Пандемий жапыште пашам йомдарыше-влаклан жаплан ешартыш паша верым ыштат. Мутлан, организаций тичмаш огыл паша кечыш куснен, але пашаеҥым тӱлалтдыме отпускыш колтен, тыгай годым пашаеҥ-влаклан жаплан паша верым темлен кертыт. Тидын нерген Республикыште паша да калыклан паша верым ситарыме шотышто департамент вуйлатышын алмаштышыже Александр Лазарев увертарен.
Театр-влак шке омсаштым почыт. Регион вуйлатышын Постановленийже дене, концерт да спектакльым залыште улшо вер гыч пелыже яра гын, ончыктен кертыт. Тыгодым чыла санитар правил шукталтшаш. Пандемий жапыште театр-влак ончышо дене вашлиймашлан ямдылалтыныт, спектакль-влак онлайн йӧн дене эртеныт. Ик эн ончыч шке омсажым Константинов лӱмеш руш академический театр почеш.
Инфекционный стационарлаште коронавирус да тудын лийын кертме лӱдыкшӧ дене 276 пациент эмлалтеш. 21 августлан ик суткаште 27 пациентым колтеныт гын, 24 еҥым пыштеныт. Эмлалтше-влак гыч утларак еҥын - 270 пневмоний, 102 еҥын коронавирус инфекций пеҥгыдемдалтын, 103 еҥ нелын черле, 9 еҥ шодын искусственный вентиляцийыште. Тидын нерген Тазалык аралымаш министерстве увертара.
Июльышто республикыште 620 йоча шочын. Кӧргӧ политике министерствын данныйже дене, эрге-влак, ӱдыр дене таҥастарымаште, шукырак шочыныт. Эн чӱчкыдын Максим, Артем, Илья, Анастасия, Виктория, Анна семын лӱмденыт. Шуэн вашлиялтше лӱмымат пуэныт, тиде мутлан, Леон, Соломон, Анита, Оливия, Миа.
3 сентябрьыште Марий Элыште «Сеҥымаш диктант» акций лиеш. Тений тудым шарнымаш да чап идалыклан пӧлеклатше акций радамышке пуртеныт. Тудын тӱҥ шонымашыже - Кугу Отечественный сар нерген шарнымашым арален кодаш да улшо шинчымашым тергаш. Акцийым возымо верым кажне регионышто ыштат, тыгак сеҥымаш идалык ийгот дене 75 вер вес эллаште лиеш. «Сеҥымаш диктантым» онлайн-йӧн денат возаш лиеш.
У тунемме ий вашеш Кугыжаныш автоинспекцийын пашаеҥышт рӱдоласе школлашке лектыныт. Тушто корно лӱдыкышыдымылыклан пӧлеклалтше стенд, кабинетым ончалыныт. Технический надзор могырым гын, школ автобус-влакын улшо йодмашлан келшен толмыштым акленыт. Школ воктене гын, автоинспектор-влак корно пале уло але уке, йолешке-влаклан вончаш верын келшен толмыжым онченыт.
«Творцы и хранители» еш фолькор ансамбль-влакын регион-влак кокласе фестиваль тений онлайн эртен. Тушко Марий Элын 10 районжо гыч 35 еш коллектив, тыгак Пошкырт кундемын 7 районжо, Киров кундем, Татарстан республике, тыгак Саратов ола гыч коллектив-влак ушненыт. Жюри усталыкым икмыняр номинаций дене аклен. «Эн сай ещ фольклор ансамбль», «Калык усталыкыште еш династий», «Эн сай фотовыставке», «Калык кочкыш».
Шернур рӱдӧ эмлымверышке самырык терапевт-влак пашашке толыныт. 1 июль гыч медицин университетым тунем пытарыме дечын вара участковый педиатрым пашашке налыныт. Кодшо кечылаште эше кок самырык специалист дене ойпидышым ыштеныт. Иктыже - Екатерина Чурикова. Тудо Марий кугыжаныш университетым тунемын пытарен. Пашашке «Земский доктор» программе дене толын.
Республикын 100 ийжылан шарнымаш медаль лиеш. Тудым республикым тӱрлӧ сферыште вияҥдымаште тыршыше-влаклан кучыкташ тӱҥалыт. Тиде экономике, тӱвыра, промышленность, образований, чоҥымаш, технике да шанче, сымыктыш, здравоохранений, спорт да моло отрасльыштат. «Марий Элан 100 ий» шарнымаш медаль 25 мм диаметран лиеш, тушто рушла да марла возат.
Марий Элыште предприниматель-влакын праваштым аралыше вашталтын. Регион вуйлатышын Указше дене тиде пашам 20 август гыч Сергей Степанов шукта. Ты марте Амир Толгатович Шакиров амалкалче-влакын праваштым аралыше лийын. Тудын дене ойпидышым шӧрымӧ.
