Кидпаша мастар-влакын «Русь мастеровая» российысе конкурс тений онлайн эртен. Тудо 15 гана мастер еҥ-влакын пашаштым аклен. Тений конкурс Чуваший автономийын юбилейжылан пӧлеклалтын. Тушко Архангельский, Белгородский, Вологодский, Ивановский, Нижегородский да моло кундемла гыч 40 утла видеоматериалым колтеныт. Марий Эл гыч «Ӱштым куышо» номинацийыште Галина Кокорина да «Тӱрлымаш» номинацийыште Лидия Веткина сеҥыше лийыныт. Марий Эл гыч мастар-влак Чувашийыште эртыше конкурсышко кажне ийын коштыныт. 

Куженер, Морко, Марий Турек районлаште ГТО нормативым сдатлаш площадке-влаклан у оборудованийым вераҥдат. Кодшо кечылаште Самырык-влакын политике, спорт да туризм министерстве спорт-технологический оборудованийым кондаш ойпидышым ыштен. Тудын дене кум районышто площадкым ыштат. Контракт дене оборудованийым тений кумшо кварталыште кондышаш улыт. ГТО нормативым сдатлаш изирак спорт площадке-влакым ыштыме проект 2019-2024 ийлан палемдалтын. Тиде жапыште республикыште 15 площадкым ыштат да оборудований дене пойдарат. 

Тӱссымыктыш галерей почмо омса кечым эртара. Тудо 23 августышто лиеш. 11 шагатлан Руш тоштерын погыжо гыч «Красный» выставке дене экспресс-экскурсий тӱҥалеш, 11 шагатат 30 минутлан йоча художественный студий-влакын презентацийышт, 11 шагатат 45 минутлан мастарлык-класс-влак студийын презентацийже, 12 шагатат 30 минутлан галерейыште йоча пайрем-влакын презентацийже. Тудым Константинов лӱмеш театрын актержо Антон Типикин эртара. Программылашке чыла кумыланым яра пуртат. 

Дерматолог-влак шочмо палым тергат. 20 гыч 23 август марте Йошкар-Олаште «Дерматоскопия под открытым небом» акций лиеш. Май тылзыште коронавирус инфекцийлан кӧра, республикысе кожновенерологический диспансер меланомо диагностике кечын почмо омса кечым эртарен кертын огыл. Тыгодым тыгай акций-влак кӱлыт. Шочмо пале гыч меланомо-коваште рак чер тӱҥалын кертеш. Тӱҥалтыш стадийыште еҥ тудым огыт шеклане. Ныл кече жапыште 20 гыч 23 август марте 9 гыч 13 шагат марте у прибор-влакым кучылтын, специалист-влак еҥ-влакын шочмо палыштым дерматокосопий йӧн дене тергат. Акций республикысе курчак театр воктене лиеш. Тыгодым чыла санитар правилым эскерат. Марий Элыште меланомо дене шуко еҥ черлана. 2017 ийыште кожвендиспансерыште 600 утла пациентым тергеныт, кодшо ийын акций жапыште гына 450 еҥым тергеныт, идалык жапыште врач-влак кугу предприятийлашке лектыныт.

Марий Элын балет школышко экзамен-влак тӱҥалыныт. Тиде направлений дене 20 еҥ Уста йоча-влаклан президент-сымыктыш школышто, 24 еҥ тӱвыра да сымыктыш колледжыште «хореографическое искусство» пӧлкаште тунемаш тӱҥалеш. Ӱдыр-рвезе-влакын пластике да куштен моштымо мастарлыкыштым ончат. Балет артист-влакым ямдылаш куштылго огыл. Паша икмыняр этап дене кая. Марий Элыште тидлан келшыше условий уло. Йоча-влак эн ончыч балет школышто тунемыт, вара тӱвыра да сымыктыш колледжын хореографий отделенийыште, тыгак Марий кугыжаныш университетын «Педагогика балета» специальность дене шинчымашым поген кертыт. Тушто тунемше-влак ятырын Эрик Сапаев лӱмеш опер да балет театрыште пашам ыштат. 

«Спорт норма жизни» проект дене спорт гимнастике дене олимпийский резерв шотышто спорт школ субсидийым налын. Тудын дене 630 тӱжем теҥгелан инвентарьым уэмденыт. Тыге тренировкым у кӱкшытыштӧ этараш да спортсмен-влаклан кӱкшӧ верышке лекташ эшеат йӧнан лийын. 

Коронавирус да тудын лийын кертме лӱдыкшӧ дене инфекционный стационарлаште  19 августлан 280 пациент эмлалтеш. Тидын нерген Тазалык аралымаш министерстве увертара. Ик суткаште 35 пациентым мӧҥгышт колтеныт гын, 35 пациентым пыштеныт. Шуко еҥын пневмоний, 104 еҥын коронавирус инфекций пеҥгыдемдалтын, 93 еҥын состоянийже неле, 8 еҥ – шодын искусственный вентиляцийыште. 

Марий Элыште тоштер-влакын ассоциацийжым ыштат. «Чудеса земли марийской» культур-турист форумышто регионысо организацийым чумыреныт. Организатор-влакын мутышт дене, таче Марий Эл сылне верла да мероприятийлаже дене ойыртемалтеш. Мемнан кундемыште эко-корно, кава йымалне фестиваль, тоштерла дене илышышке пуртымо проект-влак улыт. Ассоциаций у экскурсионный продукт-влакым ышташ тӱҥалеш. Тудым Евсеев лӱмеш тоштер негызеш ыштеныт.

Республикыште ик суткаште 17 еҥын лабораторно коронавирус пеҥгыдемдалтын, инфицированный еҥ-влакын чотышт 4 тӱжемым эртен. Пандемий жапыште республикыште 36 еҥ ӱмыр лугыч лийын гын, 85 % эмлалтыныт. Медик-влак транспорт да тӱшка верлаште маскым чияш кӱлмӧ шотышто ушештарат. 6 сентябрь марте республикыште посна ямде улмо шотышто режим умбакыже шуйна. Инфекционный стационарлаште коронавирус да тудын лийын кертме лӱдыкшӧ дене 280 еҥ эмлалтеш. 

Озанлык пашаеҥ-влаклан кажне кече шерге. Кызыт уржа-сорла, тыгак мландым куралыт, кокияшым ӱдат. Кодшо ий тыгаяк жап дене таҥастарымаште, тений уржа-сорла писынрак кая. Республикыште пырчан да отызан культурым ӱдымӧ кумдык гыч 20% поген налыныт. Пырче лектыш кокла шот дене ик гектар гыч 25-40 центнер марте. Медведево районышто моло кундем дечын шукырак кумдыкышто поген налме пырчым амбарышке оптеныт.