Судебный пристав-влак Кугыжаныш автоинспекций дене пырля черетан рейдышке лектыныт. Ты гана Йошкар-Ола гыч лекмаште Шернур тракт дене автомашина-влакым парымышт уло- укелан тергеныт. Икмыняр шагат жапыште 60 наре автомашинам тергеныт, тышечын 6 еҥын парымышт лийын. Нуно 10 кече жапыште шке парымыштым огыт петыре гын, погыштым виеш ужалымашке луктыт. Ведомствын пресс-службыжо палдара, шукыж годым еҥ-влак парымым верыштак тӱлат.
Корно туткар шукеммылан кӧра, Хасанов уремыште йолешке вончымо верым кораҥдат. Тиде верыште ешартыш понар-влакым шогалтымекат, корно правилым пудыртышо-влак шагалемын огытыл. Сандене Хасанов дене Карл Маркс урем корнывожышто кок вере кнопкан светофорым шогалтат. Кызытеш йолешкылан вончаш у вер ямдылалтеш.
Марий Элыште «Спутник Лайт» вакциным ынде ревакцинацийлан гына кучылташ тӱҥалыт. Кызыт мемнан дене «ЭпивакКорона», «КовиВак» да 1500 наре доза «Спутник Лайт» вакцине-влак улыт. Иммунный системым сайынрак ямдылаш, кок компонентан прививкым ышташ темлат.
Марий Эл – корным сайын чоҥышо да тӧрлышӧ 10 регион радамыште. 8 ноябрьысе данный дене келшышын, «Лудыкшыдымӧ да сай качестван автомашина корно» нацпроект дене пашам шуктымаште ме 6 верыште улына. Корным тӧрлымӧ да чоҥымо нерген регионысо вияҥмаш шотышто Правительстве комиссий Президиумын черетан заседанийыштыже мутланеныт.
Тора кундемыште илыше Алексей Алекеевын фильмже-влак марий пайрем, йӱла дене палдарат. Ты гана кинокомпаний шкенжын идалыкысе пашажым у фильм дене иктешла. «Кок серыште» лӱман у документальный кино Швеций ден Эстоний вашкыл полшымо дене ышталтын. Киношто кумдан палыме эстон поэт Калью Лепик нерген ойлалтеш. Тудын возымо почеламутшо-влаклан муро да романс-влак возалтыныт. Кином 5 декабрьыште поэтын 100 ияш юбилейже лӱмеш Швецийыште ончыкташ шонат.
Марий Эл гыч ансамбль-влак «Балтийская легенда» тӱнямбал кӱкшытан фестиваль-конкурсышто ойыртемалтыныт. Фестиваль Калиниградыште 23 гыч 27 октябрь марте эртен. Мемнан республике дечын 26-шо гимназицйын «Дебют» бальный куштымашын ансамбльже, «Лира» сымыктыш школын «Узоры» ансамбльын куштышо коллективше, тыгак Куяр тӱвыра рӱдерын «Кумушки» фольклор ансамбльже. Коллектив-влак икымше да кумшо вер-влакым суленыт. Фестивальыште нуно марий куштымаш-влакымат ончыктеныт.
Югра кундемыште илыше марий-влакын ушемышт губернаторын премийжым сулен. Тыгай премийже кумыт гына. Иктыже - марий-влакын - "Марий ушем" калыкле-тӱвыра рӱдер" регионысо мер организацийын. Тидын нерген вуйлатыше, Мер Каҥашын еҥже Раисия Сунгурова палдарен. Йӱдвел кундемыште илыше марий-влак шым районышто пырля чумыргат, тӱрлӧ проектым илышышке шыҥдарат.
Урал кундемыште Свердловский областьысе марий-влакын регионысо калыкле-тӱвыра автономийыштым ыштеныт. Конференций оффлайн да онлайн йӧн дене чыла санитар правилым шуктен эртаралтын. Марий Эл дечын конференцийын пашашкыже Лариса Яковлева, оньыжа Эдуард Александрнов, Наталья Пушкина, Эльвира Петрова ушненыт. Тидын дене пырля онлайн йӧн дене Башкортостан, Удмурт республикыла, Тюмень, Казань, Салехард, Нягань олала, Кировский, Нижегородский, Сведловский областьла гыч калыкле-тӱвыра автономийын еҥышт ушненыт.
Йошкар-Олаште уэмден, тӧрлен шуктымо Петров уремым почмашлан чыла гаяк ямде. Тений Воин-Интернационалист гыч Шернур тракт марте корным тӧрленыт. Мэрийыште палдарат: тыште ныл полосан корным чоҥеныт, тыгак газон, тротуар-влакым келыштареныт. Петров уремыште остановко павильон-влакым, урем светильник-влакым вераҥденыт. Йолешке-влаклан вончымо верлам тактильный плитке дене ойыреныт. Тыгак уремыште пушеҥге-влакым шынденыт.
Федераций Советын наградыжым Марий Элыште йоча-влаклан геройлыкым ончыктымыштлан кучыктеныт. Йоча-влаклан таушташ Марий Эл Правительстве председательын икымше алмаштышыже Михаил Васютин, Федераций Советыште Марий Элын сенаторжо-влак – Константин Косачев да Сергей Мартынов миеныт.
