Марий Элыште коронавирус инфекцийым шижтараш посна ямде улмо шотышто режимым 25 июль марте шуеныт. Тидын шотышто Регион вуйлатыше А.Евстифеев Указышке ешартышым пуртен.
Морко районышто шуко ий пырля илыше да чапым сулышо еш-влакым «За любовь и верность» медаль дене суапландареныт. Район администраций вуйлатыше Александр Голубков нине еш-влаклан ончыкыжымат йӧратымаш да ӱшанле кумылым, икте-весе коклаште умылымашым тыланен.
Федерал бюджет гычат тудым ышташ шийвундо ойыралтеш. Марий Элын социал-экономике могырым вияҥаш индивидуальный программылан 2020-2024 ийлан 5 миллиард теҥге палемдалтеш.
Шокшо игечыште шукын вӱд воктеке канаш вашкат. Тыгодым туткар-влакат лиедат. Кеҥеж тӱҥалтыш гыч республикыште 15 еҥ вӱдыш пурен каен. Йоча-влакат туткарышке логалыт, кум икшыве азапыш логалын.
Ял озанлык министерствын палдарымыж дене, 16 июльлан шудым план дечын 90% шапашленыт. Южо районышто ятырлан шукырак ыштеныт.
Волжский районысо школлаште 1 сентябрь гыч тӱҥалтыш класслаште йоча-влакым яра пукшаш чыла ямде. Тидын нерген район администраций увертара. Волжский районышто школ-влакын пищеблокыштым ямдылаш 1 миллион утларак ойыралтын.
Марий Элыште эше ик еҥ коронавирус инфекцийлан кӧра ӱмыр лугыч лийын. Тидын нерген «Стопкоронавирус.рф» сайт палдара. Пытартыш суткаште 29 еҥын тиде инфекцийым регистрироватленыт.
«Газпром газораспределение Йошкар-Ола» предприятийын специалистше-влак Кукнур ялшотан илемышке «канде тулым» пуртат. Чоҥымо да монтаж пашам тений идалык мучаш марте мучашлышаш улыт.
Кодшо кечылаште республикын Социал аралтыш министерствыже 3 гыч 7 ий марте йоча-влаклан оксам колтен. Тудым 358 йочалан ойыреныт. Чумыр роскот 11,54 млн. тенгеш шуын.
