Февраль тылзыште кундемым виктарыме шотышто рӱдер еҥ-влак дечын пурышо 600 утла йодышым тӱрлӧ ведомствылашке колтен. Эртыше тылзыште еҥ-влакым вӱд шотышто, тыгак пӧртлаште шокшо укелык, шала коштшо пий-влакын шукеммашышт тургыжландарен. Тыгак кумдыкым тӱзатыме шотыштат азапланеныт. А теве корным да кудывече-влакым эрыктыме шотышто вуйшиймаш шагалрак пурен. Йошкар-олаште илыше-влак пел ийлан Петров уремым петырыме шотышто йодыныт. Рӱдоласе администраций микрорайонышто кузе каяш, транспортын эртымыже шотышто вашештен. Тений кундемым виктарыме шотышто рӱдер Воин-Интернационалист уремыште да Руэм поселкышто вӱд пучын лунчыргымыжо шотышто йодышым рашемдаш полшен. 

Оршанка районышто идалык мучаш марте очистной сооруженийым чоҥат. Объектым Шулка селаште тений октябрь марте ыштен шуктышаш улыт. «Госзакупки» сайтыште палемдыме: объектым ышташ районысо бюджет гыч 12 миллион теҥге ойыралтеш. Сооружений ик суткаште 80 кубометр лавыран вӱдым эрыкташ тӱҥалеш. Подрядчик канализацийым чоҥа, тыгак йыр улшо кумдыкымат тӱзата. 

Озанлык-влак шошо агалан ямдылалтыт. Пырчым ситарат, техникым тӧрлат, ӱйлымӧ-шӱрымӧ материалым шапашлат. Регион вуйлатыше Александр Евстифеевым тиде паша дене Республик виктер вуйлатышын икымше алмаштышыже Александр Гречихо палдарен. Мемнан кундемыште нӧшмӧ ситышын уло. Тачысе кечын 102 процентымат ямдылыме. Шошо жаплан республикыште 6 тӱжем тонн ӱяҥдышым ситарышыш улыт, тачысе кечын 4 тӱжем тоннжым конденыт, тиде кӱлмӧ дечын 65 процент. Марий Элыште тений 295 тӱжем гектар кумыдыкышто пырчым да шудым ӱдышаш улыт, тидыже кодшо ийысе дечын 2 тӱжем гектарлан шукырак. Кокияшым 45 тӱжем гектарыште ӱденыт. Технике нерген ойлаш гын, шошо ага вашеш 12 единице техникым налыныт, пасулашке чылаже 1609 трактор лектеш. Ӱйлымӧ-шӱрымӧ материалым тений кодшо ий дечын утларак ямдылыме. Тидын нерген Александр Гречихо увертарен. Вашлиймаште кадр  йодышымат нӧлталыныт. Пасулаште пашам ышташ 880 механизатор кӱлеш, тачысе кечылан 728 еҥ уло, молыштым жаплан ойпидыш дене налаш палемдат.

Марий Элышке чот йӱштӧ игече дечын вара луман да поранан игече толеш, кундемыште левешта. Арня мучаште температур кӱза. Синоптик-влак увертарат: кугарнян 1 гыч 6 градус марте лиеш гынат,  февраль тылзе йӱштӧ дене мучашлалтеш. Марий Элыште чот йӱштӧ, «аномальный» манме игече кок арня наре озаланен. Регионысо гидрометрӱдер палдара: республикыште эн йӱштӧ -35градус лийын. Тидыже У Торъялыште 20 февральыште. Йошкар-Олаште эн йӱштӧ кече 23 февральыште лийын, тунам 33 градус марте йӱкшемден. Март тылзе нерген ойлаш гын, ончылгоч палемдыме почеш: шошын икымше тылзыштыже южын температурыжо нормым огеш эрте, а теве лум да йӱр утларак лийын кертыт.   

Нижний Новгород оласе Нижегородский районный суд Марий Элын ончычсо вуйлатышыже Леонид Маркеловым поснак кугу взяткым налмыжлан, должностной полномочийже дене утыж дене пайдаланымыжлан да оружийым закон дене келшыдымын аралымыжлан титаканлан шотлен да 13 ийлан эрык деч посна кодаш пунчалым луктын.

Пунчал дене келшышын, республикын ончычсо вуйлатышыже пеҥгыде режиман колонийыште шинчаш тӱҥалеш. Тыгак тудлан 235 миллионат 280 тӱжем теҥге штрафым тӱлыктат. Марий Элын ончычсо ялозанлык министрже Ираида Долгушевам 3 ият 6 тылзылан эрык деч посна кодаш пунчалым луктын. Наталия Кожановам суд 8 ийлан эрык дечын посна кодаш пунчалын. Приговор закон дене вийым налын огыл. Палдарыме семын ойлаш гын, приговорын кугытшо 400 утла лаштык погынен. Тиде амал дене тудым суд арня жапыште лудын.

