«Знаменский-Паганур-Кугенерка» регионысо корным тӧрленыт. Тушто 5 километр наре кужытым ачаленыт. Икмыняр ий тиде корно уда лийын, садланак тушто кудалыштынат огытыл. «Лӱдыкшыдымӧ да сай качестван автомашина корно» национальный проект дене тудым шотышко конденыт. А  тиде Знаменский поселко гыч «Вятка» федерал кугорно марте, тыгак Паганур шӱгарла гыч Паганур ял марте корным тӧрленыт. Пашам «Марий Эл Дорстрой» акционер ушем шуктен.

Марий Эл курымаш лӱмгечыжлан ямдылалтеш. Марий автономийлан 100 ийжылан Россий Президент Владимир Путинын Указше дене федерал кӱкшытыштӧ ямдылалтме. Тений республикыште лӱмгечылан пӧлеклалтше акций, выставке, концерт, шанче конференций-влак эртат. Юбилейлан ятыр историй шотан объектым реставрироватленыт, марий классик-влакын произведенийыштым чумырымо антологий, историй книгам луктыныт. 

Йошкар-Олаште Самырык театр-влакын фестивальышт почылтын. Тудо 23 октябрь марте шуйна. Фестиваль кышкарыште 5 тӱрлӧ регион гыч толшо театр-влак шке мастарлыкыштым ончыктат. Нунын пашаштым лӱмлӧ драматург, режиссёр да театр критик-влак аклат: нунын коклаште театр критик Дина Давлетшина, театровед Наталья Кульбаева, драматург Сергей Пронин, журналист Павел Подкладов улыт. Сеҥыше-влакым икмыняр номинацийыште палемдат:  «Эн сай драматургий»,»Ээн сай пӧръен роль», «Эн сай ӱдырамаш роль» да молат. Ушештарыман, тиде фестиваль Марий Эл республиклан 100 ий темме вашеш эртаралтеш.

Республик вуйлатыше Шернур районыш миен коштын. Эртыше кечылаште Александр Евстифеев Шернур кундемыште ял да селасе илышым саемдыме шотышто шуктымо пашам терген лектын. Шернур посёлкышто гын, Сеҥымашлан 75 ий темме лӱмеш скверым ончен, тыгак Шернур районысак Лажъял школышто ачалымаш пашам терген. 

  Республикын вуйлатышыже Александр Евстифеевын посна ямде улмо режимым 15 ноябрь марте шуйымо дене, тÿшка верлаште маске дене коштмым тÿткынрак тергаш тÿҥалыныт. Эртыше кечылаште Роспортребнардзор кучемын еҥже-влак, тыгак полиций да администрацийын  пашаеҥже-влак кевытлаште, моло услугым пуышо тöнежлаште аралтыш маске да санитайзер-влак дене пайдаланымым тергеныт. Ушештарена, маске деч посна коштмылан 1 гыч 30 тÿжем марте штрафым пуэн кертыт. Чыла темлымашым шотыш налаш тыршыза.

    Республикысе шанче да туныктыш министерствын палдарымыж почеш шушаш 2021-ше ийыште Марий Эл мучко 575 у ясельный верым ямдылышаш улыт. Ушештарыман, «Демография» национал проект да «Развитие образования» кугыжаныш программе кышкарыште 2019-ше ийыште гын Волжск олаште, Йошкар-Олаште, тыгак Знаменский посёлкышто у йочасад-влакым почмо. 

Эртыше каныш кечылаште Йошкар-Олаште эше ик у чапкӱм почыныт. Тиде «Тёплая речка» трактир воктен верланыше туризмлан пӧлеклалтше композиций. У чапкӱм почмашке республикын вуйлатышыже  Александр Евстифееват миен коштын.  Тудо палемден: пытартыш жапыште Марий Элыш толын коштшо-влакын чотышт койын кушкын. Лач пытартыш ий гына икмыняр чаракым ыштен. Но туге гынат, вес кундемлаште илыше еҥ-влаклан Марий Эл республике утларак да утларак оҥай вер-шӧрыш савырна. 

Корно озанлык пашаеҥ-влак лӱмеш эн поро мут йонген. Эртыше кечылаште корно озанлык пашаеҥ-влак шке пайремыштым палемденыт. Республикын вуйлатышыже Александр Евстифеев ты озанлыкыште тыршыше чыла пашазым профессионал кечышт дене саламлен. 

Йочасадлаште ешартыш верым ыштат. Тений идалык муачш марте 1000 утла ясльыште вер лийшаш. Вес ийын 575 верым ыштат. 2021 ийыште Медведево районышто Нурма селаште 55 верлан йочасадым ышташ тӱҥалыт. Тений идалык мучаш марте Йошкар-Олаште Молодежный микрорайонышто да Прохоров уремыште 320 верлан йочасад-влакым ыштен шуктат. Тений июль тылзыште Медведево поселкышто Чехов уремыште 100 верлан йочасадым ышташ тӱҥалыныт,  нылымше кварталыште рӱдоласе Мирный микрорайонышто да Руэм поселкышто у йочасад-влакым негызлат, нуным вес ий марте ыштен шуктышаш улыт.