Марий Эл гыч сатум ыштыше-влак «Российын тамже» национальный конкурсышко ушненыт. Ялозанлык министерствын палдарымыже дене, регион 12 брендым аклаш колтен. Тидын коклаште «Марий Отар» марий мӱкшызӧ-влакын брендышт. Тиде палым 2016 ийыште ыштыме. Таче кечын республикыште 2 тӱжемат 500 наре еҥ мӱкшым куча, утларакше кресаньык да фермер озанлык-влак. Мӱкшызӧ-влакын 36 тӱжем мӱкш ешышт уло. 

Субсидий-влакым йодмаш дечын посна шуят. Социал вияҥмаш министерстве увертара: граждан-влакын тазалыкыштым арален кодымо шот да у коронавирус инфекцийын шарлымыжым шижтараш,  вашталтыш пурен. Документын у редакцийже дене келшышын, илыме верлан да коммунальный услугылан тӱлымӧ роскотлан субсидийым пуымо жап 2020 ий 1 октябрь гыч 31 декабрь пагытыште пыта гын, субсидий эше 6 тылзылан ончычсо кугыт денак йодмаш деч посна ойыралтеш. Кугыт шотышто ойыртем уло гын,  келшыше документым пуымо деч вара угыч шотлен луктыт. 

Марий Элыште федерал адресный инвестиционный программым илышышке пуртымым онченыт. Тиде темым регион вуйлатыше видеоконференций йӧн полшымо дене Россий правительстве председательын алмаштышыже Марат Хуснуллин дене каҥашен. Федерал программе дене республикыште Перинатальный рӱдерым чоҥат, тудым вес ийын ыштен шуктышаш улыт. Финансированийын тичмаш кугытшо 1 миллиард 600 миллион тенге.

28 октябрьыште курыкмарий йылмын кечыже палемдалтеш. Тиде пайрем ийготшо дене але самырык. Тудым курыкмарий районышто илыше мер пашаеҥ-влак 2014 ий гыч йылмызе, профессор Лидия Петровна Васиковам шарнен, эртарат. Лидия Васикова курыкмарий йылмым вияҥдымаште ятыр тыршен, Марий кугыжаныш университетын профессоржо, курыкмарий йылме орфографийым ыштыме комиссийын председательже лийын, «Марий Эл республикыште йылме-влак шотышто закон», Республикысе Конституцийын проектше-влакым ыштымаште тыршен. 

«Усталыкын чекше уке», - маныт калыкыште. Тазалык дене эмганен вияҥше йоча-влак тиде шонымашым эше ик гана пенгыдемденыт. Моткоч сай йӧным «Творчество без границ» лӱман фестиваль ыштен. Начарын ужшо йоча-шамыч тений 4-ше гана погыненыт. Но фестиваль онлайн форматыште лийын. Тушко Российын 4 регионжо, Марий Эл, Чуваший, Татарстан да Угарман кундем гыч 71 йоча ушнен. Нунын усталыкыштым жюрин еҥже-влак 5 номинацийыште акленыт. 

Республикышке грипп дечын йоча-влаклан прививкым ышташ вакцинын кокымшо партийже толын. Тиде кӱлмӧ дечын 85%. Йоча-влаклан прививкым паша кечын веле огыл канаш кечылаштат ыштат. Тыге Йошкар-Оласе йоча больнице 31 октябрьыште, 1, 7, 8 ноябрьыште 10 гыч 13 шагат марте Йошкар-Оласе икымше номеран поликлиникын восстановительный медицине отделенийыштыже кумылан-влакым вуча.

Кум ияш марте йоча-влаклан выплатым йодмаш дечын посна 2021 ий 1 март йотке пуаш тӱҥалыт. Тидын шотышто законышко кидпалыжым Россий Президент Владимир Путин пыштен. Ушештарена, апрель гыч октябрь марте выплате-влакым автоматически шотленыт, ача-ава-влаклан йодмашым возаш кӱлын огыл. 2 октябрь гыч социал аралтыш органлашке йодмашым шке пуаш тӱҥалыныт, кызыт гын, уэш йодмаш дечын посна автоматически шуйымо шотышто кӱштымаш лектын. Тыге пандемий жапыште еҥ-влакын тазалыкыштым аралаш йӧн ышталтеш. 

Владимир Путин федерал правительствылан вес пособий шотыштат рашемдаш кӱштен.   7 ий марте йоча-влакын жаплан черле улмышт годым ача але ава нунын дене больничныйыште шинчен гын, пашадарын 1005 тӱлаш темлат. Тыгодым стажым ончаш огыт тӱҥал. Тиде кӱштымаш шотышто вашмутым министр-влак кабинетын вуйлатышыже Михаил Мишустин 1 декабрь марте пуэн шуктышаш. 

Куженер кундем Тошто Йӱледур ялыште илыше-влакын пӧртлашкышт «канде тул» толын. «Устойчивое развитие сельских территорий» программе почеш Шӱдымарий, Тошто Йӱледур, Йырмарий, Пургак яллашке газ пучым шупшыныт. Тидын дене пырля кӱкшӧ давлениян кок газ пучым колтеныт. Иктыже – Изи Чарнур-Йӱледур могырышко, тудын кужытшо 24 километр. Тидлан 218 миллион теҥге ойыралтын. 

«Марла ойлаш тунемына». Марий тӱвыра рӱдер тыгай лӱман мультурок-влакым ыштен. Проект эше 2017 ийыштак тӱҥалын. Тиде жапыште республикын кугыжаныш йылмылаже дене 26 серий анимационный фильмым ыштеныт. Мултьурок-влакын пытартыш серийлаштыже   йоча-влакым пуртӱсым аралаш, пергаш туныктат. Республикын 100 ийже вашеш «Кӧ патыр», «Рывыж ден тумна» йомак-влак негызеш мультфильмым ыштат. Анимаций фильмыште тӱҥ герой-влак Юкече да Тататьяна лӱман изи ӱдыр. Лишыл жапыште менмнан телеканыштат нине мультурок-влакым ончаш йӧн лиеш. Кызыт гын, нуным Марий тӱвыра рӱдерын сайтыштыже аклен кертыда.