Марий Элыште самозанятый-влаклан кугыжаныш полышым ойырат. «Изирак да кокла предпринимательство тыгак   предприниматель инициативылан полшымаш» нацпроект дене келшышын, тений «Мой бизнес» рӱдер самозанятый-влаклан полша. Тыге, мутлан, профессионал парышлан налогым тӱлышӧ-влак 4,25% марте ставке дене микрозаймым налын кертыт. Индивидуальный предприниматель-влаклан 1 миллион теҥгем, физический лица-влаклан пел миллионым пуэн кертыт. Тидын нерген республикын экномике вияҥмаш шотышто министерство увертара. Ешартыш уверым мойбизнес12.рф сайтыште муын кертыда. 

Каныш кечылаште республикыште эше кок еҥ коронавируслан кӧра ӱмыр лугыч лийын. Республикыште, официал данный дене, пандемий тӱҥалме дечын вара 149 еҥ тиде вируслан кӧра  ӱмыр лугыч лийын. Пытартыш суткаште стационарлашке 30 еҥым пыштеныт, тыге эмлалтше-влакын чотышт 794 еҥ марте шагалемын. Чумыр ситуацийым ончалаш гын, пандемий жапыште регионышто чылаже 10 400 еҥ тиде вирус дене черланен, пытартыш суткаште 46 еҥлан тиде диагнозым шынденыт. Россий оперативный штабын уверже почеш, мемнан элыште ик суткаште ковид-19 дене 20 тӱжем дечын шагалрак еҥ черланен, тыгайже пытартыш жапыште ноябрь дечын вара лийынат огыл. 

Республикысе клинический больницыште у компьютерный томографым вераҥденыт. Пандемий жапыште тушто коронавирус але тудын лийын кертме лӱдыкшӧ дене пациент-влакым тергат. Аппарат пациентым вошт ужеш, но пандемий жапыште тӱҥ шотышто шодым тергат. Черле-влак тышке ончылгоч возалтын толыт. Стационар да поликлиникылашке толшо-влак дене ынышт вашлий, манын, нуно  посна омса гыч пурат. Йошкар-Олаште лишыл жапыште оласе поликлиникылаште ковид-19 дечын черле-влакым эмлаш, тыгак черым ончылгоч палаш диагностике  рӱдер-влак лийыт. Тушто пациент-влаклан амбулаторно полшаш тӱҥалыт. 

У зданий, у оборудований. Параньга районысо Ондропсола да воктенсе кок ялыште илыше-влак ынде тачысе жаплан келшыше медицине полышым налын кертыт. Тыште идалык тӱҥалтыште у фельдшер-акушер пункт пашам ышташ тӱҥалын. Тудым ик тылзат пеле жапыште тошто пу зданий олмеш чоҥеныт. 

Звенигово олаште Гагарин уремыште канализационный коллекторым тӧрлаш Республике Правительствын резерв фондшо гыч 7 миллион утларак теҥгем ойырат. Тидын шотышто постановленийышке кидпалыжым регион вуйлатыше Александр Евстифеев пыштен. Кодшо кечылаште республике вуйлатыше Провой велне лийын, да шошо марте пашам ыштен шукташ кӱштен. Ушештарена, объектым 2018 ий гыч тӧрлат. Кодшо ийын Республике правительствын полшымыжо дене Пушкин да Школьный уремлаште канализационный коллекторын ужашыжым тӧрленыт. Кум ийыште чылаже тиде пашалан 80 миллион теҥге ойыралтын. Тачысе кечылан напорный да самотечный коллектор-влакым оптен шуктеныт, канализационный насосный стацийын монтажшым ыштеныт, тыгак у станцийым чоҥаш тӱҥалыныт. Пашам тений 1 июль марте мучашлышаш улыт. 

