Республикыште корно сетьлан финанс полыш йодышым Правительстве Пӧртышто Александр Евстифеев республикын транспорт да корно озанлык министр Александр Герасименко дене каҥашен. Тӱҥ шотышто – Россий правительстве дене февраль мучаште ешартыш шийвундым ойырымо шотышто постановлений нерген мутланеныт. Тудын дене келшышын, республикылан ешарен 900 утла миллион тенгем ойырат. Тиде окса дене Киров-Строитлей урем-влакым ушышо магистральым чоҥымо пашам шуят, тушто коммуникаций-влакым ыштат. 300 утла миллион тенге дене «Лӱдыкшыдымӧ да сай качестван автомашина корно» нацпроект дене эше  20 километр корным тӱрыснек тӧрлат. План дене тений республикыште 196 километр корным нормативлан келыштарышаш улыт. 

«Марий подкогыльо» – калык кочкыш семын патентым налын.   Ик кафен озаже кок ий тиде пашам виктарен.  Патентым налаш  рестораторлан подкогыльын ойыртемже нерген палдараш кӱлын. Кажне калыкын тыгай сынан кочкышыжо уло, тидын радамыште: Грузийыште – хинкали, руш да коми кочкышышто – пельмень, рӱдӧ азийыште – манты, японийыште – гёдза. Марий-влакын – подкогыльо. Тудым торык, шыл, пучымыш, ковышта, тыгак емыж дене ыштат. Когыльо тӱрым марий ӱдырамаш тӱрла. Калыкыште ойлат: когыльо тӱр мыняр мотор да чатка, тунар озавате шке пашажым кӱлын шукта. Ешарыман,  марий подкогыльо «Российын тамже-влак» регионысо бренд-влак коклаште ончыкталтын. Тыгак подкогыльлан рӱдӧ олаште ик кафе воктене чапкӱ уло.  

Калык-влак кокласе паша шотышто ушем Йошкар-Олаште Келшымаш пӧртым чоҥаш тӱҥалмым сайлан шотлен. Кодшо кечылаште советын заседанийжым тӱвыра, печать да калык-влакын пашашт шотышто министрын алмаштышыже Галина Ширяева эртарен. Республикыште Келшымаш пӧртым чоҥымаш калык-влакын рӱдерыштым да калыкле-тӱвыра ушем-влакын вашкылыштым пеҥгыдемдаш полша. Советын еҥже-влак палемденыт: у учреждений республикыште илыше тӱрлӧ калык-влакын тӱвыра, йӱлаштым аралаш полшышаш. Келшымаш пӧртым Йошкар-олаште мартыште чоҥаш тӱҥалшаш улыт. Проектлан 300 утла миллион теҥге ойыралтеш. Зданий ныл пачашан лиеш, тудым Первомайский урем да Ленинский проспект ушнымаште чоҥышаш улыт. Объектым 2023 ий марте ыштен шукташ палемдат. 

Шернур поселкысо черкышке кодшо кечылаште чаҥым кырыме верыште куполым вераҥденыт. Мероприятийышке Волжскысо да Шернурысо епископ Феофан миен ыле. Тидын нерген районысо администрацийыште увертарат. Вич куполан Михаило-Архангел храмым Шернурышто 2003 ийыште негызленыт. Тудым 10 ий утла чоҥеныт. Черке кумдыкышто тыгак кок пачашан рушарня школ, книгудо да трапезный уло. 

Экологий шинчымашыште у йӧн-влакым кучылтыт. Марий Элыште 40 утла ончыкылык биолог да эколог-влак у теле-классыште тунемыт. Кызытсе жаплан келшыше компьютер да оборудованийым «Кажне йочан сеҥымашыже» проект дене келшышын налыныт. Эколого-биологий рӱдерыште ӱдыр-рвезе-влак пӱртӱсым аралаш, тӱрлӧ шымлымаш пашам возаш тунемыт. У оборудованийым вераҥдымеке, туныктышо-влаклан икмыняр семинар эртен. Йоча-влак тӱрлӧ конкурс, экодиктанат, тыгак пӱртӱсым аралыме акцийышке ушнат. 

