Марий Элышке «Спутник V» вакцинын у партийже толын. Прививке кампанийым тӱҥалме дечын вара регионышко чылаже 20792 дозо вакциным конденыт. Тидын нерген регионысо тазалыкаралтыш министерстве увертара. 24 февральысе данный дене, Марий Элыште 12 тӱжемат 754 еҥ коронавирус дечын прививкым шындыктен, вакцинын тичмаш курсшым 2 тӱжемат 358 еҥ эртен. Вакцинацийым шке кумылын яра кажне еҥ шынден кертыт. Имммунизацийышке кугыеҥ-влак кум йӧн дене возалтын кертыт: «Госуслуги» портал гоч онлайн, тыгак «122» номер дене кол-рӱдер гоч але поликлиникышке миен. 2021 ий мучаш марте республикыште илыше-влак гыч 60% прививкым шындышаш улыт. 

Республикыште 5 ийыште тазалыкаралтыш отрасльлан 7 объектым чоҥен шуктат. Йошкар-Олаште тӱҥ врач-влакын совещанийышт лийын.  Тушто Марий Элыште первичный звенон модернизацийже нерген ойленыт. Регионысо правительствын постановленийже дене келшышын, 2025 ий марте тиде программылан 2 миллиард теҥге ойыралтеш. Тиде окса дене Йошкар-Олаште 9-ше микрорайонышто йоча поликлиникым, Юрино поселкышто поликлиникым, Звенигово районысо Кокшайск селаште, Силикатный да Красооктябрьскийыште врачебный амбулаторий-влакым, 2 ФАП-ым чоҥат. 13 объектым капитально олмыктат. Тидын радамыште Йошкар-Олаште 4 поликлинике, 5 районлаште, Курыкмарий районысо Виловатышто участковый больнице да амбулаторий-влак. План дене 59 единице медицин оборудованийым, 83 единице транспортым налшаш улыт.

Пайрем кечын 23 февральыште регион вуйлатыше Александр Евстифеев Йошкар-Оласе ракет дивизийыште лийын. Регион вуйлатыше службым, порысым шуктышо-влакым пайрем дене саламлен да палемден: «Россий Федерацийын Правительствыже элын чекшым аралаш, обороно могырым эреак кугу кӱкшытым кучаш тӱткышым ойыра. Россий Президент Владимир Путин палемда: Россий армий кӱкшытышкӧ лектын, тидыже элын лӱдыкшыдымылыкшым аралаш полша». Марий Эл вуйлатыше ешарен: «Марий Эл - элын оборонно-промышленный комплексым вияҥдымашке шке надыржым пышта. Тыгак кундемыште сарзе-патриот пашалан тӱткыш ойыралтеш». Ушештарена, кодшо ийын Йошкар-Оласе дизизий РВСН-ын мобильный базирований-влак коклаште эн сай соедниненийлан шотлалтын. Кодшо идалык мучаште дизизийын ик ракет полкшо кумда да тӱшка тунеммашке ушнен. 

Ешарена, республикын районлаштыжат пайремым кугу кӱкшытыштӧ эртареныт. Ончылно – 9 май. Ракет дивизийын салтак да офицерже-влак Сеҥымаш кечылан ямдылалташ тӱҥалыныт.

Республикыште шочмо элым аралыше-влакын кечыштым палемденыт. Регион вуйлатыше Александр Евстифеев Воин чап монумент воктеке пеледышым пыштен. Пайрем мероприятийышке Федераций Советыште Марий Эл Республик дечын сенатор-влак Константин Косачев да Сергей Мартынов, Марий Эл кугыжаныш Погынын председательже Анатолий Смирнов, тӱҥ федерал инспектор Павел Волков, Республикын Кӱшыл судын председательже Артем Грачев, тыгак силовой ведомство-влакын вуйлатышышт ушненыт. Регион вуйлатыше палемден, шочмо элым аралыше-влакын кечышт тиде калыкын пайремже. Поснак сарзыеҥ, Кугу Отчественный сарын ветеранже да республикыште илыше кажне еҥымат пайрем дене саламленыт.

«Икымше марий опер «Акпатыр». Тиде книган презентацийже Сергей Чавайн лӱмеш книгагудышто лийын. Савыктышым Марий Элысе тӱвыран сулло пашаеҥже Мария Байрамовна Матукова чумырен. «Акпатыр» оперым марий композитор Эрик Сапаев возен да премьерже 1963 ий 5 апрельыште лийын. Тудо марий сымыктышын историйыштыже у лаштык семын палемдалтын. Сборникыш композитор, режиссер, артист, писатель, шанчыеҥ, семмастарын родо-тукымжын очеркыштым, статьяштым, шарнымашыштым пуртымо. Савыктыш Марий Эл Республикын 100 ияш лӱмгечыже да композитор, Олык Ипай лӱмеш да Марий АССР кугыжаныш премийын лауретше Эрик Сапаевын шочмыжлан 90 ий теммылан пӧлеклалтын. «Акпатыр» опере тачат Эрик Сапаев лӱмеш опер да балет театрын репертуарыштыже уло. Кажне ийын кеҥежым тудым Килемар районышто ончыктат. 

