27 гыч 30 июль марте самырык туныктышо-влаклан онлайн йӧн дене «Таир-2020» лӱман форум эрта. Тений тиде форумын темыже тыгай лиеш: «Педагогика пашаште – йочам шуарымаш». Тушто туныктышо, воспитатель, туныктышылан тунем лекше выпускник-влак шкеныштым тергаш тӱҥалыт. 

Марий Элын тулпатырже-влак кокла гыч эн сайжым ойыреныт. Кундемысе МЧС виктемыште тыршыше-влак кокла гыч эн сай караул вуйлатышым, эн сай тулпатырым, да пожар аралтышын эн сай пашаеҥжым палемденыт. Тиде конкурс Пемба поселкышто эртен. Ӱчашымаште шке часть ден отрядлаште ончыл верыш лекше утарыше-влак таҥасеныт. 

Тений Марий кугыжаныш университет пеленсе Медицине институтым икымше выпускник-влак тунем лектыныт. «Педиатрий» да «Лечебное дело» специальность дене дипломым чылажге 50 ӱдыр-рвезе налын. 

Марий Элысе Туныктыш да шанче министерстве кугыжаныш экзаменым 100 баллан кучышо-влак дене палдарен. Руш йылме дене 100 баллан экзаменым 5 тунемше кучен. Математик дене гын 4 еҥ 100 баллым поген.

«Сай да лӱдыкшыдымӧ корно» национал проект кышкар дене корно ачалымаш пашам палемдыме деч ончычрак мучашлынешт. Тидын нерген Республикысе транспорт да корно озанлык министр Александр Герасименко Марий Эл вуйлатыше Александр Евстифеев дене вашлиймыж годым палдарен. 

   Эртыше кечылаште «Эн сай чодыра руышо» конкурс эртен. Ушештарена, тиде конкурсым Пӱртӱс ресурс, экологий да йыр улшо средам аралыме министерстве Йошкар-Олан рӱдӧ площадьыштыже 2016-шо ий годсек эртара. Тений эпидемиологий ситуаций неле улмылан кӧра, конкурсым чодыра кумдыкышто эртареныт. Тушко чылаже 30 еҥ ушнен. 

 Йошкар-Оласе эше ик тошто пӧртым реставраций вуча. Кумдан чапланыше Пчелинын пӧртшым  шукын палат. Тудо Карл Маркс уремыште верланен. А теве Какшан серыште тудын родыжын, купеч вате Анна Петровна Пчелинан пӧртшӧ нерген шагал колыныт. Тудат рӱдолаштына ик эн тошто полатлан шотлалтеш. 

   «Марий Чодра» национал парк «Экопарк ВӱдЛэнд» лӱман проект дене Российысе конкурсыш ушнен. «ВӱдЛэнд экопроект» тиде икмыняр ведомствын пырля ямдылыме проектше. Тудын дене келшышын, «Марий чодра» паркыште 5 зоно лийшаш. 

Йошкар-Оласе Благовещенский башньыште Юрино да Килемар район-влакын ончерышт почылтын. «Поликультурная карта» проект кышкарыште тӱрлӧ район шке усталыкше, ойыртемже да тачысе кечылан шуктен шогымо пашаже дене палдара. 23 июль гыч кок пушкыдо районын пашаштым аклаш лиеш. 

Марий Элысе Тазалык аралтыш министерствын палдарымыж почеш 23 июль эрлан республикысе инфекций пӧлкалашке 41 еҥым пыштыме, 44 еным мҥӧнгышт колтымо.