Марий Элыште эше ик еҥ коронавируслан кӧра ӱмыр лугыч лийын. Республикыште тиде вирус але тудлан кӧра вияҥше чер-влак дечын 151 еҥ колен. Тидын нерген оперативный штаб увертара. Таче кечын инфекционный стационарлаште 755 еҥ эмлалтеш, 292 пациентын коронавирус пеҥгыдемдалтын, шодын искусственный вентиляцийыште 31 еҥ. Пытартыш суткаште 44 еҥын тиде вирус лабораторно пенгыдемдалтын. 

1 февраль гыч верысе инциативе-влак шотышто конкурсышко проект-влакым налаш тӱҥалыт. Йодмаш да телымашым оласе округ, ола да ялшотан илем-влак дечын вучат. Оласе округ 10 йодмаш дечын шуко пуышаш огыл. Конкурсышто сеҥыше проект-влакым илышышке пурташ республикысе бюджет гыч шийвундым ойырат, тыгодым 5% наре оксам муниципалитет ойырышаш. Документ-влакым 1 сентябрь марте налыт, сеҥыше-влак октябрь тӱҥалтыште пале лийыт, а проект-влакым вес ийын илышышке пуртат. Верысе иницаативылан полыш республикыште икмыняр ий илышышке пурталтеш. Тудын дене пытартыш ийлаште гына, ятыр вере корным чоҥеныт, сквер, памятник-влакым тӱзатеныт, йоча площадкым ыштеныт. 

Йошкар-Олаште шарнымаш да чап идалыкым иктешленыт, оборонно-массовый да сарзе-патриотизм паша шотышто тылзым почыныт. Йӱла почеш, тушко сарзе клуб-влакын еҥышт, кадет классын тунемшышт, юнармеец-влак погыненыт. Пайремле мероприятийыште палемденыт: пандемийым ончыде, Марий Элыште шарнымаш да чап идалыкым сай кӱкшытыштӧ эртареныт. 2020 ийыште шуко мероприятий волонтёр, самырык тукымым сарзе-патриотизм шӱлышеш куштышо рӱдер, кычалше отряд-влакын еҥыштлан кӧра илышыш пурталтын. Тиде – шарнымаш сорта, курымашлык полк, Сеҥымаш окна да моло акций-влак. Ойыртемалтше-влаклан пӧлекым, дипломым кучыктеныт. 

Тений идалык мучаш марте Йошкар-Олаште Марий кугыжаныш филармонийын полатшым чоҥен шуктышаш улыт. Александр Евстифеев объектыште паша кузе кайымым аклен. Чоҥышо-влак апрельыште зданийын фасадшым ыштен шуктен, июньышто кумдыкым тӱзаташ тӱҥалшаш улыт. Тиде полат 5 ий утла чоҥалтеш. Филармонийын коллективыштлан вияҥаш, у зданий шукертак кӱлеш. Республике лӱмгечылан автобусым пӧлеклен, ынде у оралтым чоҥен шуктышаш улыт. Яков Эшпай лӱмеш марий кугыжаныш филармонийым «Культура» нацпроект дене чоҥен пытарат. Чумыржо проектлан 650 миллион теҥге ойыралтеш. 

Тиде арняште республикыште илыше-влакым иян да луман игече вуча. Лишыл кечылаште леве лиеш, а теве вӱргече да изарнян регионышто лум   лийшаш. Кушкыжмын икмыняр градуслан йӱкшемда, садланак корнылаште ий налеш, автомашинам виктарыше да йолешке-влаклан тӱткырак лийман. Ончылгоч палемдыме почеш 27-28 январьыште республикыште 0 гыч 5 градус марте йӱштӧ лийшаш, ночко лум лийын кертеш. Йӱштӧ республикышке февральын кокымшо пелыштыже  пӧртылын кертеш. 

Каныш кечылаште куштылго атлетике дене республикысе таҥасымаш лийын. «Игорь Петровын мемориалже» лӱмеш таҥасымашке шуко спортсмен чумырген. Шке жапыштыже Игорь Владимирович ятыр спортсменым, СССР спорт мастерым ямдылен. Тудын воспитанникше-влак Марий Эл республикын рекордшым ик гана веле огыл шынденыт. Марий Эл физический культурын сулло пашаеҥже, шке жапыштыже куштылго атлетике дене Республике сборныйын кугурак тренеже лӱмеш таҥасымашке ятыр спортсмен ушнен.

Республикысе колонийлаштат студент-влак улыт. Наказанийым шуктышо виктем увертара: 6-шо номеран исправительный колонийыште шинчыше 18 еҥ Российысе ВУЗ да колледжлаште шинчымашым пога. Тунемме процессым виктараш проектын координаторжо семестрлан ик гана колонийышке толеш, тунеммашлан кӱлеш материалым конда. Студент-влак кок смене дене тунемыт, тунемше-влак туныктышо дене онлайн йӧн дене вашлийыт. 

Каныш кечылаште Марий Элысе полиций йӱшӧ вуя руль ончыко шичше 16 автомашина виктарышым кучен. Регионысо ГИБДД виктем увертара: 6 еҥже тыгай осал пашам кокымшо гана ыштен. ДПС каныш кечылаште 500 утла корно правил пудыртымашым шекланен. Тыгак 40 йолешкым административно муткучаш шогалтеныт, 17 еҥже пычкемыш жапыште волгалтарыше пале дечын посна кугорно дене каен. Автомашинам виктарыше-влак гыч йоча-влакым кондыштарыме правилым пудыртышо, да койдымо номер дене кудалыштше-влакат лийыныт.  

Республике чодыра пашам сайын виктарымылан ешартыш оксам налеш. Российын чодыра озанлык министерствыже 10 регионым палемден. Тидлан окса кучылтдымо резерв гыч ойыралтеш. Мемнан республике чодыра пашам виктарыме шотышто ойыртемалтше кундем-влак радамыште. Марий Элын профильный министерствыже  чодырам аралыме, шындыме да моло показатель денат ончылно. Тыгак финанс полышым Ленинградский, Тверской, Костромской, Кировский да моло субъект-влаклан ойырат. Российыште чодыра пашам виктарыше регион-влакым кажне ийын палемдат. Тидын годым 36 тӱрлӧ критерийым шотышко налыт. Тиде  чодыра пожар жапым эртарыме, экономике паша, чодырам шындыме сомыл да молат. 

Российыште чылаже 40 аэропортлан чапланыше еҥ-влакын лӱмыштым пуымо. Мутлан, Москосо аэропорт Михаил Ломоносовын лӱмжым, Воронежысе – император Петр Икымшын, Анапаште – летчик-испытатель Владимир Коккинакинын лӱмжым нумалеш. Лишыл жапыште тиде радамышке Йошкар-Оласе аэроузелат ушна. Тудлан кӧм лӱмжым пуат – тидым республикыште илыше-влак шкешт ойырат.