У Торъял кундемысе тунемше Россий олимпиадын призержо лийын. Марий Эл гыч олимпиадын финалыштыже 11 тунемше уш-акылжым терга: экономике, химий, историй, руш йылме, математике, физический культур, биологий, англичан, испан йылме, технологий да географий дене. У Торъял районысо школ гыч Григорий Ложкин химий дене российысе олимпиадыште призер лийын. Тудо ик гана веле огыл школ да муниципал этапыште сеҥен. Химий дене кылым эше 8 классыште кучаш тӱҥалын, «Одаренные дети. Химия» программе дене шуаралтын. Туныктышыжо Лилия Глушкова тунемшын шонымашышке шуаш кыртмен тыршымашыжым палемда. Ешарен каласаш лиеш, Россий олимпиадын пытартыш этапыште сеҥыше да призер-влак профильный предмет дене Российысе ВУЗлашке тунемаш пурен кертыт. Олимпиадын финалже  30 апрель марте 15 регионлаште 24 предмет дене эрта.

Школым пытарыше-влаклан иктешлыше сочиненийым вес жаплан кусареныт. Тений 11 классым пытарыше-влак ЕГЭ вашеш пашам 15 апрельыште возат. Тидын дене пырля ешартыш кече-влакымат вес жаплан палемденыт. Иктаж амаллан кӧра, тунемше сочиненийым палемдыме кечын возен огеш керт, але «незачет» оценкым налеш, 5 да 19 майыште сочиненийым возаш ешартыш кече-влак лийыт. Тидын шотышто приказым правовой информаций шотышто официал порталыште савыктыме. 

Республикысе стационарлаште коронавирус инфекций дене черланыше-влакым эмлаш келыштарыме эше 60 койко верым шагалемдыме. Йошкар-Оласе эмлымверыште 40 верлан, Марий Турек да Звенигово рӱдӧ эмлымверлаште 10 верлан. Тачысе кечын шым медицине организацийлаште 445 койко вер уло. Медведево рӱдӧ эмлымверыште коронавирус дене черле пациент-влаклан хирургий, акушер, неонтологий, гинекологий могырым экстренно полышым пуат. Оперативный штаб палдара: пытартыш суткаште эше кок еҥ коронавируслан кӧра ӱмыр лугыч лийын, тыге республикыште тиде черым чылаже 205 еҥ сеҥен кертде, колен. Стационарлаште 303 еҥ эмлалтеш, 69 еҥ нелын черле, 19 еҥ шодын искусственный вентиляций аппаратыште. Пытартыш суткаште тиде диагнозым 21 еҥлан шынденыт. 

Йошкар-Олаште коронавирус дечын прививкым шындаш пункт Сеҥымашын кумлымшо идалыкше лӱмеш тӱвыра полатыште пашам ышташ тӱҥалын. Икымше кечынак тушко ятыр еҥ толын. Толшо-влакым эн ончыч врач онча. Тӱвыра полатыште пункт паша кечын 10 гыч 15 шагат марте пашам ышта, тушко кажне кумылан кугыеҥ прививкым шындаш толын кертеш. Пелен паспорт, полис да СНИЛС лийшаш. Кундемыште илыше-влак коронавирус дечын прививкым шындаш пункт-влакым вераҥдаш темлен кертыт. Темлымашым регион вуйлатыше Александр Евстифеевын пашаже дене палдарыше Instagram-аккаунтышто пуаш лиеш - @evstifeev.life. Нуным регионысо тазалыкаралтыш министерствышке колтат. Пандемий тӱҥалме дечын вара регионышто 30 тӱжем утла дозо «Спутник Ви» вакциным конденыт. 31 мартлан 22 тӱжемат 513 еҥ прививкым шынден, нунын кокла гыч 16 тӱжемже прививкын тичмаш курсшым эртен. Тазалыкаралтыш министерстве палдара: лишыл кечылаште прививкым шындаш пунктым Ленин лӱмеш тӱвыра полатыште почшаш улыт. 