Самырык, чолга, у шонымашым илышышке пуртышо да пашам вораҥдарыше-влак. Йошкар-Олаште сылнымут, сымыктыш, архитектур, шанче да технике областьыште ойыртемалтше самырык-влакым саламленыт. Самырык-влаклан республикысе кугыжаныш премий-влакым  Регион вуйлатыше Александр Евстифеев кучыктен. Палемдалтше-влак радамыште «Марий Эл Радион» пашаеҥышт: Володя Матвеев, Жанна Федорова, Владимир Аптулаев. 

Сӱретче-реставратор Валерий Ершовын ончерже 22 январьыште почылтеш. «Хранитель времени» лӱман ончер тудын 75 ияш лӱмгечыжлан пӧлеклалтын. У экспозиций коллекционерын кокымшо шӱлышым пуымо пашаже-влаклан пӧлеклалтеш. Графика, живопись, кидпаша сымыктыш паша-влакым сӱретче 1961 ий годсек пога. Республикысе сӱретсымыктыш тоштерыште почылтшо ончерыште тудын пытартыш ийлаште уэмдыме сӱретше-влакым ужаш лиеш. 

Академический музыкым туныктышо-влаклан Российыште грант-влакым пуаш тӱҥалыт. План дене кажне ийын 150 наре грантым пуаш тӱҥалыт. Тидын радамыште йоча сымыктыш школлаште туныктышо-влаклан чылаже 100 грантым - кажныже 500 тӱжем теҥге дене,   кокла да кӱшыл тунемме верлаште пашам ыштыше 50 педагоглан 1 миллион теҥге дене пуат. Тачысе кечын Российыште 5000 утла йоча сымыктыш школ, 47 ВУЗ, 162 училище пашам ыштат. Нине тунемме учрежденийлаште 110 тӱжем утла туныктышо тырша. Республикын кажне районыштыжо йоча сымыктыш школ уло. 

Таза капыште – таза чон. Кажне рушарнян Скандинавийысе коштмаш рӱдер занятий-влакым эртара. Мутлан, 24 январьыште кумылан-влакым 9 шагат эрдене «Тазалык» аллейыште вучат. Тренер Алексей Алексеев пелен маскым, перчаткым налаш кӱшта. Занятий годым 1,5 м дистанцийым кучаш темла. Палашлан, скандинавийысе коштмашлан шӱман еҥ-влак рӱдерыш шым ий ончыч чумыргеныт. Пытартыш жапыште тудо районлаштат вияҥеш. А  2019 ийыште   тудым спорт туризмын посна видше семын регистрироватленыт. Кажне занятийым разминке гыч тӱҥалман – палемдат инструктор-влак. Икымше лектышым кок-кум тылзе гыч шекланаш лиеш. Тунам тарванылашат куштылгырак, давленият нормыш толеш. Специалист-влакын мутышт почеш, айдемылан таза лияшлан кечыште 10 тӱжем наре ошкылым ыштыман, тиде 8 меҥге наре лиеш. 

 «Воскресение» кычалше студент отряд Марий кундемын шочшыжо, Йошкар Армийын салтакше Андрей Никитинын медальонжым родо-тукымжылан кучыктен. Андрей Семенович Марий АССР-ыште 1911 ийыште шочын, 1941 ийыште сарышке каен, Великий Новгород олам аралымаште кредалын. Салтак дечын пытартыш серыш 1941 ий 29 сентябрьыште толын. 2019 ийыште «Демянск» кычалше отрядын еҥже-влак Новгородский область Демянский район Алешонка ял воктене иза-шольо шӱгарыште «Смертельный» медальоным муыныт. Тудын дене салтакын лӱмжым пален налыныт да «Воскресение» отрядын полшымыж дене  родо-тукымжылан колтеныт. Медальоным пайремлын кучыктымаште салтак Андрей Никитинын уныкаже-влак Ирина Алексеева, Андрей Никитин, кугезе уныкаже-влак Наталья Алексеева да Екатерина Михеева лийыныт.