Марий йылме дене олимпиаде 19 февральыште Марий кугыжаныш университетыште лиеш. Тушко марий йылме да литератур, тыгак марий кугыжаныш йылме дене муниципал этапыште сеҥыше-влак толыт. Марий Элыште илыше калык-влакын историй да культур предмет дене олимпиадын регионысо этапше тений заочно эрта. Республикысе этапыште сеҥыше-влак 25 февральыште регион-влак кокласе олимпиадышке ушнат. Тушко Марий Эл гыч веле огыл, тыгак Башкортостан, Татарстан, Удмурт республикыла, Свердловский область гыч тунемше-влак шинчымашыштым тергаш тӱҥалыт. Но тений тиде этап тыгак заочно формат дене лиеш. 

 Икмыняр кече жапыште Йошкар-Олаште илыше-влак «Оласе йӧнан среда» программе дене шке темлымашыштым пуэн кертыт. Нине кумдык-влакым 2021 ийыште тӱзатышаш улыт. Ушештарена, йодмаш-влакым 18 февраль марте налыт, тидын дечын вара шорт-листым ыштат да еҥ-влак тӱзатышаш проект-влакым шкештак ойырат. Йӱклымаш тений у семын эрта. Тидлан российысе платформым пашашке колтат. Тушко «Госуслуги» порталыште регистрацийым эртыше кажне еҥ ушнен кертеш. Икмыняр минутым ойырен, олаште илыше-влак кундемым вияҥдыме пашам ончыко колташ полшат.  

Ушештарена, ты марте рӱдӧлаште илыше-влакын ойырымышт почеш 25 кумдыкым тӱзатеныт. Тений йӱклымаш чыла регионышто иканаште 26 апрель гыч 30 май марте лиеш. Тиде темлымаш дене 2022 ийлан тӱзатышаш кундем-влакын радамыштым ыштат. Платформышто кеч-могай объект дене йӱклымашым ужаш лиеш. Тышке 14 ияш дечын кугырак кажне кумылан еҥ ушнен кертеш. 

Марий Элын ВУЗлаштыже коронавирус дечын вакцинацийым ыштат. Александр Евстифеев кӱшыл тунемме верлаште шинчымашым погышо да туныктышо-влак коклаште коронавирус инфекций шарлымым шижтарыме да эпидемий ваштареш кучедалме йодмашым шуктымо паша дене кылдалтше совещанийым эртарен. ВУЗ-влак очно тунеммаш деке пӧртылыныт, садланак правилым шуктымо да аралалтме йодыш – ончыл верыште.  Юл кундемысе технологический университетын ректоржо Игорь Петухов ешарен: тиде ВУЗ Йощкар-Оласе 1-ше номеран поликлинике дене ик ийлан ойпидышым пеҥгыдемден. Тудын дене келшышын,  тунемше-влакым тӱткын тергат: студент-шамыч анализым сдатлат, флюорографийым ыштат. Тидын дечын вара ПЦР йӧн дене у коронавирус инфекцийын улмыжлан тергат. Тыгак вакцинаций дене паша кая. Марий Кугыжаныш университетын ректоржо Михаил Швецов ешарен: тиде тунемме верыште студент да туныктышо-влаклан прививкым шындаш тӱҥалыныт. 

Фитнес аэробике - моторлык дене ойыртемалтеш. Йошкар-Олаште спортын тиде видше дене чемпионат да первенство эртен. Тиде таҥасымаште Юл кундемысе федерал округысо чемпионатыш кайышаш сборныйым ойыреныт. Соревнований степ-аэробике дисциплине дене эртен. Спортын тиде видше дене республикыште «Экстрим» команде палыме. Тудо Российын да Европын чемпионжо ик гана веле огыл лийын. Таҥасымаште артистла койын моштымашым, техникым, тыгак упражнений-влакым командыште синхронно ыштымым аклат. Каласен кодаш лиеш, шукерте огыл Чебоксар олаште фитнес-аэробике дене Российысе таҥасымаш эртен. Марий Эл гыч мийыше   команде-влак тушто тӱрлӧ ийготан-влак тӱшкаште икымше верым налыныт.