Шошо шке жапше дечын вараш кодеш гынат, Йошкар-Оласе уремлаште лаке-влакым петыркалаш тӱҥалыныт. Кодшо кечылаште «Ола» муниципал предприятийын пашаеҥышт Кокшайский тракт, Киров урем, рӱдӧ кӱварыште пашам шуктеныт. Йӱдым температур 0 дечын ӱлнӧ, садланак тиде пагытлан келшыше технологийым кучылтыныт. Тудын годым лакышке оптымо вартыш писын кошка. Ола администрацийыште палдарат: лаке-влакым ончыкыжымат петыркалаш тӱҥалыт. Тиде пашан тӱҥ шонымашыже – игече тӧрланен шумешке, корным шотышко кондаш, а вара капитально тӧрлаш. Тений республикыште 200 километр наре корным ачалышаш улыт. Тидлан ик миллиард утларак теҥгем ойырат. Кугурак ужашыжым Киров гыч Строителей урем марте магистральым чоҥаш колтат.   

Илымверым утларак чоҥаш тӱҥалыныт, йоча шочмаш шагалемын. Маристат кок тылзаш регионын социал-экономике данныйжым иктешлен. Илымверым кодшо ий тыгаяк жап дене таҥастарымаште 20 процентлан шукырак чоҥеныт,  экспортышко сатум 10 процентлан шукырак колтеныт. Январь тылзыште кокла шот дене ончымаште, пашадар 6 процентлан ешаралтын, а пашадарлан тӱлымӧ парым 2 пачаш шагалемын. Январь тылзыште мужыраҥше-влакын чотышт 24 процентлан шукемын, ойырлышо-влак 8 процентлан шагалрак лийыныт. Йоча-влак, кодшо ий тиде жап дене таҥастарымаште,  17 процентлан утларак шочыныт, а колышо-влакын чотышт 28 процентлан ешаралтын. 

Регион вуйлатыше национальный проект-влакым илышышке пуртымо жапым шотышко налаш  кӱштен. Тений регионысо проект-влаклан 9 миллиард теҥге ойыралтеш, 21 объектым чоҥышаш улыт. Пашам национальный проект, тыгак регионым вияҥдыме  индивидуальный программе дене келшышын шуктат. Тидлан федерал бюджет гыч 1 миллиард теҥге ойыралтеш, кугу объект-влак коклаште аэропортым чоҥымо паша, Козьмодемьянскыште пассажир причал, тыгак Йошкар-Олаште автовокзал. Илымвер-коммунал озанлык инфраструктурым модернизироватлыме программе почеш, Советский район, Волжск олаште, Звениговышто канализаций объект-влакым ыштен шуктышаш улыт. Волжск олаште азам ыштыме отделенийым 2022 ий марте чоҥен шуктышаш улыт. Тачысе кечын тиде объект дене лимит гыч 11 процентшым ойырымо. «Содейстие занятости женщин» регионысо проект дене 2021 ийыште 4 йочасадым ыштат. Идалык мучаш марте 575 верым ыштат, Йошкар-Оласе Мирный микрорайонышто 320 веран, Руэм, Медведево да Нурма поселкылаште йочасад-влакым чоҥат. «Современная школа» регионысо проект дене келшышын,  Медведево поселкышто 1 декабрь марте школым нӧлтен шуктышаш улыт, тыгак Марий Турек район Сардаялыште у школ лиеш.  

Марий Элыште ковид дене черланымаш шагалемаш тӱҥалын. Россий кумдыкышто эпидемиологический обстановкым федерал кӱкшыштысӧ оперативный штабын совещанийыштыже каҥашеныт. Тудым Россий Правительствын вице-премьерже Татьяна Голикова эртарен. Регион вуйлатыше Александр Евстифеев мутланымашке ушнен. Эн шуко черле январьыште лийын, тудын дечын вара черланыше-влакын чотышт кок пачаш шагалемын. Пандемий тӱҥалме дечын вара республикыште 12 тӱжемат 366 еҥ черланен, тышечын 39 процентше – пенсионер-влак. Тыгак антирейтингыште медпашаеҥ, служащий-влак улыт. Регионышто коронавирус дечын тӱшка вакцинаций тӱҥалын. Тудо яра да шке кумылын эртаралтеш. Республикышке чылаже 21 тӱжем утларак дозо вакциным конденыт, тудым 19 медицин оргнизацийлаште шындат. Идалык мучаш марте Марий Элыште илыше-влак гыч 60 процентшылан прививкым шындаш палемдат. 

