Республикыште 17 еҥын коронавирус пеҥгыдемдалтын. Инфекционный стационарла гыч ик суткаште 30 пациентым колтеныт, 28 пыштеныт. Тидын нерген республикын тазалык аралымаш министерстве увертара. 25 август эрлан инфекционный стационарлаште 263 еҥ эмлалтеш, тышечын 100 еҥын коронавирус пенгыдемдалтын, 250 утла еҥын – пневмоний.
Йоча-влакын ешартыш шинчымашышт. Тений «Образований» национальный проектын «Кажне йочан сеҥымашыже» федерал проект дене утларак верым ыштат. Шернур районышто 2-шо номеран школышто самырык корно инспектор-влакын кружокышт лиеш, Шернур поселкысо 1-ше номеран школышто илышын лӱдыкшыдымылыкшӧ да шахмат дене кружок лиеш, йоча усталык пӧртыштӧ турист да шахматист-влак школ дечын вара шуаралтын кертыт.
У Торъял районышто ожно годсо автомашинам погышо, коллекционер-влак чумыргат. «Торъяльский фордзон» ретротехнике фестиваль тений кок этап дене эрта. Икте – заочно, кокымшо – очно. Ушнаш шонышо-влак 11 сентябрь марте шке техникышт нерген видеом возышаш улыт.
Марий Элыштат «Кино йӱд» российысе акций лиеш. 29 августышто кастене да йӱдым кумылан-влак российыште лукмо кум кином яра ончен кертыт. Тиде режиссер Клим Шипенко дене ыштыме «Холоп» комедий, Жора Крыжовниковын «Лёд 2» спортивный мелодраме, тыгак режиссер Дарина Шмидт дене сниматлыме «Иван Царевич и Серый Волк 4» анимационный фильмым аклен кертыт.
Параньгаште корно озанлык пашаеҥ-влак 11 тӱжем квадрат метр кумдыкышто асфальтым шареныт. Новый, Тукаевский, Колхозый, Чапаев, Советский, Механизатор-влак, Хасанов уремлаште корным ыштеныт. Тиде пашалан 10 млн наре ойыралтын. Кок корнывожышто вӱд погынен, тиде нелылыкмат кораҥденыт. Параньга администраций дене ойырымо ешартыш шийвундо дене эше 445 квадрт метр кумдыкышто у асфальтым шареныт.
Йошкар-Олаште у коворкинг рӱдер лиеш. Тудым Самырык-влакын полатыште ыштат. Тидын нерген регионысо самырык-влакын политике, спорт да туризм министерстве увертара. Объектым «Образование» национальный проект дене «Социальная активность» регионысо проект дене ыштат. Кабинет-влакым ыштыме годым Волонтер рудер-влак Ассоциацийын фирме стильжым кучылтыт. У вер, коронавирус инфекцийлан кора пуртымо чыла чарымашым кораҥдымеке, самырык-влаклан почылтеш.
Козьмодемьянск тураште Юл эҥерышке 100 тӱжем наре нуранголигым (рушлаже стерлядь) колтеныт. Тидын нерген пӱртӱс ресурс, экологий да йырым йырсе кумдыкым аралыме шотышто министерстве увертара. Кол дене эҥер да ер-влакым биологический ресурслан эҥегекым ыштымылан кӧра пойдарат.
Уста йоча-влаклан президент сымыктыш школышто приемный кампаний. 27 август марте тушто музыкылан кумылан йоча-влакым вучат. Икымше музыкальный классышке фортепиано, скрипке, виолончель, моло семӱзгар дене шокташ кумылан-влакым ӱжыт. Визымше – художественный классышке-ончыкылык сӱретче-влакым погат. Йоча-влакын усталыкыштым тергат.
М.Шкетан лӱмеш марий кугыжаныш драме театр карантин дечын вара шке полатыштыже ончышо-влакым вашлиеш. 29 августышто А.Островскийын «Снегурочка» пьесыже почеш тыгаяк лӱман спектакльым ончыктат. Тиде постановкым ончышо-влакат кӱкшын акленыт. «Майатул» финн-угор театр-влакын фестивальыште жюри гран-при дене палемден.
Марий Элыште коронавирус инфекцийлан 110 тӱжем тестым ыштеныт, пытартыш суткаште 768 анализым. Пандемий тӱҥалме дечын вара республикыште 4144 еҥын лабораторно коронавирус пеҥгыдемдалтын. Тышечын 38,2% але 1585 случай пӧръеҥ-влакын, 61,8% - 2559 ӱдырамаш-влакын.
