Рӱдоласе уремлашке Моско гыч кондымо троллейбус-влак лектыт. 2018 ийыште Йошкар-Олашке 32 троллейбусым конденыт ыле. Транспорт чылт у огыл, но тудын дене калыкым шупшыкташ лиеш. Моло дене танастарымаште, нуно утларак шып улыт да шукырак кудалыштын кертыт. Рӱдоласе корнылашке лукмо деч ончыч нуным ачалат. Ик троллейбусым шотыш кондаш кокла шот дене 2-3 тылзе кая. Ончыч тудым капитальнын олмыктат, вара троллейбусым чиялтат да линийышке луктыт.  Таче ола мучко элнан рудолаж гыч кондымо 21 троллейбус кудалыштеш. Ончыкыжым моло транспортымат олмыткен пашашке колташ палемденыт. 

Йошкар-Оласе уремла гыч лумым луктыт. Теле тӱҥалме дечын вара 135 тӱжем кубометр лумым луктыныт. Кокла шот дене спецтехнике ик суткаште тӱжем кубометр наре лумым луктеш. Тыге мутлан, шочмын гына, лум свалкышке 3 тӱжем кубометр лумым колтеныт. Администрацийыште ушештарат: корно воктене йӱдлан кодымо автомашина-влак лумым эрыкташ чаракым ыштат. Садланак автомашинам виктарыше-влак тидым шотышко налшаш улыт. 

Йошкар-Олаште Машиностроитель уремым тӧрлат. Пашам «Лӱдыкшыдымӧ да сай качестван автомашина корно» национальный проект дене келшышын шукташ тӱҥалыт. Тений Черняков гыч Красноармейский урем марте шотышко кондат. Машиностроитель уремым сар пагытыште, республикышке эвакуированный предприятий-влакым кусарымеке, чоҥеныт. Ончыч тудо Ворошилов лӱмеш лийын, кызытсе лӱмым 1957 ийыште пуэныт. Кодшо ийын Красноармеский гыч Водопроводный урем марте ужашым тӧрленыт. 

Кодшо арняште кундемыштына  ныл тӱжемат 200 утла еҥлан ОРВИ диагнозым шындыме. Ончычсо арнян кумшӱдӧ наре еҥлан шагалрак лийын. Черланымаш эпидемий кӱкшыт деч индеш утла процентлан, ончычсо арня деч 7 процент нарылан шукырак лийын. Грипп  дене черланыше-влак тачысе кечын республикыште уке улыт. Йошкар-Олаште черланыше-влак эпидемий кӱкшыт деч 15 процентлан, ончычсо арня деч 13 процентлан шукырак улыт. Кодшо арнян Волжскышто, Йошкар-Олаште, Юрино да Медведево районласе кок школын вич классшым да кум йоча садын кум группыжым жаплан картинлан петыреныт. 

Тунемше-влакын ача-авашт ЕГЭ-м возен ончат. «Единый день сдачи ЕГЭ» Российысе акций Йошкар-Оласе 28 лицейыште 20 мартыште лиеш. Иктешлыше кугыжаныш экзаменым кӱчыкемдыме вариант дене возат. Акцийышке ача-ава-влак дене пырля виктер вуйлатышын икымше алмаштышыже Михаил Васютин, туныктыш да шанче министр Наталья Адамова ушнат. Акций жапыште ача-ава-влак экзаменышке пурымо, тудым эртарыме дене палыме лийын кертыт.   

Марий Элыште чодыра пожар лийын кертме лӱдыкшӧ жаплан 4 тӱжем утла пашаеҥым ушат. Ужар кумдыкым тулазап дечын аралыме нерген совещанийыште каҥашеныт. Тудым Российын пӱртӱс ресурс да экологий министр Александр Козлов эртарен. Видеосовещанийышке регион вуйлатыше Александр Евстифеев ушнен. Пожар лӱдыкшӧ жап Астраханский область, Чеченский республике да Хабаровский крайыште тӱҥалын. Марий Элыште чодыра пожар лийын кертме лӱдыкшӧ апрельын кокымшо пелыштыже тӱҥалеш. Пӱртӱс ресурс министерстве да МЧС чодыра пожарым йӧртымӧ планым ыштеныт. Тидлан 4000 утла пашаеҥым ушат, 600 наре единице техникым, тыгак 5 тӱжем утла оборудований да инвентарьым  ямдылат. Республикыште чодыра пожар-влак Звенигово да Медведево районлаште лийын кертыт. Марий Элыште «Экологий» национальный проект дене 34 миллион теҥгелан техникым уэмдат. Ушештарена, 2020 ийыште республике чодыра пожарым писын  йӧртымӧ дене 10 ойыртемалтше регион радамышке пурен. 

Марий Элыште Самырык-влакын полатышт республикыште добровольчествым вияҥдаш тӱҥалеш. Тидын нерген регион вуйлатыше Александр Евстифеев ресурс рӱдерыште лиймыже годым палемден. Добровольчествылан полшышо ресурс рӱдер Самырык-влакын полатыштыже верланен. Тудым 2019 ийыште ыштеныт, 2 миллион утларак тенгем пӧлем-влакым ачалаш да коворкинг-рӱдерым ышташ кучылтыныт. Республикысе адресно - инвестиционный программе дене тений 3 миллион теҥгем ойырат. Тиде окса дене Самырык-влакын Полатын реконструкцийжым тӱҥалаш проект-смете документацийым ямдылат. Тудын дене келшышын, полатым уэмдышаш улыт.

Калыкле президент школ-интернатын туныктышыжо Эльвира Владимировна Петрова Москвашке шочмо йылмым туныктышо-влакын форумышкыжо миен. Тушто семинар, тыгак йыргешке ӱстел, шочмо йылмым туныктышо-влак коклаште конкурс лийын. Эльвира Владимировна Петрова конкурсышто шочмо йылмым туныктымо ойыртемым ончыктен да 42 регион гыч 60 туныктышо-влак коклаште кумшо верышке лектын. Эльвира Владимировна Петрова Президент школ-интернатыште 1998 ий гыч пашам ышта, кок гана «Марий йылмым эн сайын туныктышо» конкурсышко ушнен да финалышке лектын. 

Мураш да кушташ, сӱретлаш, семӱзгар дене шокташ кумылан йоча-влакым кычалыт. Марий Элыште тӱвыра да сымыктыш туныктымо кластерыш приемный кампаний мучашлалтын. Палантай лӱмеш колледжын туныктышыжо-влак районласе йоча сымыктыш школыш да садиклашке лектыныт, талантан ӱдыр ден рвезе-влакым рӱдоласе президент сымыктыш школыш тунемаш толаш кумылаҥденыт. 

Марий Элыште икмыняр поликлиникым чоҥышаш улыт. «Марий Эл Республикыште тазалык аралтышын первичный звенон модернизацийже» регионысо проект дене келшышын 7 объектым ыштат. Тидлан 860 млн теҥге ойыралтеш. План почеш Йошкар-Олаште 2-шо номеран йоча поликлиникым, Юрино поселкышто поликлиникым, Краснооктябрьский да Силикатный поселкылаште, тыгак Кокшайск селаште врачебный амбулаторий-влакым, Волжский район Учейкино да Марий Турек районысо Тат-Китня ялыште фельдшер-акушер пункт-влакым ыштышаш улыт. Тидын дене пырля медицине организаций-влакым оборудований дене пойдарат. План дене келшышын 8 поликлиникым капитально олмыктат, тыгак Республикысе клинический эмлымверыште офтальмологий консультативно-диагностический отделенийым тӱрыс тӧрлат.