Республикын лӱмгечыжлан пӧлек. Марий кундемнан Элнет эҥержылан пӧлеклалтше муро шукертак калыкыште ила. Тудым Олег Логинов йоҥгалтара. Семым Иван Егоров возен, мутым Василий Регеж-Горохов. Шукерте огыл, МЭТР телеканалын усталык коллективше мурылан клипым ыштен. Тудым таче «МЭТР» телеканалыште ужын кертыда.
«МЭТР» телеканалын пашаже-влак «Смиротворец» конкурсышто аклалтыт. Конкурсын эксперт ушемже «Этнические и локальные СМИ» категорийыште шорт-листым чумырен. Кызыт жюри нине паша-влакым онча. Конкурсант-влак радамыште «МЭТР» телеканал, мемнан коллегына - Наталья Ямаеван пашаже-влак.
Марий Элыште коронавирус дене утларакшым пенсионер-влак черланат. Тидын нерген Роспотребнадзорын регионысо виктемже палдара. Лабораторно пенгыдемдалтше 6 тӱжем утла случай гыч 2 тӱжем нарыже илалше-влак коклаште регистрироватлалтын. Инфицироватлалтше-влак коклаште медпашаеҥ-влак улыт-1500 утла еҥ, служащий, тунемше-влак 300 наре, силовой структурылаште тыршыше-влак гыч 76 еҥын тиде вирус пеҥгыдемдалтын, пашадыме да моло сферыште тыршыше-влак гыч 984 еҥын коронавирусым регистрироватленыт.
Самырык-влакын полатыштышт олмыктымо паша мучашке лишемын. Пытартыш кок тылзе жапыште тыште леведышым ачаленыт. Ик тӱжемат 500 квадрат метран кумдыкышто шартышым, вӱдым погышо да тудым йоктарыше воронка-влакым вашталтеныт, карнизымат алмаштеныт. Олмыктымо пашалан шийвундым «кугыжаныш услугылан субсидийым ойырымаш» программе почеш пуэныт.
Республикыште образцовый содержаниян пӧрт да тыгаяк лӱман илымвер-коммунал сферын предприятийже уло. Тиде чап лӱмым Йошкар-Олаште Карл Маркс урем 126 номеран пӧрт да «Йошкар-Оласе ТЭЦ-1» муниципал унитарный предприятий суленыт. Диплом-влакым кодшо кечылаште илымвер-коммунал озанлыкым реформироватлаш полшышо фондын вуйлатышыже Константин Цицин кучыктен.
Оршанка районысо Кугунур тӱвыра полат у тӱс дене волгалтеш. Федерал, республикысе, муниципал бюджет гыч тидлан 6 миллион теҥге «Культура» национальный проектын «Культурная среда» регионысо проект дене келшышын ойыралтын. Ты марте тӱвыра пашаеҥ-влаклан келшыдыме верыште усталыкыштым шуараш логалын.
Марий Элын рӱдӧ олаштыже калык-влакын келшымаш пӧртышт лиеш. Тидын шотышто постановленийышке кидпалыжым Российын Премьер-министрже Михаил Мишустин пыштен. Келшымаш пӧртым чоҥаш республикылан 679 млн теҥгем ойырат. Тидын шотышто уверым Россий финанс министерствын сайтыштыже савыктыме.
Марий автономийым ыштымылан 100 ий. Кундемна курымаш лӱмгечыжым вашлиеш. Республикын социал-экономикыжым вияҥдаш Россий Правительстве индивидуальный программым пеҥгыдемден. Тудо ятыр сферым авалта-транспорт гыч ялозанлык марте.
Спортсмен-влакын тазалакыштым тергаш у аппаратно-программный комплекс. Тудым «Демографий» нацпроектын «Спорт-илышын нормыжо» федерал проект дене налыныт. Комплекс спортивный медицине кабинетым пойдара да ГТО нормативым сдатлыме дечын ончыч еҥ-влакын тазалыкыштым тергаш полша.
«Сымыктыш йӱд». 8-ше гана эртаралтше акций тений онлайн лиеш. Кажне ийын ноябрь тылзыште театр, библиотеке, тоштер-влак калыкым вашлийын, оҥай программым темленыт гын, тиде гана нине верлашке шке миен толаш огеш лий. Тыгодым мӧҥгӧ гыч лекде, интернет йӧн полшымо дене тӱвыра учреждений-влакын сайтлашкышт пурен, акцийышке ушнаш лиеш. Театр-влак шке спектальыштым ончыктат гын, тоштер-влак выставке дене онлайн-экскурсий-влакым темлат.