Пандемий жапыште регионышто вирусым чактарымаште тыршыше-влакын пашашт нерген Марий Эл Общественный палатын заседанийыштыже ойленыт. Регион вуйлатыше Александр Евстифеев палемден: ий гыч ийышке мер организаций-влак регионын вияҥмашыже шотышто кӱлешан йодыш-влакым рашемдымаште утларак полшат. Коронавирус инфекцийын шарлымыже чыла службо да структуро-влакым терген. Кучем дене пырля тиде черым волонтер, мер ушем, тыглай еҥ-влак шижтараш да сеҥаш полшеныт. Таче пандемий шагалемаш тӱҥалын, тыгодым тӱшка иммунитетым пеҥгыдемдаш вакцинаций полша.

Пандемий жапыште регионышто вирусым чактарымаште тыршыше-влакын пашашт нерген Марий Эл Общественный палатын заседанийыштыже ойленыт. Регион вуйлатыше Александр Евстифеев палемден: ий гыч ийышке мер организаций-влак регионын вияҥмашыже шотышто кӱлешан йодыш-влакым рашемдымаште утларак полшат. Коронавирус инфекцийын шарлымыже чыла службо да структуро-влакым терген. Кучем дене пырля тиде черым волонтер, мер ушем, тыглай еҥ-влак шижтараш да сеҥаш полшеныт. Таче пандемий шагалемаш тӱҥалын, тыгодым тӱшка иммунитетым пеҥгыдемдаш вакцинаций полша.

Марий Элыште мланде шӱй дене олтышо котельный-влакым газ оборудованийышке кусарат. Регион вуйлатыше Александр Евстифеев Ростехнадзорын Юл кундемысе виктемын вуйлатышыже Азат Мубаракшин дене вашлийын. Тачысе кечын котельный-влакым газышке кусарат. Кушко канде тул толын, тиде пашам тений ыштен шуктышаш улыт. Регион вуйлатыше весымат палемден: технадзор шошымвӱд жапыште гидротехнический сооружений-влакым тергышаш. Нунын кокла гыч кугырак ужашыже муниципал погышто улеш, садланак тиде йодышым администраций вуйлатыше-влак дене пырля каҥашат. 

Республике правительстве пӧртыштӧ йоча-влакын кеҥеж канышыштлан  пӧлеклалтше совещаний эртен. Тудым Марий Эл вуйлатыше Александр Евстифеев эртарен. 1 май марте йоча-влакын канаш верым ыштыше-влак кӱлеш документым поген шуктышаш улыт. Организаций-влакым кугыжаныш реестрышке пуртат, тунам веле нуно тазаҥдыме кампанийышке ушнен кертыт. Ончылгоч палемдыме почеш, республикыште тений 180 утла оргнизаций пашам ышташ тӱҥалын кертеш, тушто 15 тӱжем утла йоча канышаш. Кодшо ийын ола воктенсе 5 лагерь пашам ыштен гын, тений 13 лагерь лийшаш. Санитар врач-влак смене-влак туҥалме вашеш тергымаш дене лектыт. Тыгак палемден кодаш лиеш, пашам ыштыше лагерьлашке йочам канаш колтышо ача-ава-влаклан путевкын роскот ужашыжым пӧртылташ тӱҥалыт.

Сеҥымаш диктант акций республикыште 29-ше апрельыште лиеш. Тений тудо кумшо гана эрта. Кодшо ийын диктантын йодышыжо-влак сеҥымашан кучедалмаш-влаклан пӧлеклалтыныт ыле. Тений сар тӱҥалмылан 80 ий темеш. Сандене икмыняр йодышыжо тиде ойгандарыше событий да кугу полководец-влаклан пӧлеклалтеш. Акцийым эртараш 12 тӱжем утла площадкым ямдылат. Кодшо ийын 77 элысе лу тӱжем утла площадкылаште 450 тӱжем еҥ диктантым офлайн возен, онлайн возышо-влак дене пырля миллионымат эртен.

Марий калык модыш сеҥымашым конден. «Самырык тукым» республикысе йоча усталык конкурс тений марий фольклорлан пӧлеклалтын. Участник-влак марий калык модыш негызеш театр инсценировкым ончыктеныт. Танасымашыш чылаже 12 видеопаша пурталтын. Сеҥышыш лекше коллектив-влак Республикысе курчак театрыште мастарлыкыштым ончыктеныт.