Калык писатель Мария Илибаевам шарнен, Пошкырт кундем Балтач район Ӱлыл Йыванай ялысе школ пырдыжеш уста писательлан шарнымаш оҥам почыныт. Тиде школышто ончыкылык писатель шинчымашым поген. Шарнымаш оҥам почмо кечым арам огыл 20 октябрьлан палемденыт.
Российын кум регионышто илыше марий-влак шыже кумалтышыш лектыныт.
18 шыжаште - Санкт-Петербург да Ленинград областьыште илыше марий-влак шыже кумалтышым эртареныт. Тудо Войеково поселко воктенысе шнуй отышто лийын. Организатор-влакын увертарымышт почеш 2019 ийысе семынак комбо да лудо дене кумалыныт. Кумалтыш сомылым Санкт-Петербург олаште илыше, ХI Марий калык погынын делегатше, онаеҥ Эчан Иванов шуктен. Тудлан «Ший корно» марий автономийын чолга еҥже-влак Эчан Кайнеев ден Юрий Брутов полшеныт.
Эҥерлашке колигым колтеныт. Пӱртӱс ресурс министерстве тидын нерген увертара. 3 кечыште Куйбышев вӱд аралыме верышке 59 тӱжем утла нуранголигым (рушлаже стерлядь). Кажныжын кокла нелытше 10 грамм, тыгак эҥерлашке 150 грамм нелытан сазанын колигыжым колтеныт. Тидым эҥер-влакым биологий ресурс дене пойдарыме паша кышарыште шуктат.
Йошкар-Оласе уремлаште ужалкалыме вер-влакым закондымын вераҥдымым, ужалыме правилым тергат. Йошкар-Ола администрацийын специалистше- влак полиций пашаеҥ-шамыч дене пырля арня еда оласе уремлаште рейдым эртарат.
Коронавируслан кӧра паша шотышто нелылыкеш логалше-влак профессийыштым вашталтен кертыт. Марий Элыште октябрь тылзыште у программе вийым налын. Тудын дене келшышын, пашам йомдарен кертше, тунемме учрежденийым пытарыше да пашам кычалше-влак ешартыш шинчымашым налын кертыт. Марий Эллан квото палемдалтын, тений 350 еҥ ешартыш шинчымашым налын кертеш. Таче кечын дисциплине-влакым радамлат. Образовательный учреждений-влакын радамыштым республикын пашам темлыше рӱдерыште «Гражданам»- «Профессиональное обучение» - «Обучение по программе Worldskills Express» палаш лиеш. 
Республикысе инфекционный стационарлаште 980 еҥ коронавирус да тудын лийын кертме лӱдыкшӧ дечын эмлалтеш. Ик суткаште 28 еҥым эмлалтмеке, мӧҥгышт колтеныт гын, 84 еҥым стационарлашке пыштеныт. Шочмо эрлан Йошкар-Оласе больницын инфекционный стационарыштыже 214 пациент эмлалтеш. Ончысо семынак шуко черле Йошкар-Ола, Медведево район да Волжскышто.
Марий Элыште тазалык шотышто эмганен вияҥше-влак коклаште «Абилимпикс» чемпионатым иктешленыт да ойыртемалтше-влакым посна палемденыт. Ий гыч ийыш ты таҥасымашын чекше кумдаҥеш, а тушко ушнаш да шке мастарлыкым тергаш кумылан-влакын чотышт кушкеш. Тений гына чемпионатыште 150 утла тале да чолга еҥ шке виян могыржым ончыктен.
Республикыште автомашина-влакын чотышт койын шукемеш. Марий Эл ГИБДД виктемын увертарымыже дене, 2019 ий мучашлан мемнан кундемыште 24 тӱжем утла грузовой манме автомобиль, 3152 автобус шотлалтыныт. 
Советский район дене эртыше Шернур тракт кугорно волгыдырак лиеш. Йошкар-Ола-Уржум кайымаште, а тиде Советский поселко гыч лекмаште, понар-влакым вераҥдат. Тидлан республикысе бюджет гыч 9 миллион утларак тенге ойыралтеш. Тушто 42 кӱртньӧ меҥге да светодиодан 47 светильникым вераҥдат. Пашам 18 декабрь марте мучашлышаш улыт.
«Призывник» лӱман акций 15 декабрь марте эртаралтеш. Тудым Республикысе МВД Россий обороно министерстве дене пырля эртара. Акций годым 18 ийым темыше да армий радамыште служитлышаш рвезе, тыгак призыв почеш служитлыше салтак-влаклан ятыр мероприятий лиеш. Нуно тӱҥ шотышто самырык еҥ-влакын париот, воспитаний, таза илыш-йӱлалан виктаралтыт. Кызыт военный комиссариат-влакын должностной лицаштлан занятий-влакым эртарат. Тений шыже призыв жапыште республике гыч 700 наре еҥ армий радамышке ушна.
