Мини-лапта дене Республикын чемпионат да кубокшо эртеныт. Каныш кечылаште, чыла санитар правилым шотышко налын, «Марий Эл» куштылго атлетик манежыште эртыше   таҥасымашке районла гыч команде-влак ушненыт. Республикын чемпионатыштыже икымше верыш Звенигово, кокымшыш Советский, кумшо верыш У Торъял районын командыже-влак лектыныт. Марий Эл кубокым ончалаш гын, сеҥыше-влак радамыште Звенигово, У Торъял, Советский район гыч спортсмен-влак. 

Поэтесса Татьяна Пчелкинам «Светлана» премийым налме дене саламленыт. Татьянан лӱмжӧ поэзий тӱняште палыме, ты марте тудо икмыняр книгам луктын. 

 Тиде сылнымут конкурсым Светлана Эсауловам шарныме лӱмеш «Светлана» фонд кок ийлан ик гана эртара. Тиде премийым налше автор-влак «Светланан библиотечкыже» пале дене шке поэзий книгаштым луктыт. Ты марте тиде премийым Алена Яковлева, Раисия Сунгурова, Борис Комаров суленыт да шке книгаштым луктыныт.  

Шкетан лӱмеш марий кугыжаныш драме театрыште у постановкым ямдылат. Тудын негызшылан «Ший пӱян Ший Пампалче» марий калык йомакым налыныт. Инсценировкым драматург Зинаида Долгова келыштарен. Ик эн йӧратыме да сайын палыме йомакын тӱҥ сюжетше тыгай – мотор да лӱддымӧ Пампалчым Вӱдон марлан налнеже. Кочо илыш деч утлаш,  ушан-шотан ӱдыр мом шонен луктеш? Тудлан кӧ полша? Акрет годымак шочшо йомакын содержанийже тачысе жаплан келыштаралтын, сценыште ончыкталтеш. Каласыман, тыгайже мемнан кундемыште икымше гана лиеш. 

У Торъял районышто Сеҥымашын 75-ше идалыкше лӱмеш яллаште шарныктыш-влакым уэмденыт. Кодшо кечылаште Кӱанпамаш ялыште Кугу Ачамланде сарыште колышо да локальный сар-влакын участникышт лӱмеш ыштыме мемориал комплексым почыныт.  

Совет Ушем Герой Георгий Фёдорович Бастраковлан плитам вераҥдыме. Тудо 1917 ий 18 апрельыште Пектансола ялыште шочын да 1944 ий 27 январьыште сарыште геройлын колен. 

Российыште илыше калык-влакын историйыштым ушештараш да марий калык йулам шарналташ угыч йӧн пуалтеш.  Марий Эл визымше гана «Кугу этнографий диктант» тӱнямбал акцийыш ушна. Тений тудо онлайн йӧн дене эртаралташ тӱҥалеш. Туге гынат участник-влакым ик площадке - Чавайн лӱмеш книгагудо чумыра. 

Марий Эл гыч йоча-влак «Вернуть детство» фестивальыште ойыртемалтыныт. Тений тудо онлайн йӧн дене эртен. Тиде фестивальышке интернат- пӧртлаште илыше тулык йоча-влак ушнат да тушто усталыкыштым ончыктат. Кугу конкурсым Юл кундемысе федерал округышто Россий Президентын ӱшанеҥын аппаратше эртара. Марий Эл гыч ӱдыр-рвезе-влак конкурсышко эреак ушнат. Тений мутлан, изи артист-влак «Художественная декламация», тыгак «Оригинальный жанр» номинацийлаште   ойыртемалтыныт. 

Марий Элыште инфекционный стационарлаште эмлалтше-влакын чотышт ик тӱжем еҥым эртен. Черланыше-влакын шуко улмыштлан кӧра, тазалык аралтыш министерстве пыратыш кок кечыште стационарлаште 60 верым ешарен. 

Марий Элыште шылым утларак ыштен налаш эше ик сай йӧн. Оршанка районышто «Шойбулакский» племзавод сӧснам ончымо у комплексым почын. Таче кечын тиде озанлыкын тыгай кугу да кызытсе саманлан келшыше комплексше - визымше. Тыге эшеат шукырак шылым ыштен налаш йӧн лиеш. Комплексым почмаште регион вуйлатыше Александр Евстифеев лийын. 

Республикысе районлаште добровольческий рӱдер-влакым ыштат. План дене нуным вес ийын Медведево, Морко, Советский, Звенигово районлаште, тыгак Волжск да Козьмодемьянск олаште ыштат. Самырык-влакын политике, спорт да туризм министерствыште палдарыме дене, нине рӱдер-влак тазалык дене эмганен вияҥше йоча, кугурак ийготан да неле илыш ситуацийышке логалше-влаклан полшат. Районлаште проект-влакым «Регион добрых дел» российысе конкурсышто сеҥымашлан кӧра, илышышке шыҥдараш йӧн лектын. 

Самырык театр-влакын фестивальшт мучашлалтын. Икмыняр кече жапыште Марий самырык театрын сценыштыже Уфа, Казань, Рязань, Чуваший гыч коллектив-влак толыныт. Эн сай спектакль номинацийыште Рязань ола гыч театр ойыртемалтын. «Эн сай режиссура»  - Марий самырык театрын худоджественный вуйлатыше, режиссер Олег Иркабаев.