Теният республикыште «Шарнымаш садым» шындат. Элыште тиде акций кодшо арняште ик эн ончыч Грозный, Элиста, Новороссийскыште тӱҥалын. Севастополь олаште Василий Лановойым шарныме лӱмеш пушеҥге-влакым шынденыт. Тиде акций элын 85 регионжым авалта, тудо 22 июнь марте шуйна. Марий Элыште пӱртӱс ресурс министерстве тиде акций деке 27 апрель гыч 9 май марте ушна, 18 чодыра озанлыкын кумдыклаштыже пушеҥге-влакым шындышаш улыт, 8 майыште тӱшка акций Куяр чодыра озанлыкыште лийшаш. Кундемыштына чылаже 200 тӱжем изи пушеҥгым, Сеҥымашын 76-шо идалыкше лӱмеш 76 гектар кумдыкышто шындаш палемдат. Акцийышке волонтер, мер ушем, студент да школышто тунемше-влак ушнат. 

Мемнан республикыште 469 эҥер уло, нуно 7 тӱжем утла километрышке шуйнат. 

Вӱдын тӱнямбалсе кечыже лӱмеш пӱртӱс ресурс министерстве кундемыште улшо эҥер ден ерым шотлен. Тиде радамыште 689 ер, 182 вӱдаралыме вер. Ер-влак нерген ойлаш гын, эн келге ер – Табашино, эн кугу –Яльчик, эн яндар - Нужъер.  Шуко эҥер Юлышко йоген пура, молышт Вӱтла эҥерышке. Тыгак мемнан кундем памашлан поян. Шуко эҥер да ер Российыштат ик эн яндарлан шотлалтыт. 

Марий Элын командыже,  яллаште 250 тӱжем наре еҥ илыше-влак подргуппышто,   Российысе телымсе ялысе спорт модмаште 1 верым налын. Тидын нерген республикын спорт да туризм министерствыже увертара. Чыла команде-влак коклаште Марий Элын сборныйже 15 верышке лектын. Таҥасымаш 17 гыч 19 марте Пермь олаште эртен. Ялысе спорт модмашын программыштыже ече дене таҥасымаш, полиатлон, шашке, спорт еш-влакын таҥасымашышт лийыныт. Тидын дене пырля механизатор да ушкалым лӱштышӧ-влак шке писылыкыштым ончыктеныт. Марий Элын сборныйыштыже У Торъял, Советский, Медведево, Куженер районла гыч еҥ-влак лийыныт. Нуно чыла гаяк дисциплиныште таҥасеныт. Ялысе спорт модмаш 20 ий утла эртаралтеш. Тушко ялыште илыше - мланде пашаеҥ, чодыра отрасльыште тыршыше, социал пашаеҥ-влак ушнат. 

Кажне кечын оласе уремла гыч 6 тӱжем утла кубометр лумым луктыт. Йошкар-Ола гыч тудым полигонышко наҥгаят. Пашам кок смене дене ышташ логалеш, ешартыш техникымат тарлат. Тений теле луман да йӱштӧ лийын. Лум полигоныштат паша йӱдшӧ-кечыже кая. Статистике палдара: лумым лукмо дене тений коммунал озанлык-влак шке шотан рекордым шынден кертыт. Оласе уремла гыч 165 тӱжем  кубометр лумым луктыныт. Эн шукыжо ты марте 180 тӱжем тонн наре лийын. Тиде «Ола» муниципал предприятийын лектышыже гына. Пӧртвиктарыше компаний-влакын лукмо лумыштымат шотлаш гын, цифр палынак шукемеш. 

Йошкар-Олаште корно туткар-влакын чотышт кок пачаш шукемын. Тений кок тылзыште республикыште 30 утла корно туткарыште 80 утла еҥ сусырген да эмганен. Кодшо ий тыгаяк жап дене таҥастараш гын, аварий-влакын чотышт кок пачаш шукемыныт. Тидым шотыш налын, ГИБДД палдара: олаште «Корнывож» профилактике операций эрта. Корно правилым эскерыше-влак светофорын йошкар тӱслан кайыше, тыгак стоп-линийым эртыше да корнывожышто йолешке-влакым колтыдымо-влакым утларак тӱткын эскераш тӱҥалыт. 

2021 ий гыч Россий мучко йоча-влакым у семын налаш тӱҥалыт. Тун вашталтыш – документым сдатлымаште. Тений ача-ава-влак деч йодмашым 1 апрель гыч погат. Тыге школым ойырен налаш утларак жап пуалтеш.