«Моско марий тӱвыра рӱдер» республикысе Марий тӱвыра рӱдер дене пырля кызытсе марий муро да сем конкурсым увертарен. Текстым да музыкальный произведенийым возышо автор, тыгак посна, мужыр, тӱшка дене йоҥгалтарыше-влакым тушко ушнаш ӱжыт. Конкурсыш мурым але музыкальный произведенийым йоҥгалтарыман видеом колтыман.

Тӱвыра да сымыктыш школ-влакын у тунемме ийлан ямде улмышт нерген республикысе конферецийыште ойленыт. И.С.Палантай лӱмеш тӱвыра да сымыктыш колледжыште туныктышо-влак эртыше ийым иктешленыт. Конференцийыште В.Куприянов лӱмеш Микряк йоча сымыктыш школлан пайремлын 10 у кӱслем кучыктеныт. 

Марий Элыште эше ик еҥ коронавируслан кӧра ӱмыр лугыч лийын. Оперативный штабын данныйже дене, пандемий тӱҥалме дечын вара республикыште 4178 еҥын инфекцийым пеҥгыдемденыт, 38 еҥ колен. Эртыше суткаште лабораторно 17 еҥын коронавирус пеҥгыдемдалтын, 28 еҥ тиде чер лийын кертме лӱдыкшӧ дене эмлымверышке логалын. 26 август эрлан стационарлаште 260 эмлалтеш, 103 пациентын коронавирус пеҥгыдемдалтын, 254 еҥын пневмоний, 83 еҥ нелын черле. 

Корнылаште шордо дечын шекланыза! Тидым пӱртӱс ресурс министерстве ушаштара. Кызыт шордо-влак мужырым кычалыт, садланак корнылашке лектын кертыт. «Ир янлык» корно пале уло гын, автомашинан кайыме писылыкшым шагатыште 70 километр наре волтыман. Шукыж годым янлык-влак дене кылдалтше корно туткар йӱдым да кастене лиеда. 

Самырык-влак «ИВолга» форумышко чумыргеныт. Тиде гана кугу мероприятий онлайн эрта, садлан спикер да участник-влак утларакын ушнен кертыныт. Форумын пашашкыже ушнышо-влакым Юл кундемысе федерал округышто Россий Президентын ӱшанъеҥже Игорь Комаров саламлен. Форумын штабше Самарский областьын ресурс рӱдерыште верланен. Тылеч ончычсо ийлаште форум Мастрюковский ерыште лийын.  

Марий Элыште тоштер пашаеҥ-влакын профессионал конкурсышт эртен. Сеҥыше-влакым икмыняр номинацийыште палемденыт. Т.Евсеев лӱмеш калыкле тоштерын пашаеҥже-влак Ирина Губанова, Светлана Пасынкова, Надежда Соловьева сеҥыше радамышке лектыныт. 

Параньга, Микряк села, Волжскысо сымыктыш школлашке да И.С. Палантай лӱмеш тӱвыра да сымыктыш колледжышке у семӱзгар-влакым налыныт. Тидлан бюджетла гыч 17 млн теҥге ойыралтын. Тиде окса дене рояль, пианино, баян, кӱсле, компьютер технике да тунемме литературым налыныт. Тӱвыра да сымыктыш колледжыште гын, «Steinway» концерт рояльым налыныт. 2024 ий марте «Культура» национальный проект дене Марий Элын 12 тунемме верлашке семӱзгарым налыт. 

Регионысо банклаште 11 «шояк» оксам муыныт. Тидын радамыште 10 банкното - 5000, икте – ик тӱжем теҥгеаш. Банклаште 100 доллараш кок банкнотым да 10 теҥгеаш тыгыде «шояк» оксамат муыныт. Оксан чын  улмо палыжым  «Россий Банкын Банкнотыжо-влак» мобильный приложенийыште тергаш лиеш. Россий оксан чын улмыжым палаш, Россий Банк кассе пашаеҥ-влаклан дистанционный курсым ыштен. Тудын дене сайтыште палыме лияш йӧн уло. 

Приволжский поселкышто у физкультур-спорт комплексым 1 ноябрь марте ыштен шуктышаш улыт. Александр Евстифеев Волжский районышто лийын. Проект дене у физкультур комплексыште бассейн, спортзал, тренажерный зал лийыт. Таче кечын объект 70 % ямде. Чоҥымаш, архитектур да илымвер-коммунал озанлык министр Михаил Степанов регион вуйлатышылан увертарен. 

Таче Йошкар-Олаште Анна Сидушкиналан шарнымаш оҥам почыныт. Анна Романовна кӱшыл шинчымашым налше-влак марий ӱдырамаш-влак кокла гыч икымше. Тудо 1946 ийыште Москвасе консерваторийым пытарен. Марий кӱсле дене шокташ туныктышо школым чумырышо лийын. 1957 ийыште музыкальный училищыште кӱсле классым почын, тудын ямдылыме кӱслезе-влак ансамбль Москваште Кугыжаныш Кремль Полатыште усталыкым ончыктен.