У тунемме ийыште Юрино районышто «Земский учитель» программе дене кок самырык педагог пашам ышташ тӱҥалеш. С.Лосев лӱмеш Юрино школышко Бызов Николай Олегович толеш. Тудо физический культурым туныкташ тӱҥалеш. К.Кутрухин лӱмеш Горношумецкий школышто англичан йылмым Бызова Алена Альбертовна туныкташ тӱҥалеш. «Земский учитель» программе изи ял да селашке туныктышо-влакым пашам ышташ каяш кумалаҥдыш ышталтын. 

Марий Элыште туныктышо-влакын августысо конференций эртен. Пандемийлан кӧра, тений тудым форматшым вашталтеныт. Икымше гана видеоконференций йӧн дене лийын. А.Евстифеев педсоветышке ушнышо-влаклан салам мутым ойлен. 1 сентябрьыште у тунемме ийыште йоча-влак школышко каят. Тений 10 тӱжем утла йоча икымше классышке толеш. «Образований» национальный проект йоча-влакым туныктымаште у йӧн-влакым  ышта. Республикыште 4 ийлан тиде проектлан 2 млрд наре палемдалтеш. Икмыняр кече гыч республикысе 15 школышто «Точки роста» рӱдер-влакым почыт. Йошкар-Олаште 31 номеран у школ, тыгак Волжск олаште школын у корпусшо почылтеш. «Цифровая образовательная среда» регионысо проект дене тений 64 школлан 140 млн теҥгелан оборудованийым налыт, школ-влакым Интернет деке ушат. «Земский учитель» федерал проект дене ялысе 13 школышко туныктышо-влак толыт, нунылан 1 млн теҥге дене пуат.  Александр Евстифеев туныктышо-влакын профессионал пашаштлан тауштен да чап лӱмым сулышо-влакым саламлен. 

Марий Элысе инфекционный стационарлаште 279 еҥ коронавирус да тудын лийын кертме лӱдыкшӧ дене эмлалтеш. Тазалык аралымаш министерстве тидын нерген увертара. 20 август эрлан Йошкар-Оласе больницын инфекционный стационарыштыже 113 еҥ пневмоний дене эмлалтеш, 62 еҥын коронавирус пеҥгыдемдалтын. Эмлалтше-влак гыч 97 еҥын состоянийже неле, 9 еҥ шодын искусственный вентиляцийыште, 143 еҥ кислород полшымо дене шӱла. Марий Элыште 20 августлан республикыште 17 еҥын коронавирус пеҥгыдемдалтын, пандемий тӱҥалме дечын вара черланыше-влакын чотышт 4078 шуын. Тиде жапыште 36 еҥ ӱмыр лугыч лийын. 

Россий Правительстве Председательын алмаштышыже Марат Хаснуллин селекторный совещанийым эртарен. Марий Элыште «Развитие дорожного хозяйства на период до 2025 года» кугыжаныш программе дене «Одобеляк-Куженер-Параньга» корным ыштат, Йошкар-Ола-Уржум кугорнышто Немда эҥер гоч кӱварым, Звенигово-Шелангер-Морко корно дене Кожвожка эҥер гоч кӱварым тӧрлат. Республикыште Киров гыч Строителей урем марте магистральный корным ыштат.

Оперативный штабын черетан заседанийыштыже у тунемме ийлан ямдылалтме нерген ойленыт. Туныктыш да шанче министр Наталья Адамова увертарен. Школ-влак ача-ава-влаклан школын паша радамжым палдарышаш улыт. Кажне классын посна кабинетше лиеш, расписанийым ыштат, класс-влак икте-весе дене вашлийшаш огытыл. 1 сентябрьлан линейке-влакым у йӧн дене эртараш темленыт, икымше классышке кайыше-влаклан гын, школышко туныктышо дене пырля пайремлын пурымаш лиеш. У тунемме ийлан школ-влак термометрым налыныт. А.Евстифеев избирательный кампанийлан налме 500 термометрым школ-влаклан пуаш темлен. Кызыт тунемме верлаште улшо йодышым рашемдат: кузе класс-влак переменышке лекташ тӱҥалыт, икшывын школышко толмыж гыч тӱҥалын, мӧҥгӧ кайыме марте. 

Пытартыш кечылаште республикыште коронавирус дене черланыше-влакын чотышт шагалемеш, кажне кечын 15 гыч 17 еҥ марте еҥын коронавирусым пеҥгыдемдат. Тидын нерген Роспотребнадзорын вуйлатышыже Светлана Булатова увертарен. Тазалык аралымаш министр Марина Панькова ешарен: «Эмлымверышке логалше-влакын состоянийышт неле. Инфекционный стационарыште 280 еҥ эмлалтеш, улшо вер гыч 52 процентым авалтеныт, эмлымвераште улшо-влак гыч  99 % пневмоний. Ик суткаште эмлымверышке логалше-влак гыч 80 % состоянийже неле. Тидлан икмыняр амал уло: вес кундемлаште канышке-влак мӧҥгеш пӧртылыт, нуно илалше кова-коча дене вашлийыт, пытартыш жапыште илалше-влак коклаште шуко еҥ нелын черлана». 

Республикыште коронавирус шотышто чарымашым лушкыдемдыме. Марий Элын вуйлатышыже А.Евстифеев оперативный штабын заседанийыштыже Республике правительствын Постановленийжым пеҥгыдемден. Тудын дене келшышын, архив паша дене организаций, тыгак физический культур, спорт, фитнес-индустрий объект-влак пашам ышташ тӱҥалыт. Тыгодым 1 еҥлан 4 кв метр кумдык лийшыш, толшо-влак 1, 5 метр дистанцийым кучышаш улыт. 

Марий Элыште Йошкар Книган «Кушкыл. Поҥго-влак» томым уэш савыкташ ямдылат. Тушто улшо информацийым уэмдаш специст-влак Морко, Куженер, Оршанка, Советский районлаште лийыныт. Тидын годым Российын Йошкар книгашкыже пуртымо шуэн вашлиялтше кушкыл-ошалче рушлаже «ятрышникым» уэш муыныт. Тиде кушкылым республикыште 1914 ийыште муыныт улмаш, но тудын дечын вара вашлиялтын огыл. Ты марте тудо республикылан йомшо кушкыллан шотлалтын. 

Параньга районышто «Лӱдыкшыдымӧ да сай качестван автомашина корно» национальный проект дене Елеево-Параньга корно ужашым ыштен шуктеныт. «Марий Эл Дорстрой» предприятийын Марий Турек филиалже корным шошым ышташ тӱҥалын. Тушто тошто асфальтым фрезироватленыт, лакылам петыркален, кок лончо дене тыгыде кӱ-мастике дене асфальтобетоным шареныт.

Юрино районышто Васильевское селаште школым капитально олмыктеныт. Пашам июнь гыч август марте шуктеныт. Юрино муниципал район администрацийын сайтше увертара. Школ негызым пеҥгыдемденыт, школын оралтыжым тӱжвал могыр гыч сайдинг дене ыштеныт, окнам, омсам вашталтеныт. Апрель тылзыште шокшым пуымо системым уэмденыт. Юрино районышто Васильевский школ ик эн тошто. Тудым 1913 ийыште ыштеныт.