Волжск оласе эмлымверыш шӱмым шымлаш манын, УЗИ-комплексым, тыгак лӱмын тренажерым налыныт. Тидын нерген Волжск эмлымверын тӱҥ врачше Дмитрий Фризин увертарен. 

Таче да эрла Звенигово районышто полиций пашаеҥ-влак йоча-влакым машинаште кузе коштыктымым тергаш тӱҥалыт, тыгак калыклан йочам машинаште шупшыктымо лӱдыкшыдымылык нерген умылтарат.

Курыкмарий районысо Сумки селаште шӱгарлаште верланыше часамлам олмыктеныт. Кодшо ийын, шыжым, ты часамлаш коштшо-влак Юрино селасе Михайло-Архангельск храмын настоятельже, юмынъеҥ Николай Барсуков деке йодмаш дене миеныт. Нуно Курыкмарий районысо Сумки селасе часамлам олмыкташ кӱлмӧ нерген ойленыт. Тиде йодмаш шукталтын. 

Тачысе кечылан Марий Эл мучко 26 чодыра пожарым регистрироватлыме. Нунын кокла гыч 24 пожар кугыжаныш чодыра фондын кумдыкыштыжо лийын да 2 гана тул «Марий Чодра» национальный паркын кумдыкшым авалтен. Йӱлымо чумыр кумдык 11 гектарыш шуын.

Санитар врач-влак эртыше пелийым иктешленыт. Тений 837 еҥ деке пудий пурен. Ӱмашсе тыгаяк жап дене таҥастараш гын – тений 20 процентлан шагалрак. Туге гынат, чыла эмганыше-влак кокла гыч 25 процентше – йоча-влак. 

21 июльышто Марий Элысе МЧС виктемын пресс-конференцийже эртен. Тудын темыже мемнан кундемысе лӱдыкшыдымылык дене кылдалтын. Кодшо ийысе тыгай жап денак таҥастарымаште тений икымше пел ий жапыште республик мучко пожарын чотшо шагалемын. Тыге, 20 июль марте республик мучко 14 еҥ колен. 

Марий Элыште у тунемме ийлан школ-влакым тергат. Комиссийыш тӱрлӧ шӧрынышто тыршыше икмыняр специалист, тыгак МЧСын пашаеҥже-влак пурат. Инспектор-влак поснак пожар лӱдыкшыдымылыкым эскерымаш, автоматик пожар сигнализаций, тыгак еҥ-влакын эвакуацийыштлан да азап нерген увертарыме системылан кугу тӱткышым ойырат.

Марий йылме дене йоҥгышо сылнымут произведений-влакым ынде Интернетыште колышташ лиеш. «Марий йогын» лӱман подкаст-влакым «Яндекс. Музыка», КАстБокс да Эпл Подкастс сервислаште вераҥденыт. Тушто эн ондак Майоров-Шкетанын произведенийже-влакым вераҥденыт. 

Ава капитал полшымо дене Марий Элыште илыште 80%  утла еш шке илыш условийжым саемден. Российын регионал пенсий фондшын увертарымыж почеш, ава капиталым шуко еш илыме верлан налме кредитым петырашлан кучылтын. 

Йоча-влаклан медицине полышым пуаш манын, кызытсе инфраструктурым кучылтын, икшывын тазалыкшым вияҥдыме шотышто программым  илышыш шыҥдарыме да Марий Элыште йоча поликлиникым ачалыме. Ты пашам Морко да Медведевысе эмлымверлаште шуктеныт.