Йошкар-Олаште пӧртлашке да социал учреженийлашке шокшым пуымо жаплан ямдылатыт. Паспорт-влак 15 сентябрьлан ямде лийшаш улыт. Шокшым пуымо нерген брифингыште каҥашеныт. Тӱҥ шотышто оборудованийым технически могырым ямдылыме, тыгак калыкын илемывер-коммунал суплыклан улшо парымыже нерген ойленыт. Коммунал суаплыклан жапыштыже тӱлаш кӱлеш.
Республикыште «Чудеса земли марийской» тӱвыра-турист форум шке пашажым мучашлен. Тушто республикын турист-влаклан мотор да сӧрал улмыжо шотышто мутланеныт. Форумышко Россий Туроператор-влак Ассоциацийын исполнительный директоржо Майя Ломидзе да «ТТ-Трэвел» ушемын вуйлатышын алмаштышыже Александр Сирченко толыныт.
Марий Элыште коронавирус дене инфицироватлалтше-влакын чотышт 4 тӱжемым эртен. Пандемий тӱҥалме дечын вара тиде цифр 4028 шуын. Пытартыш суткаште 16 еҥын лабораторно тиде вирусым пеҥгыдемденыт.
Россий Правительстве Марий Элысе медучреждений-влаклан 265 миллион теҥгем ойыра. Тиде окса стационар-влакын ешартыш роскотыштым петыраш полша. Медучреждений-влаклан ешартыш финансированийым ойырымо шотышто распоряженийым премьер-министр Михаил Мишустин пеҥгыдемден. Регион-влаклан 47 млрд теҥгем колтат. Тиде оксам Правительствын резерв фондшо гыч ойырат.
Москваште тиде кечылаште (11-17 авгусышто) регионысо ялозанлык ярминга эрта. Тушто мӱй, коштымо саска да шудо чайым ужалат. Республикын ялозанлык да продовольствий министерстве увертара. Ты мартеат Москваште республикын ярмингаже-влак лийыныт. Тиде ярминга тений эртыше-влак гыч кумшо.
Республикын районлаштыжат «Сай качестван да лӱдыкшыдымӧ автомашина корно» национальный проект дене пашам шуктат. Тыге мутлан, Оршанке посёлкышто нацпроект дене Новый, Рабочий, Юбилейный, Большевистский, Колхозный да Рябинин уремлаште корным тӧрленыт. Чылаже 2,8 км корным ачалыме. Тидлан 32 млн теҥге окса ойыралтын.
Сентябрь тылзыште алкогольым ужалыме шотышто чарымашым кораҥден кертыт. Регион вуйлатыше А.Евстифеев Кугыжаныш Погынлан законопроектым темлен. Тудын дене келшышын, мемнан кундемыште кевытлаште арака ужалымаш шотышто чарымашым кораҥден кертыт. Тидлан амалжат уло-пытартыш жапыште эпидемиологический ситуаций саемеш. Республике коронавирус инфекцийым шижтарыме шотышто чарымашым кораҥдыме кумшо этапыште. Апрель тылзе гыч кевытлаште аракам 14 гыч 18 шагат марте ужалат. Тудын марте республикыште аракам 10 шагат эр 10 шагат кас марте ужаленыт. Кугыжаныш Погынын депутатше-влак закон проектым 12 сессийыште каҥашат. Тудым 10 сентябрьлан палемдыме.
Кугыжаныш автоинспекций сонарзе-влакын пычал кондыштарымыштым терга. 15 август гыч шыже пагытысе сонарлыме жап тӱналын Тидлан кӧра, ГИБДД сонарлыме пычалым терга. Сонарзе-влак тудым лӱмын чехол, кобура але футлярыште наҥгайышаш улыт. Профилактике мероприятий жапыште граждан оружийлан документ уло укем, тугак тудым правил дене келшышын кондыштарымым тергат.
Марий Элыште пакчасаска шулдештын, тыгодым алкоголь да такси шергештын. Маристат июль тылзылан сатулан акым иктешлен. Олма, кешыр, йошкарушмен шергештын, а кияр, лимон, шоган, пареҥге, помидор, ковышта шулдештын. Кодшо тылзыла дене таҥастарымаште, шемшыдаҥ 4 % шергырак лийын, кол -3 %. Медицин сату-влак коклаште термометр 14 % шергештын. Шовынын акше 2 % ешаралтын гын, бензин 1,8%, а теве такси дене кайымылан ончысо дечын 46% шукырак тӱлыман.
Кӱшыл тунемме вер да кокла профессионал шинчымашым налше-влаклан Марий Эл вуйлатышын стипендийже. Кодшо кечылаште регион вуйлытышын распоряженийже лектын. Тудын дене 59 еҥ республике вуйлатышын стипендийжым 2020-2021 ийласе тунемме идалыкыште налаш тӱҥалеш. 28 студент профессионал тунемме организацийыште шинчымашым пога, 22 - ВУЗышто, 9 еҥ - аспирантурышто. Техникум да колледжыште тунемше-влаклан ешарен 1600 теҥгем пуат, кӱшыл тунемме верлаште шинчымашым погышо-влаклан 2400 теҥгем, регион вуйлатышын стипендийжым налше аспирант-влаклан у тунемме ийыште кажне тылзын ешарен 3000 теҥге ойыралтеш. Республике вуйлатышын стипендийжым отлично тунемше, шанче, усталык пашаште, спортышто ойыртемалтше-влак налыт.