Шочмо йылме нерген сочинений конкурсым иктешлыме. Тудым Марий тӱвыра рӱдер эртарен. Марий Элна – 50 утла калыклан шӱмбел кундем, а шочшышт да уныкашт-влаклан - шочмо мландышт. Нунылан шочмо йылмыштым, тӱвыраштым арален кодаш чыла йӧным ыштыме. Самырык тукым таче шке шочмо йылмыжым кузе пала, шке тукымвожшын чон поянлыкшым кузе аклен-саклен мошта – вашмутым «Мыйын шочмо йылмем» сочинений конкурс почын ончыктен. Таҥӱчашыш Марий Эл, Татарстан да Пошкырт кундемла гыч руш да марий йылме дене 45 паша пуреныт. 13-16 ияш тунемше-влак коклаште Юлсер кундем Памар кыдалаш школын тунемшыже Юлия Белова икымше верыш лектын. 17 гыч 20 ияш марте таҥӱчашыш ушнышо-влак коклаште, чаманаш логалеш, ик пашат пурен огыл. 21 гыч 35 ияш марте конкурсант-влак коклаште Волжск ола гыч Анжела Тимоеван пашажым эн сайлан шотлымо. Марий Элын калык поэтше Геннадий Ояр шкенжын призшым палемден. Тудын озаже - Шернур поселкысо Совет Ушем Герой А.М. Яналов лӱмеш 1-ше номеран кыдалаш школын тунемшыже Дмитрий Веденькин.

Самырык возышо-влак «Кенеж сылнымутчо» семинарышке ушнен кертыт. Тудым июнь мучаште «ВИЙАр» ушем Оршанка район Кӧрдӧ ялыште эртара. Сылнымут семинарышке 18 гыч 35 ияш марте  поэзий, прозо, драматургий, журналист пашаште шкеныштым тергыше-влак ушнен кертыт.Семинар жапыште усталык конкурс лиеш, паша-влакым икмыняр номинаций дене аклат, сеҥыше-влакым окса премий дене палемдат. «Кенеж сылнымутчо» семинарышке ушнаш кумылан-влак йодмашым 1 июнь марте пуышаш улыт. 

Регионысо социал аралтыш учрежденийлаште куснылшо «мобильный» манме офтальмологий диагностике пашам ыштен. Ик арня жапыште Федерал офтальмологий рӱдерын Чебоксарысе филиалже гыч специалист-влак 4 учрежденийыште илыше-влакын шинча чер улмыштым тергеныт. План дене, интернат-пӧрт, тыгак социал обслужваний рӱдерла гыч чылаже 500 утла еҥын шинчаштым тергеныт, а ончыкыжым кӱлмӧ семын нуным кӱкшӧ технологий полшымо дене эмлат. 

Тазалык – эн кугу поянлык. Скандинавийысе коштмаш рӱдерын еҥже-влак тиде ушан ой дене тӱрыснек келшат да шке примерышт дене моло-влакым кумылаҥдат. Спорт туризмын тиде видше мемнан кундемыште утыр да утыр шарла. «Нордик-влакын» толкынышкыжо кажне ийын у еҥ-влак ушнат, районлаштат филиал-влак почылтыт. Ӱмаште март тылзыште Скандинавийысе коштмаш рӱдерын возымо проектше «арий Элысе Калык илышым саемдыме шотышто министерствын эртарыме конкурсышто субсидийым сеҥен. Проект дене келшышын, рӱдерын еҥже-влак июнь тылзе марте  республикысе социал учрежденийлашке лектын коштыт. Мутлан, эртыше кечылаште нуно Шернур район Казанский селаште лийыныт. Эн ончыч йоча-влак дене интернат-школышто, варажым инвалид ден шоҥго  пӧртышто вашлийыныт. Тушто скандинавий коштмаш дене мастарлык-классым эртареныт, пӧлекым кучыктеныт. Проект дене келшышын, Скандинавийысе коштмаш рӱдер тыгак Йошкар-Олаште занятий-влакым эртара. Арняште кок гана – кушкыжмын да кугарнян – чыла кумылан-влакым 10 шагатлан Ленин лӱмеш тӱвыра полат воктене верланыше Сеҥымаш паркыште. Тушто инструктор-влак Скандинавийысе коштмаш нерген каласкалат, чын кошташ да шӱлаш туныктат. 

Марий Элыште коронавирус дечын вакцинаций умбакыже шуйна. Черым чактараш тӱшка имунизацийлан ӱшан уло. 2021 ий мучаш марте республикыште прививкым кундемыште илыше 60% еҥ-влаклан шындышаш улыт. Ик эн ончыч прививкым медик, туныктышо, социал сферын пашаеҥыштлан шынденыт. Кызыт прививкым кажне кумылан еҥ шынден кертеш. Регионышто «Спутник-V» препарат ситышын уло. Практике ончыкта, вакциным шындымеке, еҥ-влак коклаште тудым чот нелын эртымаш вашлиялтын огыл. Тачысе кечылан республикыште Ковид-19 дечын 21 тӱжем дозо вакцине толын. Тышечын 60% еҥ-влаклан шындыме. Лишыл жапыште «Спутник-V» вакцинын у партийже-влак толшаш улыт. Вакцинацийым чумыр республикыште ыштат. Тора яллашке медицин пашаеҥ-влакын мобильный бригаде-влак лектыт. Южо предприятий, социал организацийлаште прививкым тӱшкан шындыктат.