Фотокартычкыште – калык вургемым чийыше йоча-влак.   Межэтнический журналистикын гильдийже «Российын икшывыже-влак» фотоконкурсым эртарен. Тушко Калининград гыч Владивосток марте профессионал да любитель-влак ушненыт. Нуно калык вургеман йоча-влакын фотоштым ыштеныт, чылаже 30 утла калык-влак, а нунын коклаште марий, удмурт, чуваш, татар да молат конкурсышко шке пашаштым колтеныт. Эн ойыртемалтшыжым выставкышке чумыреныт, тудым ятыр регионышто ончыктат. Кызыт выставке Марий Элыште Тимофей Евсеев лӱмеш тоштерыште эрта. Финалист-влак коклаште мемнан кундем гыч конкурсышко ушнышо-влакынат пашашт улыт.

Республикыштына ир янлык дене лийше корно туткар-влак ешаралтыныт. Тений кодшо тылзыште гына республике кумдыкышто машина-влак 11 гана янлык дене тӱкненыт: 8 гана шордо дене, 2 гана – пий да ик гана – мераҥ дене. Шукыж годым янлык-влак дене кылдалтше корно туткар йӱдым да кастене лиеш. Сандене машинам виктарыше-влаклан корнышто чот тÿткö лийман. Кугыжаныш автоинспекцийыште ушештарат: «Ир янлык» корно пале уло гын, автомашинан кайыме писылыкшым иземдыман, тораш волгалтарыше фарым чÿктыман.  Корнышто ир янлыкым ужында гын, тудым сигнал дене лÿдыктыман огыл, а машинам шогалтен, кайымыжым вучен шуктыман. 

Йошкар-Олаште Патриарший площадьыште верланыше Муром оласе чудым ыштыше Пётр ден Феврония святой-влак лÿмеш часамлаште угыч службо-влакым эртараш тÿҥалыныт. Тений гыч тушто эше нунын мощишт аралалтеш. Шнуй Пётр да Феврония деке пиалан еш илышым йодаш толыт. Часамлаште икымше служба 6 июньышто лийын. Йошкар-Оласе Епархийын увертарымыж почеш, тудо вÿргече гыч тÿҥалын рушарня марте 10.00 гыч 18 шагатат 30 минут марте пашам ышта. Каныш кече-влак – шочмо ден кушкыжмо. 

Йошкар-Оласе тунемше ден йочасадыш коштшо-влак 33 тонн макулатурым погеныт. Оласе администрацийыште увертарат: «Плюшкинын кечыже» экологий шотан акцийышке 11 школ ден 39 садик ушнен. Эн шуко макулатурым 34-ше номеран «Улыбка» йочасадыште да 12-шо номеран школышто погеныт. Конкурсышто сеҥыше-влак дипломым, окса пöлекым налыт, молыштлан грамотым кучыктат. Погымо макулатурым умбакыже переработкыш колтат. 

Марий Элыште «ÿшан» телефон пашам ышта. Тудын номерже – 8-800-2000-122. Тудо сутка мучко пашам ышта. Неле илыш ситуацийышке логалше йоча але тудын ешыже  стационар але мобильный телефон гычын йыҥгыртен, психологий полышым налын кертеш. «Ӱшан телефонын» тÿҥ шонымашыже – ешым арален кодаш, ача-ава-влак шке икшывыштым колын шуктышт да йочам умылышт манын виктаралтын. Кумыл уло гын, кÿкшо квалификациян полышым тыгак опекун, воспитатель, туныктышо да молат налын кертыт. 

Кеҥеж пагытлан комендант шагатым кÿчыкемдат. Элкöргö паша министерствын палдарымыж почеш, ийготыш шудымо йоча-влаклан тÿшка верлаште 23.00 шагат гыч 5.00 шагат эр марте кошташ ок лий. Ушештарена, ончыч гын, комендант шагат 22.00 шагат кас гыч 6.00 шагат эр марте шуйнен. Ты жапыште йоча пелен законный представительже огеш лий гын, кугу штрафым пуат. Йÿдым йоча-влаклан уремлаште, парк, сквер, стадион, тÿшкан пайдаланыме транспорт, интернет клубла да моло верлаште лияш ок йöро. 

Марий Элыште йоча-влакым тазаҥдыме кампаний умбакыже шуйна. Роспотребнадзорын Марий Элысе виктемыштыже палдарат: тений кундемыште чылаже 185 йоча учреждений паша ышта. Тышечын 13-шо – тиде ола деч öрдыжсö лагерь, 171-  школ пеленсе лагерь. Тыгак йоча-влаклан ик стационарный палаткан лагерьыште да ик санаторийыште канаш йоным ыштат. Тÿшкан ончалмаште, тений 16 тÿжемат 800 ÿдыр-рвезе тазалыкшым пенгыдемден кертеш. Тылеч посна 2 тÿжем утла йоча республик деч öрдыжто лиеш. 300 еҥ «Артек», «Орленок», «Смена», «Сириус» федерал рÿдерлаште да Российысе тазалыкаралтыш министерствын федерал кукшытан санаторийлаштыже кана.

Марий Эл Самарский область дене вашкылым пенгыдемден. Петербургысо тÿнямбал экономике форумышто Марий Элын вуйлатышыже Александр Евстифеев да Самарский областьын губернаторжо Дмитрий Азаров вашкелшыкыш – рушлаже соглашенийыш –   кидпалыштым пыштеныт. Тыге, кок регион коклаште вашкылым тӱрлӧ областьыште – шанче да техникыште,  ялозанлык да промышленный производствышто, туныктымаш да усталык пашаште – вияҥдаш тÿҥалыт. Тидын деч посна форумышто Марий Элын вуйлатышыже МГИМО ден  Москосо кугыжаныш юридический академийын ректоржо-влак дене вашлийын, ончыкылыклан паша планым радамлен. 

Йошкар-Олаште калыкле вокал-инструментал ансамбль-влакын фестивальыште гран-при дене  Курыкмарий кундем гыч кумдан чапланыше «Аяр» группо палемдалтын. Пайремышке 12 тÿрлö этно-группо да ансамбль ушнен. Куанен палемдыман: пошкудо Татарстан да Чуваший кундем гычат коллектив-влак ушненыт. Молышт – Йошкар-Ола да кундемнан тÿрлö районлаж гыч толыныт. Ушештарена, фестивальын положенийже почеш, ансамбль-влакын йоҥгалтарыме 2 мурыж гыч иктыже – шке шочмо йылме дене лийшаш. Казань гыч «ИНЕШ» группо Марий Элын сулло артистше Анатолий Зарецких дене пырля «Ой чевер ÿдыр-влак» мурым йоҥгалтарен. Тиде ончаш толшо калыклан моткоч оҥай тат лийын.

Йошкар-Олаште «Ослик дене шагат» шке пашажым тӱҥалын. «Явление иконы Божий Матери «Троеручица», калыкште тудо «Ослик дене шагат» семын палыме – тарванылше скульптур композиций уэш кошташ тӱҥалын. Ик ий наре – шкешотан бренд, сылне вер, пашам ыштен огыл. Тӱшка вий дене, регион правительстве, республикын вуйлатышыже Александр Евстифеевын тыршымашыже дене шагат уэш кошташ тӱҥалын. Йошкар-Олан мэрже Евгений Маслов палемден: ончыкыжымат тудо калыкым да уна-влакым куандараш тӱҥалеш.