Шым тылзе жапыште республикыште промышленный производство, кодшо ий тыгаяк жап дене таҥастарымаште, 7% шагалемын. Маристат тидын нерген увертара. Кӱртньӧ изделийым, химический вещества, мебель, эм, компьютер, коваште да пу гыч арверым шагалрак ыштеныт. Тыгдым вӱдым пуымо дене кылдалтше отрасль, шӱкым погымаште производствышто шукеммаш уло.
Йошкар-Олаште у магистральный корным ыштыме годым жапым шотышко налман. Александр Евстифеев Киров урем тӱҥалтыш гыч Ширяйково микрорайон гоч Строителей урем марте эртыше магистральный корно ыштымым ончен. «Лӱдыкшыдымӧ да сай качестван автомашина корно» национальный проект дене «Дорожная сеть» регионысо проект дене пашам икмыняр ий шуктышаш улыт.
Самырык шахматист-влакым тӱнямбал чемпион шкежак саламлен, а палыме гроссмейстерлан Марий Эл кугыжаныш суаптарым кучыктеныт. Марий кугыжаныш университет негызеш кок ий Сергей Карякинын шахмат школжо пашам ышта. Тунемме кум залыште компьютер оборудований уло.
Республикын пӱртӱс ресурс министерстве вӱдыштӧ ийын кошто, нурышто да купышто илыше кайыквусым лӱйкалаш 2 тӱжем утла разрешенийым пуэн. Лицензий-влакым 3 август гыч налаш йӧн лийын. Кодшо каныш кечылаште регионышто шыже жапысе сонарлыме пагыт тӱҥалын. Тудо 15 ноябрь марте шуйна.
Волжскышто илыше-влаклан у йӧн. Мобильный медицинский комплекс шке пашажым тӱҥалын. Тыге консультацийым налаш эшеат йӧнанрак. Специализированный автобус-влак вӱргечын да шуматкечын Волжск олан тӱрлӧ районыштыжо лийыт. Врач да медицин пашаеҥ-влак еҥ-влакын улшо йодышыштлан вашештат. Кодшо кечылаште «Тазалык поезд» акций жапыште оласе «Горгаз» микрорайоныш кусныл коштшо медицина комплекс-влак толыныт да Шестаков ден Прохоров урем ушнымаште кум шагат пашам ыштеныт.
Марий телевиденийлан 60 ий. Йошкар-Оласе телевещаний студий гыч икымше передаче 1960 ий 15 августышто лектын. Марий Эл вуйлатышын лӱмжӧ дене телевиденийын пашаеҥже да ветеран-влакым республике виктер вуйлатышын икымше алмаштышыже Михаил Васютин саламлен.
Йошкар-Олаште тений икымше пелийыште 65 тӱжем утла квадрат метр илымверым чоҥеныт. Тиде 2019 ий икымше пелий дене таҥастарымаште, кок пачаш шукырак. Маристат увертара, пелийыште шуко пачеран 11 пӧртым ыштен шуктеныт, але ик тӱжемат 66 пачер. Йошкар-Олаште ик квадрат метр илымвер кокла шот дене 33 тӱжем теҥгем шога.
У микрорайоным чоҥымо годым, йочасад да школ нерген мондыман огыл.
Регион вуйлатыше А.Евстифеев тиде ойым ола мучко эртыме годым ойлен. Ты гана Йошкар-Ола кумдыкым комплексно вияҥдыме ойпидыш дене йочасадым ыштыме йодышым нӧлталыныт. Регион вуйлатыше икмыняр вере лийын. Нине верлаште арендатор-влак йочасадым чоҥышыш, вара муниципал да кугыжаныш погышко кусарышаш улыт ыле. Таче кече марте ик социал объектымат чоҥымо огыл. А.Евстифеев «Фестивальный»микрорайонышто лийын, тушто кок йочасадым чоҥышаш улыт ыле, кажныже 180 верлан.
Марий Элыште кугыжаныш пого министр пашам жаплан 17 август гыч Алексей Вячеславович Плотников шукта. Тидын шотышто указым регион вуйлатыше пеҥгыдемден. Ты марте кугыжаныш пого министр Наталья Севостьянова лийын. Тудо шке кумлжо дене должность гыч каен.
Йошкар-Олаште тений икымше пелийыште 65 тӱжем утла квадрат метр илымверым чоҥеныт. Тиде 2019 ий икымше пелий дене таҥастарымаште, кок пачаш шукырак. Маристат увертара, пелийыште шуко пачеран 11 пӧртым ыштен шуктыныт, але ик тӱжемат 66 пачер. Йошкар-Олаште ик квадрат метр илымвер кокла шот дене 33 тӱжем теҥгем шога.
