Тений биологий да йот йылме дене единый кугыжаныш экзаменым 847 выпускник кучен. Экзамен сайын, нимогай  экшык деч посна эртен. Биологий ден экзаменым 603 еҥ ойырен налын. 

Марий Эл мучко кӱвар-влакым ачалаш 20 миллион наре теҥге ойыралтын. Чылажге вич тыгай кугу кӱварым олмыкташ палемдыме. Тиде: Ургакш, Мушко, Арыпка эҥер-влак гоч транспорт кӱвар, тыгак У Торъял да Мари-Турек посёлко-влакын йыр кайыме – вес семынже объездной - корнышто улшо  кӱвар-влак. Кызыт олмыктымо пашам шукташлан подрядчик-влакым кычалыт, конкурсым увертареныт. 

Россий Федераций кугыжаныш советын паша группыжо видео кыл йӧн дене черетан погынымашым эртарен. Тиде погынымашлан посна виктышым палемдыме, тиде – «Чоҥымаш, илыш-коммунал озанлык да оласе среда». 

Марий Эллан Российын резерв фондшо гыч 1 миллиард утла теҥге ойыралтеш. Россий кугыжаныш думышто пандемий жапыште регион-влаклан полышым пуаш кӱлмо нерген йодышым ятыр гана нӧлталыныт. 

2020-шо ий 15 июль гыч шочшо йоча-влаклан СНИЛсым ышташ лӱмын коштман огыл. Келшен толшо сервисым «Госуслугын» порталыштыже ыштыме. ЗАГСын реестрже гыч пенсий фонд системыш йоча шочмо нерген увер пурымек, икшывын лицевой счётшо вигак ышталтеш да аважлан «Госуслугысо» портал гоч колталтеш. 

Йошкар-Олаште Какшан сер кумдыкым эрыктеныт. Тиде поро пашам шуктымашке Марий Кугыжаныш университетын студентше ден Йошкар-Оласе экологий комитетын пашаеҥже-влак ушненыт. 

Август гыч штраф тӱлымӧ тариф вашталтеш. 1 август гыч машинам виктарыше-влакын техник тергымашым эртыме нерген диагностик картышт ок лий гын – 2 тӱжем теҥге штрафым пуэн кертыт. 

Марий самырык театр у тургымлан ямдылалтеш. Шушаш тургым Марий самырык театрлан – лӱмгече тургым. Тиде амал дене театрын пашаштыже ятыр сай вашталтыш лийын. 

Марий Элысе ДОСААФын авиаций-спорт клубшо юж десант войска кечылан ямдылалтеш. Кажне кумылан десантникым парашют дене тӧршташ ӱжыт. Икымше тыгай тӧрштымаш 18 июльышто эртен. Ветеран-десантник-влак дене пырля республикын сборныйын спортсменже-влак да самырык еҥ-влак тӧрштеныт. 

Кумдан чапланыше «Черемис» мурылан клипым войзеныт. Марий Эл Республикын 100 ияш лӱмгечыже вашеш кундемнан кумдан чапланыше артистше, Марий Элын калык артистше Вячеслав Созоновын йоҥгалтарыме «Черемис» мурылан клип шочын.