Марий Элыште «Кӓршӹн кӹлвлӓ курымвлӓм ушат» конкурс эртен. Тудо Курыкмарий районын 100 ийжылан да «Шыжарвлӓ» Российын сулло коллектившын 40 ияш лӱмгечыжлан пӧлеклатын. Пандемийлан кӧра тений кӱслезе-влакын усталыкыштым дистанционно акленыт. Паша-влак Йошкар-Ола, Козьмодемьянск, Курыкмарий да Звенигово район, тыгак Чебоксар да Нижний Новгород ола гыч пуреныт. Сеҥыше-влакым тӱрло ийготан тӱшкаште палемденыт. А нунын радамыште Республикысе калыкле президент сымыктыш школын, тыгак Курыкмарий районысо Йоласал кундем гыч «Шыжарвлӓ» ансамбль ойыртемалтыныт. 

Кугурак ийготан-влаклан полыш. Тидын нерген регион вуйлатыше Александр Евстифеев Российысе пенсионер-влак партийын рӱдӧ советын председательже Владимир Бураков дене вашлиймаште мутланеныт. Регионышто кугырак ийготан-влаклан тӱткыш эреак ойыралтеш. Республикысе кучем нунылан полша. Тидлан федерал кӱкшытысӧ национальный проект, тыгак регионысо программе-влакат полшат. 

Марий Эл вуйлатыше Александр Евстифеев Юл кундемысе федерал округышто Россий президентын ӱшаеҥже Игорь Комаров дене эртарыме совещанийышке ушнен. Тушто ятыр йодышым каҥашеныт: тиде йӱклымашлан ямдылалтмаш, самырык-влакын политикышт шотышто, национальный проект-влакым илышышке пуртымо, школлаште шокшо кочкыш да молат. Видеоконференцийыште коронавирус нергенат ойленыт. 2020 ий мучаш дене таҥастарен ончалаш гын, регионлаште черланыше-влакын чотышт 47 процентлан шагалемын. Полпред палемден: кундемласе стационарлаште койко вер-влакым  иканаште огыл, а жап дене келшышын кораҥдыман, тыгак тӱшка вакцинаций нергенат ойленыт. Марий Элыште кокла шот дене пытартыш жапыште кажне кечын 26 еҥлан коронавирус диагнозым шындат. 

Марий Эл гыч самырык журналист-влак «Артекыш» миеныт. Тушто тӱнямбалсе 7-ше медиафорум эртен.   Тылеч ончыч Йошкар-Оласе «ЗУМ» киностудийын участникше-влак «Взгляд в медиабудущее» медиафорумышто сеҥеныт. Сандене Артекысе форумыш логалыныт. Тушто нуно палыме журналист, блогер-влак дене тӱрлӧ медиапроект почеш пашам ыштеныт.

Волжский районысо Сотнур тӱвыра пӧртым капитально тӧрлаш тӱҥалыныт. Тиде пашам «Культура» национальный проектын «Культурная среда» регионысо проектше дене келшышын илышышке пуртат. Пашам Йошкар-Оласе «Берег» ушем шукта, тудо февраль тылзыште увертарыме аукционышто сеҥен. Сотнур тӱвыра пӧрт у тӱсым тений сентябрь мучаш марте налшаш. Тидын нерген Волжский районын администрацийже увертара. 

Самырык поэт-влак сарын геройжо-влак нерген почеламутым возен кертыт. Москвасе Сеҥымаш Тоштер «Поэзия Победы» российысе конкурсым увертарен. Тудым поэзийын тӱнямбалсе кечыже лӱмеш эртарат. Конкурс Кугу Ачамланде Сарын тӱҥалмыжлан 80 ий темыме лӱмеш эртаралтеш. Тудо кум номинаций дене эрта, кумылан-влак йодмашым 21 апрель марте колтен кертыт. Ойыртемалтше почеламут-влакым онлайн-сборникышке пуртат. 

Марий Элыште чумыр Россий семынак тошто автомашина-влакым налме-ужалыме йӧн вашталтеш. 1 май гыч сделкым «Госуслуги» портал гоч пеҥгыдемдаш лиеш. Налме-ужалме ойпидышыште электрон кидпале шындалтеш, тидын дечын вара документ-влакым ГИБДД-шке регистрацийышке колтат. Тыглай сделкылан порталышке ПТС, СТС да ОСАГО полисым вераҥдыман. Тыгай йӧн дене тошто автшмашинам физический лица-влак веле ужален кертыт. Эксперт-влак палемдат: тыге автомашинан ончычсо озаже-влакым палаш утларак сай йӧн ышталтеш.  

«Интеллектуал» ресурс рӱдер Йошкар-Оласе 31-ше номеран школ дене ойпидышым ыштен. Тудым пилотный площадке семын ойыреныт. Этноблогер да волонтер-влак наставничество школым ыштат, йоча-влакым кугырак ийготан-влаклан полшаш кумылаҥдат, тыгак этноблогер пашалан туныкташ тӱҥалыт. 31-ше номеран школышто «Интеллектуал» рӱдер шкешотан почмо омса кечым эртарен, шке проектше-влак нерген каласкален. Тиде «Кувавайын шондыкшо» да «ЭтноБлогинг тайм». 

Республикын районлашкыже «Земский доктор» программе дене 29 медицин пашаеҥ пашам ышташ кая. Тидын нерген тазалыкаралтыш министерстве увертара. Тора яллашке 21 врач да 8 медшӱжар кайышаш. Нунылан оксам тӱлаш чылаже 36 миллион теҥге ойыралтеш. Кодшо ийын яллашке 42 специалист каен.  Рӱдӧ эмлымвер дечын тораште 7 врач да 8 фельдшер пашам ышташ тӱҥалыныт.  

Мэрийыште тӱшка субботник-влакын кечыштым ойыреныт. Йошкар-Олаште 9 да 24 апрельыште еҥ-влак пырля уремым эрыкташ лектыт. Олам эрыктыме тылзе 29 мартыште тӱҥалеш. Оласе администраций пӧртвиктарыше компаний, ТСЖ, организацийым вуйлатыше да амалкалче-влакым тиде пашашке чолган ушнаш ӱжеш. Субботник-влакын кечылаштыже, тыгак 10 да 25 апрельыште «Благоустройство» ушем пеҥгыде коммунал шӱкым яра налаш тӱҥалеш.