӱдерышкыже, тыгак республикысе клинический эмлымверышке, республикысе онкологий диспансер да перинатальный рӱдерышке. Санитар авиаций вашкеполышлан кодшо ийын 15 миллион теҥге ойыралтын. Тений вертолет нелын черле пациент-влакым кондаш 39 гана чоҥештышаш. Ешарен кодаш лиеш, Марий Элыште лишыл ийлаште вертолетный площадкым чоҥышаш улыт.  

Марий Элыште, моло регион семынак коронавирус деч вакциным шындат. Кызыт прививкым тӱшкан шындымаш  гына ӱшаным пуа. 60% калыкым вакцинироватлымеке, лӱдыкшо вирус чот ок шарле. Кундемыштына ик эн ончыч медицине пашаеҥ-влак, туныктышо да социал аланыште тыршыше-влаклан прививкым шыҥдат. Кызыт Ковид-19 деч вакциным кажне кумылан еҥ шынден кертеш. Прививкым эн ончыч хронический черан да илалше еҥ-влаклан шындаш темлат. Но тидын деч ончыч шке эмлыше врач ден мутланыман. 

Инфекционный стационарлаште эмлалтше-влакын чотышт 873 еҥ марте шагалемын. Пытартыш суткаште 69 пациентым стационарла гыч эмлалтмеке, мӧҥгышт колтеныт, 54 еҥым пыштеныт. Тидын нерген тазалыкаралтыш министерстве увертара. Чыла гаяк эмлалтше еҥын -  пневмоний, 300 утларак пациентын коронавирус пеҥгыдемдалтын, 31 еҥ шодын искусственный вентиляцийыште, 400 утла кислород полшымо дене шӱла. Пытартыш суткаште республикыште 45 еҥын тиде вирус лабораторно пеҥгыдемдалтын. Чылаже республикыште 10 тӱжем утла еҥын коронавирус лийын, 8000 утла еҥ эмлалтыныт.  

Йошкар-Олаште национальный проект почеш тений Панфилов уремым тӧрлат. Пашам «Корно сеть» регионысо проект дене келшышын шукташ тӱҥалыт. Кызыт корным чоҥаш подрядный организацийым ойырат. Ик километр наре корнышто тошто асфальтым фреза дене налыт, корно воктене бордюр кӱйым вашталтат, корно пале, разметке-влакым ыштат. Пашам 15 апрельыште тӱҥалын, 1 июль марте мучашлышаш улыт. 

Марий Элыште калык переписьлан ямдылалтыт. Тудо пытартыш гана кагазыште возен кодымо да икымше гана электрон йӧным кучылтмо лиеш. Ушештарем, тудо ӱмаште октябрь тылзыште лийшаш ыле, но пандемий шарлымылан кӧра ты пашам 2021 ийыш кусареныт. Переписьым эртарыме годым цифровой технологийым кучылтыт. Кажне переписчикын планшетше лиеш. Тыгай йӧн тӱрлӧ йоҥылыш деч утлаш да уверым писынрак обрабатыватлаш полша. Переписчик дене ынеда вашлий гын, «Госуслуги» портал дене пайдаланен кертыда але МФЦ-ыш – шуко функциян рӱдерыш толын кертыда.   Ушештарем, калык перепись 1 апрельыште тӱҥалеш да ик тылзе жапыште элна мучко эрта. Тудо калыкын чотшо, еҥ-влакын кушто пашам ыштымышт, национальностьышт, шинчымашышт нерген уверым пуа. Тидын нерген Марий Элысе виктер председательын икымше алмаштышыже Михаил  Васютин «Марий Эл Радион» эфирыштыже лиймыж годым «Студийыште – уна» программе годым каласкален.

Звенигово олаште у социал рӱдерым ыштен шуктеныт. Тушто технике базым пойдареныт, тыгак калыклан социал полышым у семын пуат. Тыгайже ты марте республикыште лийын огыл. Кодшо ийын кундемыште национальный банкын отделенийже калыклан социал полышым саемдыме шонымаш дене,  кок пачашан оралтым яра пуэн. Тудым тӧрленыт, леведышым вашталтеныт, электрике да шокшым пуышо системым саемденыт, кумдыкым тӱзатеныт. Коляске дене толшо-влаклан подъемник уло. Калыкым социально обслуживатлыше комплексан рӱдерым да еҥ-влаклан социал полышым пуышо рӱдерым регион вуйлатыше Александр Евстифеев пайремлын почын. Тыште йоча-влаклан модаш, кружок-влаклан пӧлем-влак улыт. Логопед, психолог пашам ышташ тӱҥалыт. Шуко шочшан, нелылыкыш логалше еш, тыгак тазалык шотышто эмганыше-влак тидын дене яра пайдаланен кертыт. Социал рӱдер дене пырля тиде оралтыште аварийно-утарыше службо верланен. Тушто шокшо гаражым, дежурный сменылан пӧлемым, медицине, тунемме кабинетым ыштеныт. 

Звенигово олаште канализаций коллекторым тӧрлаш республикысе кучем эше 7 миллион утларак теҥгем ойыра. Тидын нерген регион вуйлатыше Александр Евстифеев тиде районышто лиймыж годым увертарен. Кызыт Звениговышто канализаций коллекторым тӧрлат. У насос станцийым 1 июль марте ыштен шуктышаш улыт. Аварий нерген ойлаш гын, лишыл кок тылзыште тудым тӧрлаташ палемдат. 

Коллектор жап эртыме семын тоштемын, тиде йодыш 2010 ий гыч пӱсын шога, 2017, 2018 ийлаште республике тидлан ятыр шийвундым ойырен. Кум ий жапыштыже Виктерын резерв фондшо гыч 80 миллион теҥгем палемдыме. Шошо марте улшо ситыдымашым кораҥдышаш улыт. Тыгодым вашлиймаште ешареныт, республикын социал-экономике могырым вияҥмаш программе почеш эрыктыше сооруженийым чоҥышаш улыт. Тидлан 400 утла миллион теҥге ойыралтшаш.