Пӱртӱс ресурс министерстве да МЧС Марий Элыште пожар лийын кертме лӱдыкшӧ жаплан ямдылалташ тӱҥалыныт. Чодыра пожар-влак тӱҥ шотышто апрель-май тылзылаште талышнен кертыт. Тачысе кечылан лесничестве-влак, «Марий Чодра» нациоанльный парк, «Большая Кокшага» заповедникыште тулазап лийме годым службо-влак шкеныштым кузе кучышаш улыт, планым ыштеныт. Проектым Рослесхозышко колтеныт. Ведомствышто палемдат: «Экологий» нацпроектын «Чодырам аралымаш» регионысо проект дене келшышын,   кундемыште спецтехнике паркым да оборудованийым пойдарат. 

Республикылан федерал бюджет гыч национальный проект дене пашам шукташ ешарен 969 миллион теҥгем ойыреныт. Тышечын утларакшым Киров да Строитель уремым ушышо магистральым чоҥаш. Тиде объектыште паша ик кечыланат шогалын огыл. Тачысе кечын 1 километр кужытышто мландым оптеныт, мланде йымач еҥ-влаклан вончымо верым ыштеныт, газ пучым вес вере кусареныт.  Ешартыш окса дене Изи Какшан гоч кӱварым ышташ тӱҥалыт, тыгак коммуникаций-влакым вес вере кусарыме пашам шуктат. Федерал бюджет гыч ойырымо моло окса дене, а тиде 400 наре миллион теҥге, 20 километр корным капитально тӧрлат. 

Йошкар-Олаште марий филармонийын полатшым чоҥен шуктат. Март тылзыште пашаеҥ-влак сцене оборудованийын конструкцийже-влакым ышташ тӱҥалыныт. Тидын нерген регион вуйлатышылан тӱвыра министр Константин Иванов увертарен. Апрельыште зданийын фасадшым, майыште полатышке пурымо верым ыштат. Июньышто кумдыкым тӱзатышаш улыт. Тидын шотышто чыла контракт-влакым пеҥгыдемдыме. Марий кугыжаныш филармонийын зданийжым республике бюджет кӱшеш 2014 ий гыч чоҥаш тӱҥалыныт. Но окса чӱдылан кӧра, пашам жаплан шогалтеныт ыле. 2019 ийыште кужун чоҥымо объектым «Культура» нацпроектышке пуртеныт, объектын реновацийжылан республикылан 317 миллион тенге ойыралтын. Зданийым тений ыштен шуктышаш улыт.  

«Пӧлекле мыланем моторлыкым!» Тыгай поро кумылым ончыктышо акцийым Марий Элын Калык илышым вияҥдыме шотышто министерствыже 8 Март вашеш увертарен. Тудо 2-шо гыч 12-шо март йотке эрта. Таче социальный обслуживанийын стационарлаштыже 1000 утла ӱдырамаш ила. Чаманен палемдыман, ӱдырамаш-шамыч кокла гыч шукынжо социальный обслуживанийын тӧнежлаштыже ӱмырышт мучко илат да, моторлык мастер дене лийме деч вара, шкем воштончышышто ужын, йӧршын вес айдемыш савырнымылан ӧрын куанымым огыт пале. А эше тиде моторлыкшым фотограф кагазыш войзен пуа гын, волгыдо шарнымаш кужу жаплан веле огыл, а ӱмыр мучкылан кодеш.
 Тыгай юзо татым социальный обслуживанийын тӧнежлаштыже илыше ӱдырамаш-влаклан кажныже пӧлеклен кертеш. Министерстве парикмахер, визажист, маникюр да моторлык салон мастер, профессиональный фотограф-влакым да ӱдырамашлан мотор лияш полшышо чыла еҥым акцийыш ушнаш ӱжеш. Номер – (8362) 45-56-27, 22-22-01.

Марий-влакын шошо календарьышт Ӱярня пайрем дене почылтеш. Тудо Шорыкйол деч вара шым арня гыч пайремлалтеш. Тений пайрем 8 мартыште пура да ик арня шуйна. Пайремын тӱҥ ужашыже-ийкурык гыч мунчалтымаш, марий-влак ожно йолкурыкым ыштеныт.  Ӱдырамаш-влак шурно лектышым кугемдаш, озанлык пашам вораҥдараш курык гыч кужун волаш тыршеныт. Марий Ӱярнян ик тӱҥ ужашыже унам вашлийме да унала коштмо дене кылдалтын. Уна-влакым кинде шинчал, ӱян мелна, пура дене сийленыт. Пайремын пытартыш кечынже Ӱярня дене чеверласеныт.